Ulkan marralarni zabt etish uchun qanot va uygʼoqlikka chorlov

06.07.2021 05:07:34

Insoniyat jismi sogʼlom boʼlishi uchun kunda uch mahal ovqatlanishni odat qilgani kabi ruhiyati sogʼlom boʼlishi uchun maʼnaviyatga oshno boʼlishi, kitob oʼqishga odatlanishi muhim. Yosh bola ulgʼayishi uchun uni oʼz vaqtida ovqatlantirib, jismini turli xastaliklardan asrab, parvarishlaymiz. Nega endi uning ruhiy kamoloti haqida qaygʼurmaymiz? Unga odob oʼrgatib, tarbiya berish, maʼnaviyati yuksalishi uchun harakat qilish, xususan, kitobga, ilm-maʼrifatga oshno qilish bu boradagi zaruriy ishlarimizdan boʼlishi darkor.

Bugun shiddat bilan rivojlanayotgan davr har kuni bizning oldimizga yangi vazifalar va ularni hal etish shartlarini qoʼymoqda. Davlatimiz rahbarining Yoshlar kuni munosabati bilan yoshlar va talabalar ishtirokida boʼlib oʼtgan forumida soʼzlagan nutqlari biz yoshlarga yanada ulkan marralarni zabt etish uchun qanot bagʼishlash bilan birga, uygʼoqlikka, hushyorlikka chorladi.

Davlatimiz rahbari forumda bugungi yoshlarning odob-axloqi, yurish-turishi, madaniy saviyasi haqida ham alohida toʼxtaldi. Yoshlar oʼrtasida qayd etilayotgan jinoyatchilik, giyohvandlik, ichkilikbozlik, oilaviy ajralishlar, buzgʼunchi va radikal oqimlar taʼsiriga tushish holatlari davom etayotgani jiddiy muammo ekanligini kuyunib gapirdi.

-Birgina joriy yilning 5 oyi davomida 7 mingdan ziyod yoshlar jinoyat sodir etgani, hozirgi vaqtda qariyb 40 ming nafar yosh profilaktik hisobda turgani xavotirimiz bejiz emasligini koʼrsatmoqda - deydi Prezidentimiz oʼz soʼzida.

Darhaqiqat, davr keskin surʼatlar bilan oʼzgarib bormoqda. Ijtimoiy hayotimizda koʼplab ijobiy jarayonlar bilan birga, yosh avlodning qalbi va ongini egallashga qaratilgan maʼnaviy tahdidlar ham tobora xavfli tus olmoqda. Bunday murakkab vaziyatda yoshlarni zararli taʼsirlardan asrash, doimo hushyor va ogoh boʼlib yashash lozimdir. Yosh avlodning Vatanimizga, mustaqillik gʼoyalariga muhabbat va sadoqat ruhida tarbiyalash, ularning isteʼdod va qobiliyatini, ezgu intilishlarini roʼyobga chiqarish yoʼlida boshlagan katta ishlarimizni bundan buyon ham qatʼiyat bilan davom ettirish zarur.

Xalqimizning muqaddas qadriyatlari, timsollari va tabarruk qadamjolariga bepisand munosabatda boʼladigan kimsalarga nisbatan jazo choralarini yanada kuchaytirish borasida davlatimiz rahbari tomonidan bildirilgan fikrlarni toʼliq qoʼllab-quvvatlayman. Bunday buzgʼunchi ishlarning oldini bugun olmasak, ertaga kech boʼladi.

Ijtimoiy tarmoqlarda shu kabi xunuk holatlar haqida har kuni “aylanaversa” yoshlar ongiga odatiy holdek yozilib qoladi. Va ulardan andoza olganlar safi ham kengayib boraveradi. Shuning uchun ham Yurtboshimiz taʼbiri bilan aytganda mamlakatimiz yoshlariga mutlaqo yarashmaydigan salbiy koʼrinishlarga, jamiyatimizda mutlaqo oʼrin boʼlmasligi kerak. Bunday zamonamiz “qahramonlari” oxirini oʼylamay qilgan harakatlari uchun kechirilmas va qatʼiy jazo muqarrarligini anglab yetishlari zarur.

 

Аsqar XOLIQOV,

Oʼzbekiston “Аdolat” SDP Samarqand viloyat Kengashi raisi oʼrinbosari

Ulashing!

Fikringizni qoldiring

Iltimos javobingizni kiriting

+