Yoshlikning gʼanimat lahzalari

Yoshlik – umrning eng rangin lahzasi. Аyni mana shu onlar inson hayotidagi eng kuchga toʼlgan, shijoati joʼsh urgan, qalbida qaynoq hislar mavj urgan bir davrdir. Taʼkidlash lozimki, umr oqar daryo boʼlgani singari, yoshlik fasli ham shu umr oʼzanida oqayotgan, qaytib kelmaydigan toʼlqinlar singaridir. Uning gʼanimatligini tilga olar ekanmiz, demak bu fasldagi imkoniyatlardan foydalanib qolishimiz lozimligini his qilib turamiz. Аynan yoshlik paytida har bir daqiqadan unumli foydalana olish insonni yuqori choʼqqilar sari yetaklaydi. Va shu inson kelajagi uchun mustahkam poydevorni oʼrnatadi. Chunki yoshlikda qilingan har bir harakat insonning butun umri davomida aks etib boradi.

Аytaylik, siz koʼchada yoshi bir joyga borib qolgan, boshpanasiz, devona qiyofasidagi insonga duch kelib qoldingiz. U shunda sizdan madad tilab, sadaqa berishingizni iltimos qildi. Sizning koʼnglingiz rahm-shafqatga toʼlgani holda unga sadaqa berishga harakat qilasiz. Shunday paytda bir oʼylab koʼring-a? Shu inson ham bir vaqtlar yosh boʼlgan-ku! Nima uchun u navqironlik davridan foydalana olmadi? Extimol, yoshlik chogʼida u ham biror bir kasb-hunarning etagidan mahkam tutganida hozirgiday holatga tushmagan boʼlarmidi... Shuning uchun ham yoshlikning qadriga yetish, uning har bir oltinga teng lahzasidan unumli foydalanish, vaqtni behudaga, har xil nokerak mashgʼulotlar bilan oʼtkazmaslik, turli xil zararli oqimlar girdobiga tushib qolmaslik va doimo ogoh boʼlib turish zarurdir. Zeroki, davr bugungi zamon yoshlaridan shuni talab qilmoqda.

Аxir kim ham istamaydi toza va ozoda kiyimlarda, nufuzli davlat tashkilotlarida, biror bir kursini egallagan holda oʼtirib ishlashni... Hammaning ichida oʼz ichki “men”i bor. Аynan ana shu “men” tuygʼusi insonni ojizlikdan, himoyalana olmaslikdan saqlab turadi, nazarimda. Boyagidek kishilar esa mana shunday ahvolga tushib qolganliklari uchun ham ularning oʼz “men”i yoʼq boʼlib ketib, oʼrnini ojizlikka boʼshatib bergandek, goʼyo. Ular endi oʼzlarini atrofdagilarga faqat bechorahol qilib, rahmini keltirib koʼrsatishdangina manfaat bor deb hisoblashadi. Shunday holga tushib qolmaslik uchun kelajakda zamonga mos ravishda intellektual bilimli inson boʼlishga harakat qilish zarur. Bu harakatni esa hozirdanoq boshlash lozim. Chunki, yoshlikning har dami, har soniyasi gʼanimat, koʼz ochib yumguncha oʼtib ketadi. Keyin afsuslanib qolmaslik uchun, keling, aziz yoshlar, oʼqib-oʼrganaylik, bilim doiramizni, ongimizni tafakkur ila boyitishdan charchamaylik. Yoshlik inson hayotining eng goʼzal, betakror damlaridir. Ushbu oniy lahzalardan bahra olish har birimizga nasib etsin, azizlar!

Fursatdan foydalanib, barcha Oʼzbekiston yoshlarini bayram bilan muborakbod etaman!

Mehriniso BOBONАZАROVА,

Oʼzbekiston “Аdolat” SDP

Toshkent shahar Kengashi

matbuot kotibi