Hukumatning vazifasi “sms” yuborishdan iboratmi?

Oʼzbekistonda bir necha kundan buyon oʼta yuqori havo harorati kuzatilmoqda. Bunday holatlarda oddiy aholi uchun Oʼzbekiston hukumati qanday himoya chora-tadbirlarini amalga oshirdi? Yozning jazirama issigʼida jamoat transportlarida sovitgichlar qoʼyilishi nazarda tutildimi? Аslo yoʼq! Quruvchilar, haydovchilar, obodonlashtirishda aynan koʼchada ishlovchi xodimlar, jamoat transportlarida faoliyat koʼrsatuvchilarni issiqdan himoyalash haqida hech bir yangilik eshitmadim. Yana kamiga shunday jaziramada avtomobil egalarining oʼz shaxsiy mulklarini “tonirovka” qildirishlari ham pulli qilib qoʼyilganini nima deb atash mumkin? “Oʼzing uchun oʼl yetim” deylikmi yoki “Oʼzingniki oʼzagingni oʼrtarkan” deymizmi ... Yoki hukumatning vazifasi faqatgina telefonimizga anomal issiqdan oʼzimizni ehtiyot qilishimiz kerakligi haqidagi xabarni joʼnatib qoʼyish bilan cheklanganmi?!

Bu mazmundagi xabarlarni oʼqib Oʼzbekistonda xizmat koʼrsatgan artist, soʼz ustasi Xojiboy Tojiboevning “Аna, kuyding” degan mashhur jumlasini eslayman. Byudjet uchun ortiqcha yuk boʼladi, dersiz lekin joylarda uyushtirilayotgan kerak-nokerak madaniy tadbirlarga kichkina mablagʼ ajratilmayabdi. Bir oyda kamida 4-5 marta oʼtkaziladigan bunday tadbirlarning har biriga oʼrtacha 30-40 million soʼmlar atrofida pul sarflanadi. Bu esa har bir tadbir mablagʼiga 10-15 ta, bir oyda esa 50-60 ta jamoat transporti uchun sovitgichlar olish mumkin degani. Tadbirlar uchun moʼljallangan mablagʼlarni jamoat transportiga yoʼnaltirib boʼlmaydigan rasmiyatchiliklar ham yoʼq emas. Shuning uchun Moliya vazirligidan tortib quyi moliya boʼlimlarigacha, nafaqat iqtisod sohasi bilimdonlarini, balki mantiqan va sogʼlom fikrlay oladigan soha egalarini ishga olish tizimini yaratish kerak.

Umuman, barcha sohalarda malakali kadrlar yetishmovchiligi eng ogʼriqli nuqtalarimizdan ekanligi ayon boʼlib turibdi.

Аygul PERNEBEKOVА,

Oʼzbekiston “Аdolat” SDP

Mirzo Ulugʼbek tumani Kengashi raisi