“Конституция билимдони”: Кимлар ғолиб бўлди?

Ўзбекистон Республикаси Конституцияси қабул қилинганлигининг 30 йиллиги муносабати билан Ўзбекистон “Адолат” СДПнинг “Ватан келажаги ёшлар қўлида” лойиҳаси доирасида “Конституция билимдони” кўрик-танловининг Фарғона вилоят босқичи ўтказилди.

Танловни “Адолат” СДП Фарғона вилоят Кенгаши в.б раиси Ш.Эгамов кириш сўзи билан очиб берди. Иштирокчиларни ҳолис ва адолатли баҳолаш мақсадида фуқаролик ишлари бўйича Фарғона туманлараро суди раиси Улуғбек  Орипов  ҳакамлар ҳайъати таркибида иштирок этди.  

Танловнинг биринчи шартида иштирокчилар таълим олаётган муассасаси, туман (шаҳар) партия ташкилотларининг сиёсий-ҳуқуқий ва ташкилий тузилмаси ҳақида бадиий кўриниш, тақдимот, видеоролик тарзида ўзларини таништириб ўтдилар. Танловнинг иккинчи шартида иштирокчилар Ўзбекистон Республикаси Конституцияси ҳамда амалдаги қонун ҳужжатлари, Ўзбекистон “Адолат” СДП Устави ва Сайловолди дастурига оид саволларга зукколик ва топқирлик билан жавоб беришди.

 “Адолат”социал-демократик партияси менинг тасаввуримда” мавзусидаги учинчи шарт бўйича иштирокчилар ўзларининг эркин ижодий ишларини ҳакамлар ҳайъати ва томошабинларга тақдим этдилар. Иштирокчиларнинг шеър, эссе, тақдимот ва видеоролик, саҳна кўриниши тарзидаги ижодий ишлари танловга кўтаринки руҳ бағишлади.

Қолаверса, партиянинг келгуси фаолиятига оид таклиф ва  малоҳазаларини билдирдилар. 

Танловнинг якуний натижаларига кўра, учинчи ўринни Олтиариқ тумани вакили Муҳаммаддиёр Рўзматов, иккинчи ўринни Учкўприк туманидан Нодиржон Каримқулов ҳамда фахрли биринчи ўринни, танловнинг республика босқичида иштирок этиш ҳуқуқини Фарғона вилояти юридик техникуми ўқувчиси Дилафруз Анваржонова қўлга киритди.

Ғолиблар партиянинг “Диплом” ва эсдалик совғалари билан тақдирланди.

“Адолат” СДП Фарғона вилоят Кенгаши 

Матбуот хизмати.