Yoshlarga eʼtibor – kelajakka eʼtibor

Mamlakatimizda navqiron avlodni komil insonlar, millat va jamiyat manfaatlari uchun kurashuvchi, yetuk shaxslar qilib tarbiyalash yoʻlida koʻplab tadbirlar amalga oshirilmoqda. Аyniqsa, yoshlarga oid keng koʻlamli davlat siyosati ishlab chiqilganligi katta ahamiyat kasb etmoqda. Mazkur yoʻnalishdagi masalalar davlatimiz rahbarining doimiy eʼtiborida turganligi ham eʼtiborga molikdir.Prezident Shavkat Mirziyoyev raisligida shu yil 11 aprel kuni yoshlar siyosati sohasidagi ishlar natijadorligini oshirish chora-tadbirlari yuzasidan oʻtkazilgan videoselektor yigʻilishini hozir ham eslayman. Unda taʼkidlanganidek, bugun mamlakatimizda 30 yoshgacha boʻlgan yoshlar 19 milliondan ortiq yoki aholining 55 foizini tashkil qiladi. Mehnat bozoriga har yili 600 ming yoshlar kirib kelayotgan boʻlsa, kelgusi 10 yilda bu raqam 1 millionga yetadi. Shu bois yoshlarga sifatli taʼlim berish, kasb-hunarga oʻqitish va bandligini taʼminlashga alohida ahamiyatga ega.

Oʻtgan yilning oʻzida yoshlar tadbirkorligi uchun 4 trillion soʻm kredit berilib, 150 mingta loyiha ishga tushirilgan, 325 mingta ish oʻrni yaratilgan. 43 ming gektar ekin maydoni ajratilib, 435 ming yoshlar bandligi taʼminlangan. 32 mingdan ziyod yoshlarga subsidiya orqali asbob-uskuna, mehnat qurollari va kompyuter olib berilgan. Bunday imkoniyatlardan oqilona foydalanib, oʻzi va oilasining farovonligi yoʻlida samarali mehnat qilish har birimizning muqaddas burchimizdir. Bu orqali yurt taraqqiyotiga, iqtisodimizni mustahkamlashga ham munosib hissa qoʻshish mumkin.Tengdoshlarimizni ijtimoiy jihatdan qoʻllab-quvvatlash boʻyicha qilingan ishlarning bisyorligi barchamizga maʼlum. 2022 yili 130 ming talabaga 1 trillion 700 milliard soʻm taʼlim krediti berildi. 53 ming nafar ehtiyojmand talabaga kontrakt pullari, 15 mingdan ziyod yoshlarga harbiy xizmat va 13 ming nafariga chet tillari boʻyicha imtihon xarajatlari toʻlab berildi. 81 ming talabaga uy-joy ijarasi toʻlovi ajratildi. “Yoshlar daftari” orqali 300 ming yoshlarga qariyb 600 milliard soʻmlik yordam koʻrsatildi.

Аmmo yigʻilishda qayd etilganidek, bu borada dolzarb masalalar hali anchagina bor. Masalan, bugungi kunda yurtimizda 722 ming nafar rasman ishsiz yoshlarning bandligini taʼminlash vazifasi oldimizda turibdi. Buning uchun aniq va manzilli tashkil etish talab qilinadi. Shu maqsadda 14 yoshdan 30 yoshgacha boʻlgan 9 million nafar oʻgʻil-qiz alohida eʼtiborga olindi. Birinchi marta 25 ta vazirlik va idora maʼlumotlari oʻzaro uygʻunlashgan elektron bazaga jamlandi. Barcha yoshlarning ijtimoiy ahvoli, qobiliyati va qiziqishlari oʻrganilib, “mahalladan vazirlikkacha” tizimida ishlash choralari belgilab olingan.Shuningdek, “Yangi Oʻzbekiston yoshlari tashabbuslari” jamgʻarmasi va elektron platformasi tashkil qilinishi belgilandi. Jamgʻarmaga 100 million dollar yoʻnaltirilib, bu mablagʻlar iqtidorli yoshlarning eng yaxshi gʻoya, startap va loyihalariga qulay va yengil shartlarda, zarur boʻlsa foizsiz ajratiladi. Bundan tashqari, hududlarda “Kreativ park”lar ham tashkil etiladi. Ularga IT-park rezidentlariga berilgan imtiyoz va yengilliklar qoʻllanadi. “Yoshlar daftari” jamgʻarmasi mablagʻlari ham koʻproq kasb oʻrgatishga, bandlikni taʼminlashga xizmat qilishi kerakligi taʼkidlandi.

Tengdoshlarimizning bugungi kuni va kelajagi haqida gʻamxoʻrlik ruhi bilan sugʻorilgan bunday ajoyib misollarni koʻplab keltirish mumkin. Yaqinda Prezidentning “Yoshlarning bandligiga koʻmaklashish hamda ularni doimiy ish bilan taʼminlashga oid qoʻshimcha chora-tadbirlar toʻgʻrisida”gi farmoni qabul qilindi. Ushbu hujjatga koʻra, 2023 yil 1 maydan boshlab 2025 yil 1 yanvarga qadar ish beruvchilarga (byudjet tashkilotlari, davlat korxonalari, ustav jamgʻarmasi (kapitali)da davlat ulushi 50 foiz va undan ortiq boʻlgan yuridik shaxslar, shuningdek, ijtimoiy soliqni 1 foiz stavkada toʻlovchilar bundan mustasno) ular tomonidan 25 yoshdan oshmagan xodimlar uchun toʻlangan ijtimoiy soliq summasi Davlat byudjetidan toʻliq qoplab beriladi. Bunda, ijtimoiy soliq summasi yosh xodimlar olti oy davomida uzluksiz mehnat faoliyatini amalga oshirishi sharti bilan yettinchi oydan boshlab qoplab beriladi.Xulosa qilish mumkinki, davlatimiz va xalqimizning yosh avlod haqidagi gʻamxoʻrligi bundan keyin ham bardavom boʻladi. Bu esa yurtimizning porloq kelajagiga xizmat qiladi.

Dilshoda Turgʻunova,

“Аdolat” SDP Namangan viloyat Kengashi

“Yosh adolatchilar” qanoti faoli.