Nomzod haqida
“ADOLAT” SOTSIAL-DEMOKRATIK PARTIYASIDAN
O‘ZBEKISTON RESPUBLIKASI PREZIDENTLIGIGA NOMZOD
TARJIMAI HOLI
Maxmudova Robaxon Anvarovna 1958-yil 9-noyabrda Farg‘ona viloyatining Farg‘ona tumanida ziyolilar oilasida tug‘ilgan.
Millati – o‘zbek.
Maʼlumoti – oliy. 1983-yilda Toshkent davlat universitetining “Huquqshunoslik” fakultetini tamomlagan.
Mehnat faoliyatini 1976-yildan Farg‘ona viloyat sudining kotibi vazifasidan boshlagan. 1979-1983-yillarda Farg‘ona shahar 1-sonli Davlat notarial idorasining notariusi, 1983-1987-yillarda Farg‘ona viloyat Adliya boshqarmasi boshlig‘ining o‘rinbosari, 1987-1990-yillarda Farg‘ona viloyat partiya qo‘mitasining yo‘riqchisi, 1990-1999-yillarda Farg‘ona viloyat Adliya boshqarmasi boshlig‘ining birinchi o‘rinbosari, 1999-2001-yillarda Farg‘ona viloyat sudining sudyasi, 2001-2004-yillarda Farg‘ona shahar sudining raisi, 2004-2008-yillarda O‘zbekiston Respublikasi Oliy sudining sudyasi, 2008-2013-yillarda Farg‘ona viloyat sudining raisi, 2013-2017-yillarda Farg‘ona yuridik kollejining o‘qituvchisi vazifalarida ishlagan.
Maxmudova Robaxon Anvarovna 2017-2020-yillarda Farg‘ona viloyati Xalq qabulxonasi mudiri, 2020-yil yanvar oyidan Oliy Majlis Senatining Fan, taʼlim va sog‘liqni saqlash masalalari qo‘mitasi raisi lavozimlarida faoliyat olib borgan.
2020-yil 13 iyuldan hozirga qadar O‘zbekiston Respublikasi Oliy sudi raisining birinchi o‘rinbosari – maʼmuriy ishlar bo‘yicha sudlov hayʼati raisi lavozimida ishlab kelmoqda.
Maxmudova Robaxon Anvarovna faoliyati davomida mamlakatimizda odil sudlovni amalga oshirish, sud tizimini isloh etish, sudlar mustaqilligini taʼminlashga oid islohotlarning faol ishtirokchisi hisoblanadi. Jinoiy jazolarni liberallashtirish, jazo tayinlashda adolatni taʼminlashga oid bir qator Oliy sud Plenumi qarorlari muallifi.
Maxmudova Robaxon Anvarovna tajribali huquqshunos sifatida qonun ustuvorligini taʼminlash, xotin-qizlarning huquqlarini himoya qilish, yarashuv institutini takomillashtirish borasida samarali faoliyat yuritib kelmoqda.
Maxmudova Robaxon Anvarovna 140 dan ortiq ilmiy va ommabop maqolalar, sudyalar uchun 10 ga yaqin uslubiy qo‘llanmalar muallifi hisoblanadi.
2020-yilda “Fidokorona xizmatlari uchun” ordeni bilan taqdirlangan. Birinchi malaka darajali sudya.
Maxmudova Robaxon Anvarovna oilali, ikki nafar farzandi bor. Turmush o‘rtog‘i T.Maxmudov – pensiyada.