Yoshlar jinoyatchiligining oldini olish-global muammo

Viloyat hududida voyaga yetmaganlar, ayniqsa yoshlar tomonidan sodir etilishi mumkin boʻlgan jinoyatlarni oldini olish, oʻquvchi yoshlarni vatanparvarlik ruhida tarbiyalash va jinoyatchilikni oldini olish yuzasidan Oʻzbekiston “Adolat” SDP Shoʻrchi tuman Kengashi va partiya tuman “Yosh adolatchilar qanoti” Kengashi vakillari tomonidan tumandagi 2-sonli kasb-hunar maktabida “Yoshlar oʻrtasida jinoyatchilik va huquqbuzarlikning oldini olish” mavzusida davra suhbati boʻlib oʻtdi.

Tadbirda tuman partiya Kengashi va “Yosh adolatchilar qanoti” Kengashi vakillari, deputatlar, xotin-qizlar masalalari boʻyicha tuman hokimligi vakillari, kasb-hunar maktabi pedagog-oʻqituvchilari va maktabning yuqori sinf oʻquvchilari ishtirok etishdi.

Tadbirda soʻzga chiqqanlar yoshlarni huquqbuzarlik va jinoyatchilik yoʻliga kirib qolmasliklari, doimo ona yurtga, vatanga sadoqatli yetuk inson boʻlib yetishib chiqishlari, shundagina vatan oldidagi oʻzlarining chin fuqarolik burchlarini oqlashliklari xususida aytib oʻtishdi.

Mardon Yuldashev, Xalq deputatlari Shoʻrchi tuman Kengashi deputati:                                                                                  

Maʼlumki, har bir mahallani jinoyatchilikdan xoli hududga aylantirish, bu borada befarqlik, loqaydlik holatlariga barham berish jamiyatda tinch va osoyishta hayotni taʼminlashning asosiy shartlaridan biridir. Bu borada har bir fuqaro ongida jinoyatchilikning oldini olishga qaratilgan tuygʻuni shakllantirish gʻoyat muhim ahamiyatga ega. Huquqbuzarliklar oʻz-oʻzidan sodir etilmaydi. Asosiy masala huquqbuzarliklarning oqibatlari bilan kurashish emas, balki barvaqt oldini olish, sodir etishga imkon bergan sabab va shart-sharoitlarni oʻz vaqtida bartaraf etishdan iborat. Bu masalada hududlarda yangi ish oʻrinlari tashkil qilish, tadbirkorlik bilan shugʻullanish uchun qoʻshimcha imkoniyatlar yaratishga eng asosiy eʼtibor qaratilmoqda.

Oʻquvchilar davra suhbati davomida oʻzlarini qiziqtirgan savollarga javob olish bilan birgalikda oʻzlari uchun kasb tanlash, hayotdagi muammoli vaziyatlarda toʻgʻri qaror qabul qila olish yuzasidan ham qimmatli boʻlgan maslahatlarni tinglash imkonidan mamnun boʻldilar.

Jumaniyoz Safarov,

“Adolat” SDP Shoʻrchi tuman “Yosh adolatchilar qanoti” Kengashi faoli.