Yoshlar taqdiriga kim javobgar?

Yoshlar taqdiri uchun, albatta, barcha birday masʼul – bir bolaga yetti mahalla ham ota, ham ona. Bejiz har bir mahallaga yoshlar yetakchilari biriktirilmagan. Ularning muammolari va takliflarini tinglash, ularga moddiy va maʼnaviy koʻmak berish vazifalari belgilangan.

“Nurafshon ziyosi” kanali va “Mashʼal” ijtimoiy-siyosiy gazetasi bugun Nurafshon shahri IIB boshligʻi, 3-sektor rahbari Otabek Gʻanibekov, Oʻzbekiston “Adolat” SDP Toshkent viloyati Nurafshon shahar Kengashi raisi Olimjon Qurbonov hamrohligida Nurafshon shahar “Taraqqiyot” mahallasida yoshlar bilan olib borilayotgan ishlarni koʻzdan kechirdi.

Xabaringiz bor, Shavkat Mirziyoyev raisligida joriy yil 11-aprel kuni yoshlar siyosati sohasidagi ishlar natijadorligini oshirish chora-tadbirlari yuzasidan videoselektor yigʻilishi oʻtkazilgan. Unda davlat koʻmagiga muhtoj yoshlar har bir vazir va uning oʻrinbosarlari, viloyat, tuman va shahar hokimlari, sektor rahbarlari, rektorlar, Milliy gvardiya va harbiy qism komandirlariga birma-bir biriktirildi. Ular oʻz himoyasidagi oʻgʻil-qizlarning kasb-hunar oʻrganishiga, kredit, subsidiya va kafillik olish orqali bandligiga koʻmaklashyapti.

Diqqatimizni tortgan holat, qaysi yoshning xonadoniga borishimizdan qatʼi nazar sektor rahbari har bir yoshga oʻz ukasidek muomala qilgani. Samimiy suhbatlardan bilsak boʻladiki, Otabek Gʻanibekov doimiy ravishda ular bilan aloqada boʻlib, oʻz nazoratiga olib kelgan. Ular begona emas. Oʻrtada begona yoʻq.

Otabek Gʻanibekov bilan hamrohligimiz koʻpga choʻzilmadi. Lekin taassurotlarimiz koʻp boʻldi. 3-sektordagi, Otabek akaga biriktirilgan yoshlarning kelajagiga, ularning taqdiriga, avvalo, mana shu mamlakat, qolaversa, Otabek Gʻanibekov javobgarlikni oʻz zimmasiga olgan! Demak, yoshlarning ertasi nurafshondir!

Otabek Isroilov

jurnalist.