Yurt ravnaqi uchun har birimiz masʼulmiz

Oliy Majlis Qonunchilik palatasi va senatining qoʻshma majlisida Oʻzbekiston Respublikasi yangi saylangan Prezidentining oʻz lavozimiga kirishishiga bagʻishlangan tantanali marosimda Shavkat Miromonovich Mirziyoyevning maʼruzalarini goʻzal vatanimizning bir fuqarosi sifatida diqqat bilan tingladim. Haqiqatdan ham bugun jonajon Oʻzbekistonimiz islohotlar mamlakatiga aylandi. Prezidentimiz maʼruzada alohida eʼtirof etganlaridek, Oʻzbekistonni dunyo tanidi. Yangi Oʻzbekiston dunyoga yuz tutdi.

Jahon tajribasidan yaxshi maʼlumki yashil iqtisodiyot, yashil energiyaga oʻtilgan mamlakatlarda allaqachon xalq farovonligi oshib taraqqiyot taʼminlanyapti. Bizning “Adolat” SDP ham oʻz saylovoldi dasturida yashil iqtisodiyot, muqobil energiya manbalari, innovatsion texnologiyalarni hayotga keng tatbiq etish masalasiga alohida eʼtibor qaratgan. Prezidentimiz ham bu masalani tezroq amalga oshirish sira kechiktirib boʻlmaydigan vazifalardan biri ekanligini alohida taʼkidladilar.

Bundan tashqari, Prezidentimiz maʼruzalarida 2030-yilgacha boʻlgan ustuvor vazifalarning strategik yoʻnalishlari belgilab berildi. Qishloq xoʻjaligi, sogʻliqni saqlash, xotin-qizlar, yoshlar faolligini oshirish borasida ham Prezidentimiz fikr mulohaza yuritdilar. Ayniqsa yangi Oʻzbekistonni barpo etishda barkamol yoshlarning hissasi beqiyos ekanligi alohida qayd etildi.

Prezidentimiz xususan taʼlim yoʻnalishi xususida ham bir qator takliflarni ilgari surdilar. Erishilgan natijalar xususida aniq fikrlarini bildirdilar. Haqiqatdan ham keyingi yillarda taʼlim sohasida Respublikamizda boʻlgani singari viloyatimizda ham bir qator ishlar amalga oshirildi. Avvalroq vohamizda bor yoʻgʻi 3 ta oliy taʼlim dargohlari faoliyat yuritgan boʻlsa, bugunga kelib ular soni 10 tadan oshdi. Ilgari yoshlarning atigi 4 foizi oliy taʼlim muassasalariga oʻqigan boʻlsa, bugunga kelib ular soni 4 barobarga koʻpaydi.

Prezidentimiz tomonidan ilgari surilgan  suvni isrof etmay ishlatish borasidagi fikrlari ko'pchilikning dilidagi gap bo'ldi desam mubolag'a bo'lmaydi. Bugungi kunda butun dunyoda toza, shirin suv global muammoga aylanib borayotgan bir vaqtda, davlatimiz rahbarining bu masalaga jiddiy ahamiyat qaratayotgani tahsinga sazovordir.  Shunday ekan katta paykallardagi qishloq xoʻjalik ekinlarini tomchilatish usulida sugʻorish vaqti keldi. Toza ichimlik suvini har tomchisini qadrlab foydalanishimiz muhim ahamiyatga ega.

Umuman olganda, Prezidentimiz maʼruzasida ustuvor vazifa etib belgilangan maqsadlardan kelib chiqib, galdagi faoliyat yoʻnalishimizni belgilab olyapmiz.

Ruiddin Raupov,

“Adolat” SDP Qashqadaryo viloyat Kengashi raisi,

xalq deputatlari viloyat Kengashi deputati.