Yoshlar Parlamentiga munosiblar saralanmoqda

Ayni kunlarda Oʻzbekiston Respublikasi Oliy Majlis Qonunchilik palatasi huzuridagi Yoshlar parlamentiga saylovlarning hududiy bosqichlari boʻlib oʻtmoqda.

Ushbu saylovning dastlabki tuman va shaharlardan faol yoshlarning hujjatlar topshirish jarayoni boʻlib oʻtdi. Keyingi viloyat bosqichida yoshlarning iqtidori va salohiyati hakamlar hayʼati tomonidan baholab borilmoqda.

Mazkur Yoshlar parlamenti saylovi Surxondaryo viloyatida ham nizom talablariga muvofiq shaffof va ochiq tarzda tashkil qilinyapti.

Viloyatda jami 52 nafar faol yoshlar hujjat topshirdilar. Tuman-shaharlarda partiya faollaridan iborat hakamlar hayʼati nomzodlar orasidan yoshlarning jamoatchilik orasida oʻzining tashabbuskorligi, siyosiy savodxonligi, qoʻlga kiritgan yutuqlari, shuningdek, partiya tomonidan tashkil etilayotgan turli tadbirlardagi faol ishtiroki bilan ajralib turgan 14 nafar yosh yigit-qizlarni saralab oldilar.

Abdurashid Artikov, Xalq deputatlari Surxondaryo viloyat Kengashi deputati:

- Hakamlar hayʼati aʼzolari tomonidan berilgan savollarga nomzodlar talab darajasida javob berib, oʻz bilim, qobiliyat va intellektual salohiyatlarini namoyon etdilar.Nomzodlarni saralash jarayonida asosan, yoshlarning partiya bilan xayrixohligi, huquqiy va siyosiy savodxonligi, erishgan muvaffaqiyatlariga eʼtibor qaratilmoqda. Shu bilan birga, keng jamoatchilik orasida oʻzgalarga oʻrnak boʻlib kelayotgan shijoatli yoshlarni saralab olinmoqda.

Uzoq davom etgan muhokamalardan soʻng 3 nafar nomzod saralashning respublika bosqichiga tavsiya etildi.

Faxriddin Orifxonov,

“Adolat”SDP Surxondaryo viloyat Kengashi

mafkuraviy ishlar boʻyicha rais oʻrinbosari