Карантин “қоғозда бору амалда йўқ”лар рўйхатига кириб қолмаслиги лозим

Мамлакатимиз аҳолиси орасида коронавирус инфекциясининг тарқалишининг олдини олиш учун республикамиздан бошқа ҳудудларда бўлиб келган барча фуқаролар 14 кунлик карантин назоратига олинмоқда. Шу кеча-кундузда коронавирус инфекцияси тарқалган мамлакатлардаги юртдошларимиз ҳам махсус чартер рейслар билан Ўзбекистонга олиб келиниб, икки ҳафталик карантинга жойлаштирилмоқда.

Барчамизга маълумки, чартер рейслар орқали олиб келинаётган юртошларимиз бўлган давлатлар орасида ҳамма ҳудудига коронавирус инфекцияси тарқамаган мамлакатлар ҳам бор. Аммо фуқароларимиз соғлиғини ўйлаб, коронавирус инфекцияси аниқланган давлатлардаги карантинга олинмаган ҳудудлардан олиб келинган юртошларимиз ҳам 14 кунлик карантинга олинди.

Аммо карантинга олинган Тошкент шаҳридан вилоятга чиқиб кетаётган юрдошларимиз ўз туман-шаҳарларида эркин ҳаракатланмоқда. Бундай хатти-ҳаракатлар якунда салбий ҳолатларга сабаб бўлиши мумкин.

Давлат Бош санитария врачи Баҳром Алматов томонидан 20 ёшли талаба қиз хорижда бўлган фуқароларнинг ўзи билан ёки хориждан келган фуқаролар мулоқотда бўлганлар билан мулоқотга киришмаса-да ушбу касалликка чалинганлигини айтиб ўтди.

Ҳукуматимиз томонидан хавфнинг таъсир кучи тўғри баҳоланиб, барча тегишли чоралар кўрилмоқда. Бугун касаллик инфекцияси кенг тарқалган мамлакатлардаги таҳлиллар шуни кўрсатмоқдаки, ҳозирги шароитда касалликни бартараф этишнинг бирдан-бир йўли кучли карантин назоратига амал қилиш ва гигиеник қоидаларни доимий қўллаш.

Коронавирус инфекцияси аниқланиб карантин эълон қилинган мамлакатлардаги ҳолат қандай?

Карантинга олинган шаҳарлар кўчаларида транспорт ҳаракати тўлиқ тўхтатилган;

аҳоли фақатгина озиқ-овқат маҳсулотларини харид қилиш учунгина уйдан чиқмоқда;

уйдан чиқканларнинг ҳар бири савдо дўконларига киришдан аввал тана ҳарорати ўлчанмоқда, қўлларини ювишлари учун антисептик воситалар ташкил эитилган;

шаҳар кўчалари, транспорт воситалари қайта-қайта дизинфекция қилинмоқда;

карантин қоидаларини бузганлар қаттиқ жазоланмоқда;

ишчилар учун масофадан туриб ишлаш шароити яратиб берилган.

Хуллас, карантин вақтида қандай чоралар кўриш лозим бўлса, барчасига риоя қилинмоқда.

Бизда-чи?

Ҳукумат комиссияси қарори билан Тошкент шаҳри карантинга олиниб, шаҳарга кириш ва чиқиш 24 март куни соат 00:01 дан тўхтатилган бўлишига қарамасдан ҳамон Тошкент вилоятидан қатнаб ишловчилар пойтахтга ошиқишда давом этмоқда. 24 март куни соат 00:01 гача Тошкент шаҳридан чиқиб кетмаган фуқароларнинг шаҳарни тарк этиши бутунлай тўхтагани йўқ.

Телевидение ва ижтимоий тармоқлар орқали болаларнинг уйда ўтирган ҳолатда дарсларини давом эттиришларига шароит яратилган бўлишига қарамай, кўп қаватли уйлар олдидаги майдончаларда болалар гавжум –  уларнинг аксарият қисми гигиеник қоидаларга амал қилаётгани йўқ.

Пойтахтимиздаги озиқ-овқат маҳсулотлари сотишдан бошқа фаолият турлари билан шуғилланадиган савдо мажмуалари фаолияти ҳам давом эттирилмоқда.

Гарчи комиссия қарорида белгиланган бўлса-да, савдо дўконлари  кириш қисмида тана ҳароратини ўлчаш воситалари ва дизинфекция тартиби ўрнатилмаган.

Одатий тўй ва йиғинлар давом эттирилмоқда.

Кўчаларда кунлик дизинфекция қилинмаган жисмоний шахсларга тегишли бўлган автомабиллар аҳолига йўналишсиз такси хизматини кўрсатмоқда.

Айрим халқ вакиллари ва масъул ташкилот ходимларининг ўзлари нарх-навони ўрганиш, расмга тушиш орқали ижтимоий тармоқларга жойлаш учун бозорларда жамоавий шаклда иш олиб боришмоқда.

Аслида-чи? Фуқароларимиз аслида қандай йўл тутишлари керак эди?

Юрдошларимиз карантин қоидаларига амал қилишлари ва ўзгаларни ҳам бу қоидани бузишига йўл қўймасликлари даркор эди. Ҳозир халқимиз бошига тушган бундай синовни енгиб ўтиш учун барчамиз бир жон, бир тан бўлиб ҳаракат қилишимиз лозимлигини вазиятнинг ўзи тақозо этамоқда.

Пойтахтдаги бир гуруҳ фуқаролар доимий яшаш жойи қайд этилган манзилларга чиқиб кетиш учун Отчопар бозори теварагида тўпланиб қолди? Бугун Тошкент шаҳридаги хавфдан қочаётганлар ўзлари билан оила аъзолари сари қандай хатарни элтишлари мумкинлигини тасаввур қилишармикан? Балки, бу инсонларнинг иммунитети юқоридир. Таҳлиллар шуни кўрсатаяптики, иммунитети юқори бўлган айрим инсонлар коронавирус инфекциясига чалинган тақдирда ҳам гриппнинг турли кўринишларида буни ўтказиб юбормоқда. Бундай ҳолатлар, албатта, нисбатан қувонарли. Аммо инфекция ташувчи бир нафар инсон уни бир ой муддатда 406 нафар одамга юқтириши ҳам таҳлилар натижасида аниқланди.

Хулоса қилиб айтганда, карантинга олинган Тошкент шаҳридан вилоятларга сўнгги кунларда чиқиб кетган фуқароларни ҳам жиддий назоратга олиш даркор. Карантин чораларини янада кучайтириш лозим. Бу борада фуқароларимиздан янада масъулиятли бўлиш талаб этилади. Назоратни ҳарбийлар зиммасига тўлиқ юклатиб, ўрнатилган қоидаларга – карантин маданиятига қатъий амал қилиш орқалигина коронавирусдан холи бўлишимиз тобора аён бўлаётир.

Фаррух АБДУҲАМИДОВ,

Халқ депутатлари

Арнасой туман Кенгаши депутати