Yoshlar parlamenti aʼzolari “Adolat” SDP fraksiyasining navbatdagi yigʻilishida ishtirok etishdi

Unda Oliy Majlis Qonunchilik palatasidagi “Adolat” SDP fraksiyasi aʼzolari tomonidan “Sud qarorlarining qonuniyligi, asosliligi va adolatliligini tekshirish instituti takomillashtirilishi munosabati bilan Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartirishlar kiritish haqida”gi qonun loyihasi ikkinchi oʻqishda qizgʻin muhokama qilindi.

Davlat va jamiyat rivojiga daxldor, xalqchil, demokratik tamoyillar asosida yaratilayotgan qonun loyihalarining xalq vakillari boʻlmish Oliy Majlis Qonunchilik palatasi deputatlari tomonidan qizgʻin muhokamalarini yaqindan kuzatib borgan “Adolat” SDPning Yoshlar parlamentidagi aʼzolari qonunlarni ishlab chiqish va takomillashtirish borasida muhim koʻnikmalarni oʻzlashtirish barobarida qimmatli tajribalarga ega boʻldilar.

Taʼkidlanganidek, jarayonda muhokama etilgan qonun loyihasi fuqarolarning odil sudlovga erishish darajasini yanada oshirish, Oʻzbekiston Respublikasi Konstitutsiyasida belgilangan sud orqali himoya qilinish va sudga shikoyat qilish huquqi kafolatlarini yanada oshirish, ularning buzilgan huquq va erkinliklari hamda qonuniy manfaatlarini yanada kengroq himoya qilish, odil sudlovga erishish darajasini yanada yuksaltirish maqsadida ishlab chiqilgan.

Ushbu qonun loyihasi bilan sud qarorlarini shikoyat (protest) asosida apellyatsiya tartibida, agar ular apellyatsiya tartibida koʻrilmagan boʻlsa kassatsiya tartibida, apellyatsiya yoki kassatsiya tartibida koʻrilgan sud qarorlarini taftish tartibida koʻrish belgilanmoqda. Shuningdek, apellyatsiya shikoyatini berish muddatini 20 kundan 10 kunga qisqartirish nazarda tutilmoqda.

Fraksiya aʼzolari partiya pozitsiyasidan kelib chiqib qonun loyihasining muhim konseptual hujjat ekanligi, mazkur yoʻnalishdagi qonunchilikning uzviyligi va davomiyligini taʼminlashda alohida ahamiyat kasb etishini, yurtimizda yashayotgan har bir fuqaroning huquq va erkinliklari, qonuniy manfaatlari hisobga olinganligini taʼkidlab oʻtdilar.

Shuningdek, mazkur hujjat “Adolat” SDP maqsad va gʻoyalari bilan uzviy bogʻliq holda ishlab chiqilganligi, adolatli jamiyat yaratishning asosiy boʻgʻini hisoblangan sud tizimining yanada takomillashuviga, fuqarolarga ushbu tizimda qulaylik va yengillik yaratishga qaratilgan qonun loyihasi ekanligi toʻgʻrisida oʻz fikr va munosabatlarini bildirdilar.

Yigʻilishda deputatlar tomonidan partiya pozitsiyasidan kelib chiqqan holda koʻtarilgan savollar hamda takliflar yuzasidan tashabbuskorlar va soha-mutaxassislari tomonidan javoblar olinib, mazkur qonun loyihasi maʼqullandi.

Muhokamalarga boy boʻlgan yigʻilishda kun tartibidagi masalalar atroflicha koʻrib chiqildi.