Salovoldi dastur

OʻZBEKISTON “ADOLAT” SOTSIAL-DEMOKRATIK PARTIYASI SAYLOVOLDI DASTURI

ADOLAT - HAR BIR INSON UCHUN!

 MUQADDIMA

 

Siyosiy maydonda xalqchil va hayotiy gʻoyalari bilan oʻz oʻrni va obroʻsiga ega boʻlgan Oʻzbekiston “Adolat” sotsial-demokratik partiyasi navbatdagi saylovlar oldidan Vatanimiz taraqqiyoti yoʻlida huquqiy demokratik, “ijtimoiy davlat” va “barcha uchun farovonlik taʼminlangan” adolatli fuqarolik jamiyatini qurishning sotsial-demokratik modelini taklif etadi. Uning asosiy qoidalari quyidagilardan iborat:

- inson, uning huquqlari, erkinliklari va qonuniy manfaatlari davlat va jamiyatning eng yuksak qadriyatlari ekanligini tan olib, jamiyat va davlat hayotining barcha jabhalarida har bir insonni farovon hayoti uchun zarur shart-sharoitlar yaratish, ijtimoiy adolat va qonun ustuvorligi mezonlarini taʼminlash;

- Oʻzbekistonning erkinlik, imkoniyatlar tengligi, adolatlilik, birdamlik, ijtimoiy himoya va masʼuliyat tamoyillari hukmronlik qiladigan, insonlarning keskin tabaqalanishiga yoʻl qoʻyilmaydigan kuchli “ijtimoiy davlat” sifatida, aholining yuqori turmush darajasiga ega rivojlangan davlatlar qatoriga qoʻshilishiga erishish;

- “xalq davlat organlariga emas, balki davlat organlari xalqqa xizmat qilmogʻi kerak” gʻoyasi davlat siyosatining ustuvor yoʻnalishi ekanligini taʼkidlab, xalq hokimiyatining timsoli boʻlmish vakillik demokratiyasi institutining roli va ahamiyatini yanada oshirish; 

- mamlakat iqtisodiyotining barqaror rivojlanishini taʼminlash, jamiyatning innovatsion, intellektual salohiyati va inson kapitalini rivojlantirish;

- partiyaning asosiy elektorati hisoblanmish ishchi va mehnatkashlar, yuqori malakali mutaxassislar, byudjet sohasi xizmatchilari, pedagoglar, shifokorlar, ilmiy va injener-texnik xodimlar, xizmat koʻrsatish sohasi xodimlari va boshqa xayrixohlar manfaatlarining samarali himoyasini taʼminlash;

- har bir inson farovonligining garovi boʻlmish tinchlik va xavfsizlikni taʼminlash, fuqarolik totuvligi, millatlararo va dinlararo bagʻrikenglikni mustahkamlash, muvozanatli, oʻzaro manfaatli va konstruktiv tashqi siyosat olib borish.

Partiya elektoratimiz va saylovchilarimiz ehtiyojlari va orzu-umidlariga asoslangan holda, oʻtmish saboqlaridan toʻgʻri xulosa chiqarib, mamlakatimizning kelajak avlodi oldidagi masʼuliyatni his etib, kelgusi besh yillik uchun quyidagi ustuvor vazifalarni olgʻa suradi.

HUQUQIY-IJTIMOIY DAVLAT QURISH – PIROVARD MAQSADIMIZ

Asosiy tamoyilimiz – adolat hamma yerda va har bir inson uchun! Qonun va adolat ustuvorligiga erishish – harakatlarimiz mezonidir!

Adolatning qaror topishida sud hokimiyatining oʻrni katta. Biz sud hokimiyati mustaqil, sudlar esa adolat qoʻrgʻonlari boʻlishi tarafdorimiz.

Biz Oliy sud, Inson huquqlari boʻyicha milliy markaz va boshqa manfaatdor tashkilotlar bilan hamkorlikda sud-huquq tizimidagi islohotlar natijasini, ayniqsa, sohada aholining noroziligiga sabab boʻlgan omillarni tanqidiy oʻrganib boramiz va shu orqali amaldagi qonunchilikni takomillashtirish yuzasidan aniq takliflar tayyorlaymiz.

Biz sud tizimini kompleks rivojlantirish, sudlarning mavqeini oshirish, sudyalarning daxlsizligini taʼminlash adolatli jamiyat qurishning muhim sharti, deb hisoblaymiz.

Biz insonlar sarson boʻlishiining oldini olish va sud faoliyati sifatini oshirish maqsadida amaldagi “Sudlar toʻgʻrisida”gi qonunni takomillashtirish orqali fuqarolik, jinoiy, iqtisodiy va maʼmuriy ishlar boʻyicha tuman, shahar va viloyat sudlari negizida umumiy yurisdiksiya sudlari tashkil qilishni, ularga “xalq sudlari” maqomi berishni, viloyat va unga tenglashtirilgan sudlarga nazorat instansiyasi vakolatini yuklash taklifini beramiz.

Maʼlumki, inson huquqlarini taʼminlash va uni munosib himoya qilishda advokatura institutining oʻrni va roli beqiyos. Shu bois, biz advokatlarning maqomini yanada koʻtarish, ularni ijtimoiy himoya qilish mexanizmlarini kuchaytirish, har bir advokat malakali huquqiy xizmat koʻrsatishi uchun zarur choralarni koʻrishi, bu boradagi amaldagi qonunlar ijrosi yuzasidan kuchli va samarali nazorat oʻrnatish, sud jarayonida advokatura va prokuratura huquqlari tenglik prinsipini taʼminlash uchun kurashamiz.

Amaldagi qonun hujjatlariga muvofiq sud qarorlarini ijro qilish vakolati prokuratura va ichki ishlar organlariga berilgan boʻlib, bu holat xalqaro talablarga javob bermaydi. Qolaversa, jazo oʻtayotgan shaxslar taʼqib qiluvchi organlar qoʻlida boʻlmasligi lozim. Shu munosabat bilan, biz barcha ijro bilan bogʻliq vakolatlarni va jazoni ijro etish muassasalarini surishtiruv hamda tergov vakolatiga ega boʻlmagan, xolis organ – adliya idoralari boshqaruviga berishni maqsadga muvofiq, deb bilamiz. Shunda surishtiruv va tergovdan noroziliklar barham topadi, har qanday noqonuniy xatti-harakatlarning, qiynoq va tayziqlarning oldi olinadi, ijro jarayonida inson huquqlari taʼminlanadi.

Biz huquqni muhofaza qiluvchi organlarning jamoatchilik oldida hisobot berib borish tartibini qoʻllab-quvvatlaymiz va uning shaffofligini yanada oshirish choralarini koʻramiz.

Har bir fuqaroning jinsi, irqi, millati, tili, dini, ijtimoiy kelib chiqishi, eʼtiqodi, shaxsi va mavqeidan qatʼi nazar, qonun oldida tengligini taʼminlash, fuqarolarning konstitutsiyaviy huquqlari, qonuniy manfaat va erkinliklarini himoya qilish davlat hokimiyatining barcha tarmoqlari, eng avvalo, davlat boshqaruvi va ayniqsa, huquqni muhofaza qilish organlarining birinchi darajali vazifasi boʻlishi lozim.

“Propiskadan oʻtish” tizimiga yangicha yondoshish, fuqarolarimizning oʻz xohish-istaklaridan kelib chiqib, doimiy yashash joyini oʻzi belgilash huquqini taʼminlovchi huquqiy asosni bosqichma-bosqich takomillashtirib borish masalasi doimiy eʼtiborimiz markazida boʻladi.

Biz jamoat joylari tushunchasining huquqiy asosini yaratamiz, huquqbuzarliklarning oldini olish tizimini, jinoyatchilikka qarshi kurashish va jamoat tartibini saqlash boʻyicha ichki ishlar tizimining faoliyatini tubdan takomillashtirish va aholining xohish-istaklarini roʻyobga chiqarish maqsadida ularning sonini maqbullashtirish hamda “halq politsiyasi” deb nom berish, Davlat yoʻl harakati xavfsizligi xizmati xodimlarining sonini optimallashtirish va inspektorlarni chinakam “xalq yordamchilari” ga aylantirish taklifini ilgari suramiz.

Oʻzbekiston Respublikasi Bosh prokurori va unga boʻysunuvchi prokurorlarning qonunlarni aniq va bir xilda bajarilishini nazorat qilish vazifasini kengaytirish va quyi prokuratura organlariga “Xalq prokuraturasi” maqomini berish taklifini ilgari suramiz.

Bugungi kunda dastlabki tergov harakatlari Oʻzbekiston Respublikasi Bosh prokuraturasi, IIV va DXX tomonidan amalga oshirilmoqda. Dastlabki tergov organlarining tarqoqligi natijasida inson huquqlarining buzilishi holatlari yuz berayotganligi saylovchilarning haqli eʼtirozlariga sabab boʻlmoqda. Bosh prokuratura va uning quyi organlarining tergov jarayoni ustidan nazorat funksiyasi tobora pasayib bormoqda. Ushbu holatni bartaraf qilish, dastlabki tergov ustidan nazoratni kuchaytirish maqsadida, mamlakatda yagona tergov organi – Tergov qoʻmitasini tashkil etish tashabbusini ilgari suramiz.

Aholining barcha qatlamlari orasida, ayniqsa, yoshlarda korrupsiyaga qarshi murosasiz kurash madaniyatini kuchaytirishni muhim deb hisoblaymiz. Biz korrupsiya bilan kurashish nafaqat davlat organlari va huquqni muhofaza etish tuzilmalarining vazifasi, balki butun jamiyatning burchi ekanligini eʼtirof etamiz. Partiya ushbu illatni tag–tomiri bilan yoʻqotish uchun kurashadi. Bosh prokuratura bilan hamkorlikda kelgusi 5 yilda Oʻzbekiston Respublikasining korrupsiyaga murosasiz 50 ta davlat qatoriga kirishini taʼminlashga qaratilgan kompleks chora-tadbirlarni belgilab, amalga oshiramiz.

Biz jamiyatda korrupsiyaga nisbatan mutlaqo toqatsizlik madaniyatini shakllantirishga qaratilgan tizimli chora-tadbirlarni ishlab chiqamiz va keng ommaga yetkazish borasida samarali ishlarni tashkil qilamiz.

Biz davlat boshqaruvi organlari, nazorat qiluvchi va huquqni muhofaza qiluvchi tuzilmalar faoliyatida qonunchilik normalarining buzilishiga, ularning notoʻgʻri va oʻzboshimchalik bilan talqin etilishiga, shuningdek, toʻrachilik, rasmiyatchilik va korrupsiyaga qarshi keskin kurash olib boramiz. Korrupsiyaga oid holatlarning oʻz vaqtida oldini olish, ularni aniqlash va bartaraf etilishini taʼminlash, shuningdek, korrupsiyaga imkon beruvchi sabablar va shart-sharoitlarni yoʻqotish choralarini koʻramiz.

KUCHLI IJTIMOIY SIYOSAT – XALQ FAROVONLIGINING KAFOLATI

Biz “Ijtimoiy tenglik – teng huquq va teng masʼuliyat demakdir” degan tamoyilga tayangan holda jamiyatdagi ijtimoiy tenglikni taʼminlaydigan, har bir fuqaroning qobiliyati hamda malakasidan kelib chiqqan holda mehnat qilishi kafolatlanadigan, u oʻz mehnatining miqdori va sifatiga yarasha munosib ish haqi va hayot darajasiga erishishi uchun keng imkoniyatlar yaratilgan ijtimoiy davlat qurish uchun kurashamiz.

Maqsadimiz – ijtimoiy adolat tamoyilini taʼminlash. Ijtimoiy adolat – bu siyosiy qarashlari, jinsi, millati, tili va diniy eʼtiqodidan qatʼi nazar, qonun oldida barcha fuqarolarning oʻzaro tengligini taʼminlashdir. Bu – taʼlim, tibbiyot va boshqa sohalardagi imkoniyatlar tengligidir. Bu – kafolatlangan mehnat faoliyati erkinligi, mansab lavozimlari boʻyicha koʻtarilib borishdagi imkoniyatlar tengligidir. Eng muhimi, bu – keksa avlod vakillari va ijtimoiy himoyaga muhtoj fuqarolar toʻgʻrisida gʻamxoʻrlikdir.

Ilmlilik – saodatdir, ilmsizlik – musibat! Biz kuchli ijtimoiy siyosatni mamlakatimizning kelajagi buyuk boʻlishini taʼminlovchi inson kapitaliga qaratamiz. Taʼlimga investitsiya kiritish – bu kelajakka sarmoya kiritish, xalq farovonligi, davlatning raqobatdoshligini taʼminlovchi omildir. Shu bois, biz uzluksiz taʼlim tizimini muntazam takomillashtirish, sifatli taʼlim-tarbiya berish, yuqori malakali kadrlarni tayyorlash tarafdorimiz.

Biz bundan keyin ham maktabgacha taʼlim muassasalari tizimini salmoqli kengaytirish va ularda bolalarning intellektual, estetik va jismoniy rivojlanishi uchun shart-sharoitlarni tubdan yaxshilash, bolalarni maktabgacha taʼlimga qamrab olishni sezilarli ravishda oshirish borasidagi saʼy-harakatlarni davom ettiramiz. Bizning kelgusi 5 yillik pirovard maqsadimiz – bolalarni maktabgacha taʼlim muassasalariga qamrab olish darajasini ikki barobarga koʻtarishdir.

Shu bilan birga, maktablardagi maʼnaviy-tarbiyaviy ishlarni yangicha asosda tashkil etish, “Milliy gʻoya”, “Odobnoma”, “Dinlar tarixi”, “Vatan tuygʻusi” kabi fanlarni birlashtirgan holda, yagona – “Tarbiya” fanini joriy qilishni qoʻllab-quvvatlaymiz. Biz maktablarga buyuk allomalar, davlat va siyosat arboblari, mashhur sarkarda ajdodlarimizning nomlarini berish tarafdorimiz.

Umumiy oʻrta taʼlim sifatini tubdan yaxshilash, umumtaʼlim maktablarni haqiqiy bilim maskanlariga aylantirish, bolalar sporti hamda musiqa va sanʼat maktablarini son va sifat jihatdan yangilash, bolalarning mutolaa madaniyatini rivojlantirish masalalari ham doimiy eʼtiborimiz markazida boʻladi.

Biz oʻqituvchilar huquqiy maqomini yanada koʻtarish, ularning ish haqi va ijtimoiy mavqeini oshirishga qaratilgan tashkiliy-huquqiy chora-tadbirlarni amalga oshiramiz va shu maqsadda “Oʻqituvchining maqomi toʻgʻrisida” alohida qonun qabul qilishni taklif qilamiz.

Taʼlim olish va uning sifatini oshirish strategiyasini qabul qilish, amaldagi qonunlar, qarorlar, koʻrsatmalar va boshqa meʼyoriy hujjatlarni tizimlashtirgan holda, “Taʼlim toʻgʻrisidagi kodeks”ni qabul qilishni taklif qilamiz va istiqbolda butun taʼlim jarayonini muvofiqlashtiruvchi yagona huquqiy tizimni yaratamiz.

Biz oliy taʼlim tizimini tubdan takomillashtirishga qaratilgan tizimli ishlarni davom ettiramiz, oliy taʼlim sohasida davlat-xususiy sheriklikni rivojlantirish, oliy taʼlim muassasalarining moddiy-texnik bazasini takomillashtirish, ularni zamonaviy oʻquv-ilmiy laboratoriyalar va axborot-kommunikatsiya texnologiyalari (AKT) bilan taʼminlash, xalqaro taʼlim standartlariga asoslangan oʻquv-uslubiy materiallar va oʻquv dasturlari, yetakchi pedagogik texnologiyalarni oʻquv jarayoniga keng joriy qilish orqali oʻquv sifatini oshirish masalalariga keng eʼtibor qaratamiz. Davlat va nodavlat oliy taʼlim muassasalari soni va samaradorligini oshirish hisobiga oliy taʼlim bilan qamrov darajasini 2030-yilga qadar 50 foizdan oshirish, oliy taʼlim muassasalari sonini yanada oshirish borasida amaliy takliflar beramiz. Shu bilan birga, oliy taʼlim muassasalarining bosqichma-bosqich oʻzini-oʻzi moliyalashtirish tartibiga oʻtishini taʼminlashga qaratilgan normativ hujjatlarni ishlab chiqamiz.

Shuningdek, kamida 10 ta oliy taʼlim muassasasini xalqaro eʼtirof etilgan tashkilotlar reytingining birinchi 1000 ta oliy taʼlim muassasalari roʻyxatiga, jumladan, Oʻzbekiston Milliy universiteti va Samarqand davlat universitetini birinchi 500 ta oliy taʼlim muassasalari roʻyxatiga kiritish borasidagi chora-tadbirlar ustidan samarali va taʼsirchan parlament, deputatlik va jamoat nazoratini oʻrnatamiz.

Oliy taʼlim vazirligi bilan hamkorlikda 2020-yildan har bir oliy taʼlim muassasalariga davlat buyurtmasi asosida oʻqishga qabul qilish parametrlarini belgilash bilan birga, oliy maʼlumotli kadrlarni koʻpaytirish va ular oʻrtasida raqobatni kuchaytirish, oliy maʼlumotlilar soni boʻyicha mamlakat darajasini koʻtarish maqsadida oliy oʻquv yurtlariga kirish kvotalarini bosqichma-bosqich oshirib borish (bunda oʻquv yurtlari uchun umumiy qabul kvotalarini belgilash tajribasidan voz kechish), sirtqi, kechki va masofaviy taʼlim shaklini keng joriy etish choralarini amalga oshiramiz.

Bundan tashqari, pedagogika yoʻnalishidagi oliy oʻquv yurtlarini eng nufuzli taʼlim muassasalariga aylantirish, pedagoglikka moyilligi boʻlgan yoshlarni maqsadli tarbiyalab borish boʻyicha vazifalarni amalga oshirish tarafdorimiz.

Mamlakatimiz raqobatdoshligini uzoq muddatda istiqbolli taʼminlashning muhim omili sifatida biz mamlakat ilmiy salohiyatini kuchaytirish, ijtimoiy-iqtisodiy rivojlantirishda ilm-fanning rolini oshirish, innovatsion iqtisodiyotga oʻtish, ilm-fan va ishlab chiqarish hamkorligini mustahkamlashga keng eʼtibor qaratamiz. Olimlarni, ayniqsa, yosh olimlarni har tomonlama qoʻllab-quvvatlash choralarini koʻramiz.

Biz, anʼanaviy sotsial-demokratiyaning ijtimoiy adolat tamoyili va keng koʻlamli ijtimoiy dasturlarning amalga oshirilishini taʼminlaydigan kuchli davlat siyosatini qoʻllab-quvvatlagan holda, quyidagi vazifalarni ustuvor deb bilamiz:

- mehnatga haq toʻlash bilan fuqarolarning yashash minimumi xarajatlari oʻrtasidagi tafovutlarni keskin qisqartirish, “bazaviy hisoblash birligi”, pensiya va eng zarur “yashash minimumi” hamda “isteʼmol savati”ning oʻzaro mutanosibligiga erishish va minimal ish haqini bozordagi narx-navoga mutanosib ravishda oshirish;

- aholining daromadi boʻyicha keskin tabaqalanishining oldini olish va shu orqali ijtimoiy munosabatlarda barqarorlik va uygʻunlikni taʼminlash;

- taʼlim, ilm-fan, tibbiyot sohasi xodimlari hamda ziyolilarning ijtimoiy nufuzi, maqomini oshirish va ularni himoya qilishning samarali mexanizmlarini yaratish;

- byudjet sohasi xodimlari uchun byudjetdan tashqari mablagʻlar hisobidan idoraviy uy-joylar qurilishi hajmini kengaytirish, qurilayotgan uy-joylarning sifatini oshirish.

Qishloq qiyofasini butunlay yangilash, qishloq joylarida yangi uy-joylarni qurish, ijtimoiy va kommunal obyektlarni bunyod etish, kommunikatsiyani rivojlantirish, yoʻl infratuzilmasini taʼmirlash va rekonstruksiya qilish, qishloq ahlining turmush darajasi va madaniyatini oshirish boʻyicha ishlarni davom ettiramiz. Qishloq aholisini ish bilan band qilish va ijtimoiy muxofazasini taʼminlash maqsadida fermerlar qoʻl ostida ishlovchilarning haq-huquqlarini himoya qilish tizimini yaratamiz. Ish beruvchi sifatida fermerlarning va ularga yollanib ishlovchilarning oʻzaro munosabatlarini tartibga soluvchi hamda har ikki tomonning manfaatlarini himoya qiluvchi qonunlarni ishlab chiqish tashabbusi bilan chiqamiz.

Aholi salomatligi – ulkan boylik, jamiyatning barqaror rivojlanishi garovidir. Biz aholiga kafolatli tibbiy xizmat koʻrsatish, tibbiyot xodimlari mehnatini ragʻbatlantirish, zamonaviy texnologiya va davolash usullarini keng joriy qilish, sogʻliqni saqlash tizimini qayta shakllantirishni davom ettirish tarafdorimiz. 

Biz sogʻliqni saqlash sohasining xususiy sektorini barqaror rivojlanishning muhim omillaridan biri sifatida eʼtirof etish bilan birga, sogʻliqni saqlashning davlat sektorini mustahkamlash, sohada yuqori malakali xorijiy mutaxassislar sonini oshirish va xorijiy investitsiyalarni kengaytirish, kadrlar malakasini oshirish va tayyorlashni samarali tizimini shakllantirish, tibbiy xizmatlar eksportini rivojlantirishga keng eʼtibor qaratamiz. Kelgusi besh yillikda sogʻliqni saqlash boʻyicha davlat xarajatlarini umumiy davlat xarajatlariga nisbatan 15,4 foizdan 17 foizga hamda har 1000 kishiga xizmat koʻrsatuvchi shifokorlar sonini 2.45 nafardan 5 nafarga, shifoxona muassasalari sonini esa 1135 tadan 1250 taga oshirish – ushbu yoʻnalishdagi asosiy vazifalarimiz hisoblanadi.

Bizning ustuvor vazifamiz – zamonaviy, yuqori texnologiyali, samarali tez tibbiy yordam xizmatini shakllantirish choralarini koʻrish. Biz shoshilinch tez tibbiy yordam xizmatining tezkorligi xalqaro eʼtirof etilgan talablarga mos boʻlishi, uni boshqarishning axborot tizimini joriy qilish va moddiy-texnika bazasini mustahkamlash tarafdorimiz.

Biz maktablar va maktabgacha taʼlim muassasalarida bolalarga tibbiy xizmat koʻrsatish taʼminoti tizimini mustahkamlash, har bir maktabda malakali tibbiy xizmatni joriy etish, bolalarga bepul stamotologiya xizmati koʻrsatilishini taʼminlash, bolalarni bepul dori vositalari bilan uzluksiz taʼminlash, har bir bolada sil kasalini aniqlash uchun mantu sinamasi oʻtkazish, bolalar orasidagi yuqumli kasalliklarga qarshi emlashlar oʻtkazish masalalarini kechiktirib boʻlmas dolzarb vazifalar deb hisoblaymiz. Shuningdek, skrining va perinatal markazlari, ayollar tibbiy maslahatxonalari, tugʻruq komplekslari, ginekologik va patronaj xizmatlari faoliyatini doimiy yaxshilab borishni zarur, deb bilamiz. Bolalar tibbiyot birlashmalari tizimi (maktab tibbiyoti)ni tubdan yaxshilashga qaratilgan “Sogʻlom bolalik” loyihasini amalga oshirishni taklif qilamiz.

Sogʻliqni saqlash boʻyicha islohotlarni davom ettirish va yuqori darajaga koʻtarish orqali bolalar oʻlimi koʻrsatkichini har 1000 nafar tugʻilgan chaqaloqqa 2017-yildagi 18 tadan 10 tagacha, onalar oʻlimi koeffitsentini (har 100 000 tirik tugʻilgan chaqaloqqa nisbatan) esa 19,7 dan 15 tagacha kamaytirish kelgusi besh yillikdagi muhim vazifamiz hisoblanadi.

Tibbiy faoliyat ustidan davlat-sanitariya nazoratini kuchaytiramiz. Shuningdek, dorilarni vrach retsepti asosida berilishini yoʻlga qoʻyamiz hamda dorilar reklamasini cheklashga qaratilgan qonunlarni qabul qilish tashabbusi bilan chiqamiz.

“Aqlli tibbiyot” tizimini shakllantirish, tibbiyot sohasiga zamonaviy AKTlarni keng joriy etish, aholini xavfsiz dori-darmon vositalari bilan taʼminlash, ushbu yoʻnalishda deputatlik va jamoatchilik nazoratini kuchaytirish, aholining tibbiy madaniyatini oshirish boʻyicha taʼsirchan qonunchilik mexanizmlarini ishlab chiqib, amaliyotga joriy qilish choralarini koʻramiz.

Biz aholini ijtimoiy ahamiyatga ega, yuqori samarali xavfsiz dori-darmon va tibbiy vositalar bilan arzon narxlarda taʼminlash, qalbakilashtirilgan va sifatsiz dori-darmonlarning noqonuniy aylanmasiga chek qoʻyish tarafdorimiz. Nafaqat hayotiy zarur medikamentlar aylanmasi va sifati, balki chakana savdoga tushuvchi barcha dorilar ustidan qatʼiy davlat va jamoatchilik nazoratini oʻrnatishni taklif qilamiz. Bu maqsadda biz dorilarning yagona elektron bazasini shakllantirishni va unda barcha dorilarning nomi, narxi, ishlab chiqaruvchisi va savdoga chiqaruvchisi, chet eldan keltirilgan dori-darmonlar uchun esa import qiluvchining maʼlumotlarini koʻrsatadigan elektron tizimni tatbiq qilamiz. Bu tizim bilan dorilarning narxini barqarorlashtiramiz va sifatini taʼminlaymiz. Biz, shuningdek, umumiy sogʻliqni saqlash xarajatlarida dori vositalari va tibbiyot buyumlari sotib olish uchun xarajatlar ulushini 9,6 foizdan 15 foizgacha oshirish choralarini koʻramiz.

Bizning sogʻliqni saqlash sohasidagi ustuvor maqsadimiz – aholiga barcha darajada (respublika, viloyat, tuman, qishloq) yuqori texnologiyali, ixtisoslashtirilgan va malakali tibbiy xizmat koʻrsatish tizimi samaradorligini taʼminlashdan iborat. Biz kasallanish yoʻnalishlarini oʻz vaqtida aniqlash maqsadida ixtisoslashtirilgan tibbiy yordam koʻrsatish tizimiga ilmiy-tadqiqot faoliyatining oxirgi yutuqlarini faol joriy qilish tarafdorimiz.

Biz tibbiy xizmat ustidan deputatlik va jamoatchilik nazoratini kuchaytirish va aholining tibbiy madaniyatini oshirish boʻyicha taʼsirchan qonunchilik mexanizmlarini ishlab chiqib, amalda qoʻllash choralarini koʻramiz.

Biz xalq tabobatini rivojlantirishga ham alohida eʼtibor qaratamiz va ushbu sohaning huquqiy asoslarini takomillashtirib, mustahkamlab boramiz. Aholining tibbiy madaniyatini oshirish va ushbu sohada tizimli ishlarni kuchaytirish maqsadida, biz “Tibbiy madaniyatni oshirish” davlat dasturini qabul qilishni taklif qilamiz.

Biz uchun barqaror rivojlanishning yana bir muhim sharti, bu milliy farmatsevtika sanoatini qoʻllab-quvvatlash sanaladi. Bu boradagi ustuvor vazifamiz – farmatsevtika sanoatining tezkor rivojlanishi uchun qulay sharoit yaratish, farmatsevtik erkin iqtisodiy zonalarning ish samaradorligini oshirish, dorivor oʻsimliklarning sanoat plantatsiyalarini yaratish va ularni chuqur qayta ishlashni tashkillashtirish, dori vositalari va biologik faol qoʻshimchalarni ishlab chiqarishni ragʻbatlantirishga yoʻnaltirilgan.

XALQ NOMIDAN, XALQ UCHUN VA XALQ MANFAATLARI YOʻLIDA XIZMAT QILADIGAN ADOLATLI JAMIYAT QURAMIZ

Oʻzbekiston “Adolat” sotsial-demokratik partiyasi – kuchli, erkin va adolatli fuqarolik jamiyati qurish, “xalq davlat organlariga emas, davlat organlari xalqqa xizmat qilmogʻi kerak” degan gʻoya asosida xalq hokimiyati tamoyilini izchil amalga oshirish, parlamentarizmni rivojlantirish, parlament demokratiyasining zamonaviy institutlarini qoʻllab-quvvatlash, davlat hokimiyati va boshqaruvi tizimida vakillik organlarining rolini kuchaytirish – mamlakatni demokratik yangilashning muhim yoʻnalishi, deb hisoblaydi.

Mamlakatda Konstitutsiya va qonunlar ustuvor boʻlishi, qonunlarning xalqchilligi, hayotiyligi va toʻgʻridan-toʻgʻri amal qilishi ustidan parlament va jamoatchilik nazorati oʻrnatilishi, bu borada vakillik organlari demokratiyaning haqiqiy maktabiga, islohotlarni amalga oshirishda tashabbuskor va hal qiluvchi kuchga aylanishi kerak.

Biz “inson, uning hayoti, erkinligi, shaʼni, qadr-qimmati va boshqa daxlsiz huquqlari oliy qadriyat”ligi toʻgʻrisidagi konstitutsiyaviy tamoyilni fuqarolarning huquq va erkinliklarini samarali taʼminlashda zarur boʻlgan “davlat va jamiyat tomonidan inson qadr-qimmati himoya etilishi va hurmat qilinishi lozim”ligi toʻgʻrisidagi yangi tamoyil bilan toʻldirish zarur, deb hisoblaymiz.

Biz huquqiy davlat qurilishida “Maʼmuriy tartib-taomillar toʻgʻrisida”gi qonunning ahamiyati yuqori ekanligini nazarda tutib, maʼmuriy idoralarning xalqqa xizmat qilishi, fuqarolarning oʻz huquq va erkinliklarini sud orqali himoya qilinishini amalda taʼminlash maqsadida ushbu qonunni yanada takomillashtirish, uni hayotga izchil tatbiq etish mexanizmlarini aniq belgilash zarur, deb bilamiz. Bu davlat va jamiyat hayotida adolat tamoyili tantanasini taʼminlashning zaruriy shartidir.

Biz deputatning saylovchilar va partiya oldida masʼuliyatini hamda hisobdorligini oshirish, deputatlar faoliyatini xalq bilan uzviy bogʻlash choralarini koʻramiz. “Elektron parlament” va “Elektron hukumat” dasturlarini izchil amalga oshirish yoʻli bilan fuqarolar va barcha darajadagi vakillik organlari oʻrtasida doimiy muloqot va aloqalarni kengaytirib borishni dolzarb vazifa, deb bilamiz.

Biz hokimiyatning mahalliy boʻgʻinlari vakolatlarini kuchaytirish va kengaytirish – aholining hayotiy muhim muammolarini yechishda eng ishonchli va toʻgʻri yoʻl, deb hisoblaymiz. Ayni vaqtda, xalq deputatlari mahalliy Kengashlarning rolini oshirish orqali ijro hokimiyati ustidan deputatlik va jamoatchilik nazoratini oʻrnatish zarur, deb bilamiz.

Bizning maqsadimiz – ijro hokimiyati va uning organlarini inson va uning manfaatlari uchun xizmat qiladigan, farovon turmushi uchun sharoit yaratadigan, ijtimoiy masalalar bilan toʻliq shugʻullanadigan shaffof va samarali institut darajasiga olib chiqishdir.

Maʼlumki, fuqarolik jamiyatining kuchli institutlaridan biri – ommaviy axborot vositalaridir. Shuni yaxshi anglagan holda, partiya oʻzining saylovoldi dasturlarida davlat hokimiyati va boshqaruvi organlari faoliyatida oshkoralik, ochiqlik va hisobdorlik tamoyillarini hayotga keng tatbiq etish masalalarini ilgari surib kelmoqda. Partiya bundan keyin ham ushbu masalaning oʻta dolzarbligini eʼtirof etgan holda, amaldagi “Davlat hokimiyati va boshqaruvi organlari faoliyatining ochiqligi toʻgʻrisida”gi qonunni mamlakat taraqqiyotiga mos ravishda takomillashtirish, uning ijrosi yuzasidan taʼsirchan parlament va jamoatchilik nazoratini oʻrnatish, axborot sohasini yanada demokratlashtirish, soʻz va axborot erkinligini taʼminlash, bosma ommaviy axborot vositalari mahsulotlarini tarqatish sohasida raqobatni kengaytirish, ommaviy axborot vositalari xodimlarining, ayniqsa, jurnalist va blogerlarning ijtimoiy muhofazasini kuchaytirishni muhim vazifa deb biladi. Zero, shaffoflik, oshkoralik va ochiqlik – adolatli fuqarolik jamiyatining muhim shartidir.

Siyosiy erkinliklarni himoya qilish va rivojlantirish, mehnat sharoitlariga boʻlgan talablarni oshirish, jamoaviy bitimlarga, mehnat va dam olishga boʻlgan huquqlarni taʼminlash, gender teng huquqligiga erishish, davlat va ish beruvchilarning oʻz ijtimoiy funksiyalarini eʼtirof etishi, kuchli va mustaqil kasaba uyushmalari – bularning barchasi zamonaviy sotsial demokratiyaning muhim yoʻnalishlari hisoblanadi.

Maʼlumki, butun dunyo sotsial–demokratlari ishchi va mehnatkashlarning haq–huquqlarini himoya qilishda kasaba uyushmalari bilan yaqindan hamkorlik qilishadi. Shu bois, partiya kasaba uyushmalari harakatiga katta ahamiyat beradi va uni zamonaviy, sivilizatsiyalashgan bozor munosabatlarini shakllantirishda ishchi va mehnatkashlarni ijtimoiy himoya qilishning eng muhim vositasi, deb hisoblaydi. Biz uchun kasaba uyushmalari harakatini bundan keyin ham rivojlantirish va kuchaytirish – adolatli jamiyatni shakllantirishning zaruriy sharti boʻlib qolaveradi.

Maqsadimiz – yollanma ishchilarning ish beruvchilar bilan oʻzaro munosabatlarida qonunlarga rioya qilinishini taʼminlaydigan va mehnat mojarolarining oldini oladigan kuchli kasaba uyushmalarini tashkil qilishni qoʻllab-quvvatlashdir.

Demokratiya va adolatli jamiyat – bu, birinchi galda, fuqarolarning oʻzini oʻzi boshqarish organlarining rivojlangan tizimidir. Oʻzini oʻzi boshqarish instituti – bu davlat qurilishining poydevori. Biz noyob mahalla institutining yanada takomillashuviga har tomonlama yordam beramiz, uni aholini ijtimoiy himoya qilishning kuchli va mustaqil markaziga aylantiramiz.

Biz zimmamizga olgan vazifalarni bajarish, kuchli va adolatli fuqarolik jamiyatini shakllantirish yoʻlida mamlakatimiz taraqqiyotida muhim rol oʻynaydigan barcha nodavlat-notijorat tashkilotlari va fuqarolik jamiyati institutlari bilan yaqindan hamkorlik qilamiz.

Biz Fuqarolik jamiyatini rivojlantirish markazi, Kasaba uyushmalari federatsiyasi, Xotin-qizlar qoʻmitasi, Yoshlar ittifoqi, Sudyalar assotsiatsiyasi, Advokatlar palatasi, “Nuroniy” jamgʻarmasi, “Mahalla” xayriya jamoat fondi, Yozuvchilar uyushmasi, Amir Temur jamgʻarmasi va boshqa jamoat tashkilotlari bilan adolatli fuqarolik jamiyati qurishda yaqindan hamkorlik qilamiz.

AQLLI IQTISODIYOT – MAMLAKAT JADAL TARAQQIYOTINING GAROVI

Bizning maqsadimiz – raqamli texnologiyalarga asoslangan innovatsion milliy iqtisodiyotni barpo etish, “farovon davlat” qurish, aholining turmush darajasini yanada yuksaltirish, tadbirkorlikni har bir fuqaroning qobiliyati va imkoniyatini inobatga olgan holda rivojlantirish uchun shart-sharoitlar yaratish va uning rivojlanishiga gʻov boʻlayotgan byurokratik toʻsiqlarni bartaraf etish orqali mamlakatning iqtisodiy qudratini mustahkamlashdir.

Partiya ijtimoiy yoʻnaltirilgan bozor iqtisodiyoti tarafdori sifatida yuksak texnologiyali mahsulot, maʼlumotlar jadal almashinuvi texnologiyasi va virtual moliyaviy xizmatlarga tayangan raqamli iqtisodiyotning yalpi ichki mahsulot tarkibidagi ulushini 2025-yilga qadar 45% ga yetkazishni muhim vazifa deb biladi.

Biz iqtisodiy sohada respublikamizda olib borilayotgan makroiqtisodiy barqarorlikni yanada mustahkamlash, iqtisodiy oʻsish surʼatlarini davom ettirish, byudjet hamda milliy valyutamiz barqarorligini taʼminlash, bank va sugʻurta tizimlarini yanada mustahkamlash tarafdorimiz.

Biz raqamli iqtisodiyot rivojida innovatsion yondoshuvni muhim, deb bilamiz hamda taraqqiyotning barqaror davomiyligida davlatning muvofiqlashtiruvchilik faoliyati yetakchi ekanligini eʼtirof etamiz. Shu nuqtayi nazardan, barqaror iqtisodiy taraqqiyotni taʼminlash borasida quyidagi vazifalarni amalga oshirish zarur, deb hisoblaymiz:

- Oʻzbekistonda innovatsion yondashuvli raqamli iqtisodiyotga oʻtishni tashkil etish, iqtisodiyotni tarkibiy qayta qurish, uni modernizatsiya qilish, ishlab chiqarishni texnik va texnologik qayta jihozlashga alohida eʼtibor qaratish;

- innovatsion iqtisodiyotni rivojlantirish, yangi texnologiyalar bazasini yaratish, zamonaviy biznes infratuzilmalarini tashkil etishda faol ishtirok etish;

- innovatsion faoliyatning normativ-huquqiy bazasini takomillashtirish, shu jumladan, “Innovatsiyalar va innovatsion faoliyat toʻgʻrisida”gi qonunni qabul qilish;

- iqtisodiyotni eng zamonaviy ilm-fan va texnika yutuqlari, ilgʻor innovatsion gʻoyalar va bilimlar asosida rivojlantirish choralarini koʻrish;

- iqtisodiyotda sunʼiy monopoliyaga barham berish va mulkchilikning turli shakllariga asoslangan raqobatni qoʻllab–quvvatlash;

- aholini ish bilan band etish, yangi ish oʻrinlari yaratish, ishsizlikka qarshi kurashish masalalariga alohida eʼtibor qaratish;

- aholi daromadini izchillik bilan koʻpaytirish boʻyicha davlat tomonidan amalga oshirilayotgan siyosatni qoʻllab-quvvatlash;

- mamlakatimizning muhim milliy boyligi boʻlgan inson kapitalini har tomonlama koʻpaytirish hamda rivojlantirish boʻyicha ilgʻor tashabbuslarni ilgari surish;

- oʻrta va uzoq muddatli istiqbolga moʻljallangan umumdavlat indikativ iqtisodiy dasturlarini ishlab chiqish hamda amalga oshirish, yaʼni ijtimoiy yoʻnaltirilgan iqtisodiy loyiha va dasturlarning davlat tomonidan kuchli qoʻllab-quvvatlanishiga erishish;

- energiyaning mavjud barcha muqobil turlarini kompleks ravishda rivojlantirish orqali raqobatli energetika bozorini tashkil etishni ragʻbatlantirish, energiyani tejaydigan innovatsion texnologiyalarni joriy etish;

- uy-joy kommunal xizmatlari tomonidan aholiga koʻrsatilayotgan xizmatlarning optimal tarif va qiymatlarini belgilaydigan qonun hujjatlarini ishlab chiqish;

- uy-joy kommunal xizmatlar sohasiga innovatsion texnologiyalarni joriy etish va xususiy investitsiyalarni jalb etish uchun sharoit yaratish, sohaga yoʻnaltiriladigan mablagʻlarning samarali va oqilona sarflanishi ustidan deputatlar hamda jamoatchilik nazoratini oʻrnatish;

- biznesning amaldagi qonunchilikda belgilab qoʻyilgan mehnat munosabatlari, mehnatga haq toʻlash, xodimni ijtimoiy sugʻurta qilish, pensiya taʼminoti talablariga amal qilishi uchun masʼuliyatini oshiradigan huquqiy meʼyorlarni takomillashtirish va ijrosini nazorat qilish;

- intellektual mulk obyektlari (mualliflik huquqi, turdosh huquqlar, ixtiroga boʻlgan huquqlar va boshqa) huquqlari buzilishiga nisbatan davlat va jamoatchilik nazoratini kuchaytirish;

- yuqori texnologiyali mahsulotlarni eksport qilishni va ilgʻor ilmiy va texnologik ishlanmalarni qoʻllab-quvvatlash orqali milliy iqtisodiyotning jahon tizimiga integratsiyasini kuchaytirish.

Kichik va oʻrta biznes – barqaror rivojlanishning kafolatidir.

Biz barqaror iqtisodiy oʻsish va halqimiz daromadining izchil oshirishning muhim omili sifatida kichik biznesni davlat tomonidan har tomonlama qoʻllab-quvvatlash zarur, deb bilamiz. Davlat tomonidan tadbirkorlikni qoʻllab-quvvatlashning eng samarali shakllari sifatida quyidagilarga alohida eʼtibor qaratamiz:

– qulay ishbilarmonlik va investitsiya muhitini yaratishga qaratilgan qonun va boshqa normativ-huquqiy hujjatlarni qabul qilish;

– “soliq taʼtili” va soliq kreditlari, “davlat subsidiyalari va grantlari” (kichik korxonalarga soliqqa tortilmaydigan toʻgʻridan-toʻgʻri byudjetdan mablagʻ yoki boshqa turdagi moddiy resurslar ajratish) kabi soliq vositalaridan keng foydalanish;

– innovatsion korxonalar, kompaniyalar va boshqa tadbirkorlik subyektlariga davlat grantlarini ajratish.

Biz mamlakatimizning chekka hududlari va kichik shaharlarning rivojlanishini jadallashtirish, hududlar va poytaxt orasidagi keskin iqtisodiy va ijtimoiy tafovutga yoʻl qoʻymaslik maqsadida yirik kompaniyalarning markaziy boshqaruv organlarini kichik shaharlarga koʻchirish hamda kichik shaharlarning ijtimoiy va ishlab chiqarish infratuzilmasini respublika va mahalliy byudjet mablagʻlari hisobidan keng koʻlamli rekonstruksiya qilish zarur, deb hisoblaymiz va davlatning “Urbanizatsiya” dasturini qoʻllab-quvvatlaymiz.

Biz Toshkentning maʼmuriy markazini shaharning hozirgi chegaralaridan tashqariga koʻchirishni, aqlli texnologiyalar asosida shaharning yangi qismini bunyod etishni taklif qilamiz. Zero, zamonaviy yangi shaharning qurilishi – eski shaharning saqlab qolinishiga, uy-joylarning buzilmasligiga, ortiqcha sarf-xarajatlarning qisqarishiga xizmat qiladi.

Biz Oʻzbekistonda “aqlli bino, aqlli shahar” konsepsiyasini keng joriy etish tarafdorimiz. Ushbu konsepsiya energetik va moddiy resurslarni isteʼmol qilish darajasini tushirish, qurilishning insonlar salomatligi va atrof-muhitga boʻlgan salbiy taʼsirini kamaytirish, shaharlarning “yashil belbogʻlari”ni kengaytirish va himoya qilish, toza chuchuk suv manbalarini muhofaza qilish, shaharni rejalashtirish ishlariga yondashuvni tubdan oʻzgartirish, tabiatning sanoat korxonalari tomonidan ifloslanishini kamaytirish, chang va zaharli moddalarni koʻp yutuvchi dov-daraxtlar koʻlami va turini oshirish, shaharlar va sanoat korxonalari atrofida yashil maydonlar barpo etish kabi chora-tadbirlarni nazarda tutadi.

Inson hayotining sifati u yashayotgan atrof-muhit sharoitiga bevosita bogʻliq boʻlib, bu ijtimoiy-iqtisodiy rivojlanishning muhim koʻrsatkichlaridan biridir. Biz milliy iqtisodimizning “toʻrtinchi sanoat inqilobi” prinsiplariga oʻtishi tarafdorimiz. Ushbu dastur qayta tiklanuvchi tabiiy resurslardan foydalanish, yangi manbalarni izlab topish, bir vaqtning oʻzida tabiatga bosim oʻtkazmay turib, iqtisodiyotni rivojlantirish nuqtalarini topishga asoslanadi.

Biz mamlakat iqtisodiyotida energiyani tejovchi texnologiyalarni keng joriy qilish, qayta tiklanadigan energiya manbalariga oʻtish tarafdorimiz. Bu – tezkor rivojlanish va iqtisodiy raqobatdoshlikni oshirishning zaruriy sharti va muhim omilidir.

Biz ekologik halokatning oqibatlari bilan kurashgandan koʻra, uning oldini olgan maʼqul, deb hisoblaymiz. Biz yuqori darajali ekologik zarar koʻrgan hududlarda (Orolboʻyi, Markaziy Fargʻona hududlari) ekologik holatni sogʻlomlashtirish va tiklash boʻyicha chora-tadbirlarni koʻrish, shuningdek, cheklovchi davlat choralarini kiritish va keltirilgan zararni davlat byudjeti hisobiga qoplash uchun qonunchilik bazasini yaratamiz va masʼullarga tegishli taʼsir choralarini qoʻllaymiz.

Biz barcha ekologik muammolar yechimi va ular bilan bogʻliq fuqarolar salomatligi muhofazasi masalalarini faqatgina davlat byudjetiga yuklab qoʻyish notoʻgʻri, deb hisoblaymiz. “Ekologik ishlar” va sanksiyalar ortga qaytmas xususiyatga ega boʻlishini va sudgacha olib chiqilishini taʼminlaymiz.

Shuningdek, raqamli texnologiyalar bazasida iqtisodiyotning barcha sohalarini yangilashni koʻzlovchi “Raqamli Oʻzbekiston – 2030” Milliy dasturini ishlab chiqish va amalga oshirish ustuvor vazifalarimizdan biri boʻladi.

Oʻz oʻrnida sodda va barqaror soliq tizimini qoʻllash orqali “yashirin” iqtisodiyotga barham berish, muqobil energetika tizimini rivojlantirish orqali uglevodorod resurslari sarfini kamaytirish, kelgusi 10 yillikda mavjud energiya quvvatlarining kamida 30 foizini qayta tiklanuvchi energiya manbalari tashkil etishiga erishish, jahonning ilgʻor texnologiyalariga asoslangan holda milliy avtosanoatda elektr dvigatelli yengil avtomobillar, avtobus va yuk mashinalari ishlab chiqarishni oʻzlashtirish, 2030-yilga qadar ichki yonuv dvigatelli transport vositalarining kamida 30 foizini ekologik toza transport vositalariga almashtirish, davlat byudjetining ijtimoiy yoʻnaltirilishini saqlab qolish masalalarini hayotga tadbiq qilamiz.

Biz adolatli va samarali soliq hamda byudjet siyosatini amalga oshirish tarafdorimiz. Biz soliqqa tortishning progressiv stavkalarini oʻrnatish, ijtimoiy himoyaga muhtoj fuqarolarni toʻliq yoki qisman soliqdan ozod qilishni taklif qilamiz.

Biz qishloq xoʻjaligida “hayotiy va samarali” dehqonchilik tarafdorimiz. Bu borada rivojlangan demokratik mamlakatlarning ekologik toza oziq-ovqat mahsulotlari sanoatini ragʻbatlantirishning turli mexanizmlarini qoʻllash sohasidagi tajribasidan keng foydalanish, mahalliy ishlab chiqaruvchilarni qoʻllab-quvvatlashni taklif qilamiz.

Mamlakatning iqtisodiy qudrati, eng avvalo, kafolatlangan byudjetga bevosita bogʻliqdir. Biz bugungi kunda davlat daromadiga undiriladigan barcha toʻlovlar (jarimalar, davlat bojlari, yigʻimlar va boshqa majburiy undiruvlar) toʻlaligicha davlat byudjetiga tushmayotganligidan xavotirdamiz. Undiruvlarning bir qismi davlat byudjetiga tushmagan holda ayrim davlat organlariga yoʻnaltirilganligi bizni mutlaqo qoniqtirmaydi. Bunday undiruvlar faqat davlat byudjetiga undirilishi va soʻngra, qonun hujjatlariga muvofiq taqsimlanishi zarur. Aks holda, davlat bojlari va boshqa majburiy undiruvlar parlament nazorati doirasidan chetda qoladi va ayrim davlat organlari tomonidan maqsadsiz foydalanishga, ichki korrupsiyaning rivojlanishiga sabab boʻladi.

Biz tashqi va ichki turizmni (ekoturizm, agroturizm, ziyorat turizmi, sport turizmi) yoʻnalishlarini rivojlantirish, turistik xizmat koʻrsatish sifatini oshirish, madaniyatli transport xizmati koʻrsatish orqali davlat byudjetini toʻldirish lozim, deb hisoblaymiz. Turizm va xizmat koʻrsatish obyektlari (mehmonxonalar, zamonaviy axborot markazlari, oilaviy maktabgacha taʼlim muassasalari, hunarmandlar va rassomlar, sanʼatkorlar xizmatlari, kompyuter savodxonligi, kutubxonalar va yosh ijodkorlar toʻgaraklari) tashkil qilish orkali yangi ish oʻrinlari barpo etish partiyaning doimiy diqqat-etiborida turadi.

Buning uchun iqtisodiyotning muhim boʻgʻini va qon tomiri hisoblangan avtomobil yoʻllarini xalqaro andozalar darajasiga koʻtarishni, transport vositalari harakatini tartibga soluvchi yoʻl belgilarini tartibga solishni dolzarb vazifa deb bilamiz. Biz avtomobil yoʻllariga taqiqlovchi belgilar oʻrnatish masalasini faqatgina xalq deputatlari mahalliy Kengashlar qarorlari asosida ruxsat berish tizimini joriy etish taklifini kiritamiz.

YURT KELAJAGI VATANPARVAR YoSHLAR QOʻLIDA

Inson kapitali mamlakatning muhim milliy boyligidir va biz uning har tomonlama koʻpayishi va taraqqiy etishi, zamonaviy fikrlaydigan, intellektual rivojlangan, professional tayyorgarlikka ega, mamlakatimizni modernizatsiya qilish va demokratik jamiyat qurish yoʻlidagi murakkab va keng koʻlamli vazifalarni hal etishga qodir boʻlgan, yurtimiz va xalqimiz manfaatlariga sadoqatli yangi avlod kadrlarini tayyorlash masalasi prinsipial va hal qiluvchi ahamiyatga ega deb bilamiz.

Biz oʻz oldimizga sanoati yuqori rivojlangan, iqtisodiyoti fan-texnika yutuqlari va innovatsiyaga asoslangan adolatli demokratik huquqiy davlat qurishni maqsad qilib qoʻygan ekanmiz, iqtidorli kadrlarni bogʻcha yoshidan tayyorlashga, taʼlim bilan tarbiyani chambarchas olib borishga, odob-axloq qoidalarini ular ongiga singdirib borishga, maktab taʼlimini sifat va samara jihatidan yuqori darajaga koʻtarish orqali har bir oʻquvchining intellektual salohiyatini oshirish va oliy taʼlim muassasasida oʻqish imkoniyatlarini kengaytirishga, zamonaviy bilimga, keng dunyoqarashga ega malakali kadrlarni koʻproq tayyorlashga eʼtibor qaratamiz.

Shundan kelib chiqib, biz aholining oliy taʼlim bilan qamrab olinishini kengaytirish, qolaversa, taʼlim va tarbiya sohasida uzviylikni taʼminlash maqsadida quyidagi masalalarni ustuvor vazifalar sirasiga kiritamiz:

- maktabgacha taʼlim muassasalarida ovqatlantirish tizimini yangi innovatsiyalar asosida yangitdan tashkil etish. Bunda kaloriyali ovqatlar hamda miya faoliyatini yaxshi ishlashida kerak boʻladigan vitaminlarga boy oziq-ovqat mahsulotlari oʻrin olishiga alohida eʼtibor berish;

- umumtaʼlim maktablarida ijtimoiy adolat va tenglik tamoyillarining qaror topishiga erishish, erkak oʻqituvchilar sonini koʻpaytirish, sinflardagi oʻquvchilar sonini optimallashtirish, elektron oʻquv-taʼlim dasturlari va multimedia mahsulotlari miqdori va sifatini oshirish;

- umumtaʼlim maktablarning boshlangʻich sinflarida uzaytirilgan kun guruhlarini joriy qilish va oʻquvchilarni sogʻlom ovqatlantirishni tizimli yoʻlga qoʻyish;

- ijtimoiy-gumanitar yoʻnalishdagi oʻquv predmetlarini optimallashtirish hisobiga inson huquqlari predmetini joriy etish;

- kasb-hunar taʼlimining mehnat bozori bilan aloqasini yanada mustahkamlash, mutaxassislarni maqsadli tayyorlash va qayta tayyorlash tizimini takomillashtirish.

Biz oʻquv jarayonining samaradorligini oshirish, shuningdek, oʻquvchilar hamda talabalarning koʻngilli xordiq chiqarishi, sport bilan shugʻullanishi va kitob mutoalaasi uchun zarur boʻlgan vaqtni maqbullashtirish maqsadida oʻquv yilining boshlanishi muddatini qayta koʻrib chiqishni taklif qilamiz.

Shuningdek, umumtaʼlim maktablarida maktab uniformasini joriy etishni jadallashtirish zarur. Respublika boʻyicha maktab oʻquvchilari yagona formada yurishi, ular oʻrtasidagi tengsizlikning oldini olish barobarida, bolalarni intizomga, oddiylikka, samimiylikka oʻrgatadi.

Biz umumtaʼlim maktablari uchun darsliklarning yangi, zamonaviy avlodini yaratish lozim, deb hisoblaymiz hamda darsliklarni ishlab chiqishning amaldagi samarasiz tizimi oʻrniga mutlaqo yangi tizimi – “Darsliklar boʻyicha ilmiy-tadqiqot instituti” tashkil qilishni taklif qilamiz.

Bolalar asosan vatanparvarlik tuygʻularini oʻziga maktabgacha va maktab taʼlimida singdiradi. Shu sababli maktablarda bolalarning vatanparvarlik hissini uygʻotish, liderlik qobiliyatini oʻstirish va ularni jamiyat taraqqiyotiga mos ravishda tarbiyalash bizning muhim vazifamiz boʻlib qoladi.

Biz davlat yoshlar siyosatini amalga oshirishda davom etish, yoshlarni har tomonlama qoʻllab-quvvatlash, yosh avlodning huquq va erkinliklarini himoya qilish tizimini tubdan qayta shakllantirish, yoshlarning eng dolzarb muammolarini faol va samarali yechish, ularga har tomonlama yordam koʻrsatish tarafdorimiz. Biz yoshlar tashkilotlari faoliyati samaradorligini oshirish, yoshlarning uy-joy va maishiy sharoitlarini yaxshilash, davlat hokimiyati va boshqaruvi organlari rahbarlari tomonidan yoshlar bilan ochiq va doimiy muloqotni yoʻlga qoʻyish boʻyicha chora-tadbirlarni qoʻllab-quvvatlaymiz.

Bugun davlat va jamoat boshqaruviga oid koʻpgina muhim masalalarni ustoz-shogird anʼanalariga rioya qilgan holda zamonaviy va kreativ fikrlovchi, harakatchan va tashabbuskor yosh kadrlarga ishonib topshirish kerak. Zero, ular yuqori intellektual salohiyatga ega, haqiqiy vatanparvar, har qanday qiyin vaziyatda masʼuliyatni oʻz zimmasiga olishga qodir inson sifatida namoyon boʻlsin.

Biz yoshlarning huquq va erkinliklari, qonuniy manfaatlarini himoya qilib, ularni milliy va umuminsoniy qadriyatlarni hurmat qilish ruhida tarbiyalab, ularning qalbida Vatanga muhabbat va uning taqdiriga daxldorlik hissi, fidokorlik kabi tuygʻularni uygʻotib, turli mafkuraviy tahdidlardan chegaralaymiz.

Maʼlumki, har qanday davlat, millat hayotida Shaxs, Oila, Jamiyat va Davlat kabi tushuncha va qadriyatlar hal qiluvchi mazmunga ega. Barqarorlik indeksining ustuvor xalqaro reytinglari mezonlari va indikatorlari, Hayot sifati indeksi, Dunyo baxt darajasi indekslari va boshqalar asosida oila institutini rivojlantirish boʻyicha milliy indekslarni ishlab chiqish, shuningdek, tegishli xalqaro reytinglarda Oʻzbekistonning koʻrsatkichlarini izchil yaxshilash boʻyicha chora-tadbirlar majmuini ishlab chiqamiz.

Oiladagi zamonaviy jarayonlar, oilaviy munosabatlar ijtimoiy barqarorlik va jamiyat xavfsizligini taʼminlashning eng muhim omili ekanligini hisobga olib, quyidagilarni amalga oshiramiz:

- Oʻzbekiston hududida qiyin hayotiy vaziyatda boʻlgan oilaning sotsiologik portretini tuzish, ularni inqirozli vaziyatdan chiqish yoʻllarini yaratish, turmush darajasi va farovonligini oshirish boʻyicha tavsiyalar ishlab chiqish;

- umumbashariy va milliy oilaviy qadriyatlar, oilalardagi munosabatlarning tahlili asosida zamonaviy obod va funksional oila mezonlari negizida modelini tuzish, shuningdek ushbu modelni jamiyatda keng targʻib qilish va amalliyotga kiritish;

- reproduktiv salomatlik va oilaning demografik rivojlanishini uzoq muddatli rejalashtirish, “Sogʻlom oila - sogʻlom jamiyat” konseptual gʻoyani amalga oshirish.

Jamiyatning asosi va asosiy xalqasi boʻlmish oilani ayolsiz tasavvur qilish qiyin. Ayolga munosabat – millat, davlat, ertangi kun va kelajak avlodga boʻlgan hurmatni namoyon etishning asosiy mezoni hisoblanadi.

Ayolga boʻlgan hurmat – bu, eng avvalo, jamiyatimizning kelajagi hisoblangan oilani hurmat qilishdir.

Shu nuqtayi nazardan, biz jamiyatning ijtimoiy–siyosiy hayotida xotin-qizlar faolligi va rolini oshirishda davom etish, ularni ijtimoiy himoya qilishni mustahkamlash boʻyicha keng miqyosdagi islohotlarni izchillik bilan amalga oshirish tarafdorimiz.

Bugun har bir ayol passiv kuzatuvchi emas, balki mamlakatda roʻy berayotgan demokratik oʻzgarishlarning faol va tashabbuskor ishtirokchisi boʻlishi kerak. Partiya jamiyat va davlat hayotining barcha jabhalarida gender teng huquqligiga erishish tarafdori.

Biz xotin-qizlarning qonuniy huquq va manfaatlarini taʼminlash, ularning ijtimoiy hayotdagi rolini, ijtimoiy–siyosiy maqomini yanada oshirish, iqtidorli hamda yuqori malakali xotin-qizlarni davlat boshqaruvi va siyosatga faol jalb etish, ayollar va bolalarga nisbatan zoʻravonlikning oldini olish, muhojirlarning mehnat huquqlarini himoya qilishni takomillashtirish masalalariga keng eʼtibor qaratamiz.

TINCHLIKSEVAR, PROGRESSIV TASHQI SIYOSAT: MILLIY MANFAATLAR USTUVORLIGI

Biz barcha mamlakatlar va xalqaro institutlar bilan oʻzaro manfaatli va doʻstona munosabatlarni mustahkamlashga qaratilgan davlatning dinamik tashqi siyosatini qoʻllab-quvvatlaymiz, Markaziy Osiyoning amalda barqaror, har tomonlama rivojlangan va yaxshi qoʻshnichilik aloqalarini yoʻlga qoʻygan mintaqaga aylanishi tarafdorimiz.  

Bizning maqsadimiz – Oʻzbekistonning davlatlararo munosabatlarda teng huquqli va masʼuliyatli sherik boʻlishiga yordam berish. Biz davlatning mustaqilligi va suverenitetini mustahkamlash, xalqaro munosabatlarning toʻla huquqli subyekti sifatida davlatimiz oʻrni va rolini kuchaytirish, Oʻzbekistonning turli harbiy bloklarda ishtirok etmasligi tarafdorimiz.

Davlatimiz aʼzo boʻlgan BMT, SHXT, MDX, YEXHT, IHT, Turkiy tilli davlatlar hamkorlik Kengashi, boshqa xalqaro va mintaqaviy tashkilotlarning tegishli ijtimoiy va insonparvarlik dasturlari doirasida oʻzaro manfaatli xalqaro hamkorlik tarafdorimiz. Biz ijtimoiy sohada qoʻshma loyihalarni amalga oshirishda faol ishtirok etish, savdo va investitsion faoliyat uchun qulay sharoitlar yaratish, iqtisodiyotni barqaror rivojlantirish va xalq farovonligini oshirish maqsadida, transchegaraviy, transport-kommunikatsion, infratuzilmaviy va boshqa loyihalarni amalga oshirish tarafdorimiz.

Buning uchun biz:

- Oʻzbekiston Respublikasining xalqaro institutlar integratsiyalashuvi va modernizatsiyasi, xalqaro va mintaqaviy xavfsizlikning yangi tizimini shakllantirish, xususan, SHHT davlatlarining iqtisodiy, gumanitar va ijtimoiy sohalarida hamkorlikni kengaytirish boʻyicha tashabbuslarini qoʻllab-quvvatlash va amalga oshirish;

- ommaviy qirgʻin qurollarining tarqalishi, xalqaro terrorizm va ekstremizm, odam savdosi, giyohvand moddalar kontrabandasi, noqonuniy migratsiya, ekologiya muammolarini hal etishda faol ishtirok etish;

- Oʻzbekiston Respublikasi fuqarolarining, xususan, mehnat migrantlarining xorijiy mamlakatlardagi huquqlarini samarali himoya qilish choralarini koʻramiz.

Buning uchun birinchi galda Barcha mehnat muxojirlari va ularning oila aʼzolari huquqlarini himoya qilish toʻgʻrisidagi halqaro konvensiya qoidalarini mamlakatimiz qonunchiligida aks etishi va qoʻllanishi choralarini koʻramiz hamda tegishli qonun va qonunosti hujjatlari, shu jumladan, “Mehnat migratsiyasi toʻgʻrisida”gi qonunni qabul qilish tashabbusi bilan chiqamiz.

Biz Oʻzbekiston Respublikasi milliy manfaatlarini xalqaro maydonda ilgari surish maqsadida parlamentlararo hamkorlik va partiyaviy diplomatiya imkoniyatlaridan unumli foydalanish tarafdorimiz. Xususan, ilgʻor xorijiy mamlakatlarning sotsial-demokratik yoʻnalishdagi siyosiy partiya va harakatlari bilan faol hamkorlik aloqalarini oʻrnatish oldimizda turgan muhim vazifalardan biridir.

Fuqarolarimiz odam savdosi qurbonlariga aylanmasligi uchun qatʼiy choralar koʻrishni hamda odam savdosidan jabr koʻrgan hamyurtlarimizni muhofaza etishni dolzarb vazifa, deb bilamiz. Chet elga ishga va oʻqishga ketayotgan fuqarolarimizning ayrimlari din niqobi ostidagi ekstremistik, fundamentalistik, separatistik gʻoya va oqimlarning tuzogʻiga tushib qolayotganligidan kelib chiqib, biz ushbu illatlarga qarshi kurashni kuchaytirishga qaratilgan qonunchilikni takomillashtirish tashabbusi bilan chiqamiz.

Biz migratsiya sohasida yuzaga keladigan munosabatlarni tartibga solish hamda davlat, jamiyat va fuqaro manfaatlariga ijobiy taʼsir qiladigan migratsiya muammolarini hal qilish uchun kurashamiz.

Biz sotsial-demokratiyaning “Birdamlik” shioriga asosan mamlakatimizda azaldan yonma-yon yashab kelayotgan, oʻzining milliy, madaniy va diniy anʼanalariga ega xalqlarning xilma-xilligini mushtarak holda saqlash, bagʻrikenglik asosida qaror topgan millatlararo totuvlik va dinlararo hamjihatlik munosabatlarini bundan keyin ham asrab-avaylash, turli millat va elatlarning uygʻun ravishda rivojlanishi uchun barcha zaruriy choralarni koʻramiz. Biz umumbashariy balo-ofatlar – giyohvandlik, ekstremizm va zoʻravonlik, fohishabozlik, odam savdosi va boshqa illatlarga qarshi butun jamiyat bilan yakdil boʻlib, faol kurash olib boramiz.

Millatlararo va dinlararo hamjihatlik, murosa–yu madora – tinchlik va barqarorlik garovi. Biz jamiyatda “Birodarlik – urf-odat, doʻstlik – qonun!” degan ezgu gʻoyaning qaror topishi, “Xalqimizga, eng avvalo, tinchlik va xotirjamlik kerak!” degan tamoyilni izchillik bilan amalga oshirish tarafdorimiz.

Oʻzbekistonning zamonaviy Harbiy kuchlari – xalqning farovon hayoti, davlat xavfsizligi va barqarorligining ishonchli kafolatidir.

Biz milliy armiyamiz qiyofasi, harbiy imkoniyatlari, mohiyati, harbiy jamoalardagi axloqiy sharoitni tubdan isloh qilish, qoʻshinni zamonaviy va ishonchli qurol-aslaha va harbiy texnika, eng yangi oʻquv vositalari, oʻquv-moddiy baza bilan taʼminlash, qoʻshin tarkibida zamonaviy AKTni joriy qilishga qaratilgan saʼy-harakatlarni qoʻllab-quvvatlaymiz.

Biz harbiylikning qiyinchiliklarini boshidan kechirgan xizmatchilarning oilalari ham ish bilan taʼminlanishi, oʻqish, pensiya va tibbiy taʼminot sohalarida qonun bilan kafolatlangan imtiyozlarga ega boʻlishlari kerak deb hisoblaymiz. Ilgari ishlash imkoniyati boʻlmagan yoki mutaxassisligi boʻlmagani bois kam ish haqi evaziga ishlashga majbur boʻlgan harbiylarning umr yoʻldoshlari uchun pensiyalarni alohida hisoblash tartibini oʻrnatish zarur. Ularning umumiy mehnat stajiga uzoq garnizondagi butun yashash davrini kiritish, oʻsha paytdagi ish haqi miqdorini esa hudud uchun qabul qilingan oʻrtacha miqdorda belgilash masalalari ham diqqat-eʼtiborimiz markazida boʻladi.

****

Aziz vatandoshlar!

“Adolat” SDP oʻz oldiga mana shunday olijanob va ezgu maqsad-vazifalarni belgilab olmoqda. Sizning saylovlardagi faol ishtirokingiz va xohish-istagingiz bilan biz mamlakatimiz boʻylab kuchli deputatlik korpuslarini shakllantira olamiz va keyingi 5 yil mobaynida ularni hayotga tatbiq eta olamiz.  

Saylovlarda eng koʻp oʻrin egallab, yangi hukumatni shakllantirishda faol ishtirok etamiz hamda bugungi hukumat tomonidan yoʻl qoʻyilayotgan barcha xato va kamchiliklarni bartaraf etamiz.

Biz xalq nomidan, xalq uchun ishlaymiz, uning muammolarini hal qilamiz. Agar saylovlarda bizni tanlasangiz va partiyamiz koʻrsatgan nomzodlarni qoʻllab-quvvatlasangiz, biz Siz – aziz yurtdoshlarimizning tinch va farovon hayoti uchun kurashamiz!

Oʻzbekiston – bizning umumiy uyimiz. Shunday ekan, uning har bir aʼzosi erkin, adolatli, tinch va farovon yashashga haqlidir!

Adolat hayotimizning bosh mezoniga aylanishi darkor!

Bizning shiorlar:

Kuch – adolatda!

Adolat – har bir inson uchun!

Adolat bor joyda taraqqiyot bor!

Adolat – hayotimizning bosh mezoni!

Biz kvotalarsiz oliy taʼlim tarafdorimiz!

Biz qalbaki va sifatsiz dori vositalari aylanmasiga qarshimiz!

Biz malakali va bepul tibbiy xizmat tarafdorimiz!

Korrupsiyani tag–tomiri bilan quritamiz!

Korrupsiya – taraqqiyot kushandasi!

Erkinlik, adolatlilik va birdamlik uchun!