Yoshlarning taʼlimiga eʼtibor – yurtning kelajagiga eʼtibor

Darvoqe, Yangi Oʻzbekistonni barpo etishda, mamlakatimiz taraqqiyotini yanada yuqori bosqichga koʻtarishda taʼlim sohasi ham muhim oʻrin tutadi. Zero, taʼlim va tarbiya masalasi har qanday jamiyat rivojining asosiy omili va ustuvor yoʻnalishi hisoblanadi. Shuning uchun ham, mamlakatimizda va Vatanimiz kelajagi boʻlgan yoshlarga sifatli bilim berish, zamonaviy bilim va koʻnikmalarga ega, yuqori malakali, raqobatdosh kadrlarni tayyorlashga alohida eʼtibor qaratilmoqda.

Prezidentimizning yuqori minbarlardan qayta-qayta “Agar mendan sizni nima qiynaydi?, deb soʻrasangiz, farzandlarimizning taʼlim va tarbiyasi deb javob beraman”, — deya aytilayotgan soʻzlari ham buni yaqqol isbotidir.

Bugungi kunda jahondagi globallashuv jarayonlari, innovatsion jamiyatga boʻlgan ehtiyoj, fan-texnika taraqqiyoti yoshlar uchun koʻplab imkoniyatlar yaratishi bilan bir qatorda, ularning oldiga tezkor qarorlar qabul qilish, innovatsion tafakkurni shakllantirish, intellektual salohiyatni oshirish kabi koʻplab talablarni qoʻymoqda.

Taʼlim sohasiga sarmoya qilish nafaqat mamlakatning inson kapitalini yuksaltirish va iqtisodiy rivojlanish istiqbollarini yaxshilaydi, balki davlat va jamiyat tomonidan fuqarolar, ayniqsa yoshlar taʼlimiga qaratilayotgan eʼtibor darajasini aks ettiradi. Shuningdek, taʼlim insonning dunyoqarashini kengaytiradi, oʻz-oʻzini anglash imkoniyatini beradi va oʻzining intellektual mahsulotini yaratishga hissa qoʻshadi. Qolaversa, mamlakat kelajagi boʻlmish yoshlarning farovonlik darajasi va turmush tarzi ham bevosita taʼlim va uning sifatiga bogʻliq boʻladi.

Umuman olganda, yoshlarning taʼlimi, ilmiy, kasbiy rivojlanishi, salomatligi, iqtisodiy imkoniyatlarining kengaytirilishi, texnologiya va innovatsiyalarni rivojlantirishga ajratiladigan sarmoyalar “demografik dividend”ga ega boʻlishga, yaʼni mamlakatning qisqa muddatda yuqori iqtisodiy taraqqiyotga erishishiga zamin yaratadi.

Prezidentimiz Shavkat Mirziyoyev taʼkidlaganidek “Bizning asosiy maqsadimiz – yoshlarning sifatli taʼlim olish imkoniyatiga ega boʻlishiga erishish, ularning oʻz qobiliyati va isteʼdodini roʻyobga chiqarish uchun barcha zarur shart-sharoitlarni yaratib berishdan iborat”.

Ushbu soʻzlarning tasdigʻi oʻlaroq, oʻtgan yillar davomida taʼlimga eʼtibor qaratilib, bu soha uchun koʻplab oʻzgarishlar amalga oshirildi va keyingi 6 yilda taʼlim sohasida amalga oshirilgan islohotlar oʻz aksini topdi.

Birgina oliy taʼlim sohasini oladigan boʻlsak, oʻtgan 6 yil mobaynida oliygohlar soni 77 tadan 210 taga yetkazildi, ularga qabul 3,5 baravarga ortdi.

Oliy taʼlimga qabul kvotasi bir necha barobar oshirilib, yoshlarni oliy taʼlim bilan qamrov darajasi 9 foizdan 39 foizga oshirildi.

Yoshlarimizga bir vaqtning oʻzida bir nechta oliy oʻquv yurtiga hujjat topshirish imkoniyati berildi.

Oliy taʼlim muassasalaridagi oʻquv jarayoni toʻliq kredit-modul tizimiga oʻtkazildi.

Sohadagi pedagog, ayniqsa ilmiy daraja ega xodimlarning maoshi 3,2 barobarga oshdi.

41 ta oliygohlarga akademik va moliyaviy mustaqillik berilib, moliyaviy barqarorlikni taʼminlash, moddiy-texnika bazani mustahkamlash, kontrakt asosidagi qabul parametrlarini belgilashda mustaqil hal etish imkoniyati yaratildi. Har bir oliy taʼlim muassasasi tomonidan oʻquv rejalar va oʻquv dasturlarini mustaqil ishlab chiqilishi va tasdiqlanishi tartibi joriy etilib, oʻquv dasturlar xalqaro talablarga moslashtirildi.

Natijada mutaxassislikka aloqasi boʻlmagan fanlar soni 2 barobarga qisqartirildi.

Chet elning nufuzli oliygohlari bilan qoʻshma taʼlim dasturlari tashkil etildi, bitiruvchi kurs talabalariga oʻqish davrida ishlash imkoniyati berildi. Natijada zamonaviy, sifatli va raqobatbardosh kadrlarni tayyorlash yoʻlga qoʻyildi.

Qolaversa “El-yurt umidi” va shu kabi qator jamgʻarmalar orqali dunyoning TOP universitetlari va tibbiy tashkilotlarida oʻqish, stajirovka oʻtash va malaka oshirish imkoniyati yaratilib, soʻnggi olti yilda oliy taʼlim muassasalarining oʻzaro hamkorlik va grant dasturlari doirasida 8 636 nafar professor-oʻqituvchilar xorijiy oliy taʼlim hamda ilmiy-tadqiqot muassasalariga malaka oshirish va stajirovka oʻtash uchun yuborildi.

Oliy taʼlim muassasalarida taʼlim sifati va samaradorligini yanada oshirish maqsadida 7 385 nafar xorijlik mutaxassislar oʻquv jarayoniga jalb qilindi.

Bir soʻz bilan aytganda mamlakatimizda yangi avlod kadrlarini tayyorlash tizimi joriy qilindi.

Darhaqiqat, mamlakat Prezidenti yurt farzandlari boʻlmish Oʻzbekiston yoshlariga mukammal oʻqib oʻrganishlari, zamonaviy va sifatli taʼlim olishlari uchun keng imkoniyatlar yaratib berish orqali Oʻzbekistonni yanada rivojlantirishga zamin yaratmoqda. Taʼlim sohasiga berilayotgan eʼtibor tufayli yoshlarning taʼlim olish huquqlari kengayishi barobarida ularning oldida misli koʻrilmagan imkoniyat eshiklari ochilishi va ularning oʻz qobiliyati va isteʼdodini roʻyobga chiqarishi uchun barcha zarur shart-sharoitlar yaratilmoqda.

Xasanxodja ABIDOV,
Oʻzbekiston Respublikasi Oliy Majlisi Qonunchilik Palatasi huzuridagi
Yoshlar Parlamenti aʼzosi, “Adolat” SDP fraksiyasi aʼzosi