Yoshlar masalalari doimo davlatimiz siyosatining ustuvor yoʻnalishlaridan biri boʻlib kelgan va shunday boʻlib qoladi

Davlatimiz rahbari tomonidan yoshlar masalasiga alohida eʼtibor qaratayotgani barchamizga maʼlum.

Prezident Shavkat Mirziyoyevning inauguratsiya marosimida Oʻzbekiston yoshlariga murojaati buning yana bir yaqqol isbotidir.

Prezident oʻz murojaatida mamlakat yoshlarini kelajak bunyodkorlari deb atab, ularning mamlakat kelajagida qanday muhim oʻrin tutishini alohida taʼkidladi. U yoshlarga oʻz oʻgʻil-qizlari sifatida murojaat qilib, ular oldida beqiyos va misli koʻrilmagan imkoniyatlar turganini taʼkidladi.

Prezidentimiz oʻz nutqida yoshlarni obod va farovon, tarixda abadiy qoladigan yurtni barpo etishda faol ishtirok etishga undadi hamda mamlakatimiz yoshlari xalq manfaatlarini himoya qilishga, Oʻzbekistonning yangi kelajagini yaratishga, mamlakat va uning xalqining farovonligi uchun mehnat qilishga, Yangi Oʻzbekiston va uchinchi Renessansni aynan yoshlar qurishiga hamda Oʻzbekiston tarixiga oltin harflar bilan yoziladigan buyuk ishlarni amalga oshirishga qodir ekanligiga ishonch bildirdi.

“Yoshlik – gʻanimat, vaqt – gʻanimat, fursat borida otni qamchilang! Davlatimiz, xalqimiz yaratib berayotgan imkoniyatlarning qadriga yeting! Dunyoga oʻz soʻzingizni ayting! Izlanish va intilishdan aslo toʻxtamang! Baxt va omad doimo sizlarga yor boʻlsin!”, – soʻzlari bilan Shavkat Mirziyoyev yoshlarga oʻz murojaatini yakunladi.

Yuksak minbarlardan Prezidentimizning nutqlarida yoshlarga alohida eʼtibor qaratilishi, Oʻzbekistonda yoshlar masalalariga doimo ustuvor vazifalardan biri sifatida qaralishi, yoshlar esa mamlakatimizning siyosati va hayotida doimo birinchi oʻrinlarda boʻlishini anglatadi desam mubolagʻa boʻlmaydi.

Ishonaman, davlatimiz rahbarining siyosiy irodasi, yoshlarga alohida eʼtibori, ularni yuksak qadrlashi va qoʻllab-quvvatlashiga javoban biz Oʻzbekiston yoshlari, mening aka-ukalarim va opa-singillarim birlashib, yurt va xalq farovonligi yoʻlida oʻqib, izlanib, fidokorona mehnat qilib, Prezidentimiz tomonidan bildirilgan ishonchga munosib boʻlishimiz kerak.

Xasanxodja ABIDOV,
Oʻzbekiston Respublikasi Oliy Majlisi Qonunchilik
palatasi huzuridagi Yoshlar Parlamenti aʼzosi,
 “Adolat” SDP fraksiyasi aʼzosi