Қўлинг тоза, қалбинг озода, йўлинг равон бўлсин

   Яратганнинг инсонга берган улуғ неъматларидан бири бу – яшаш бахти.

Ким қандай яшаши, ҳаёт сўқмоқларида қоқилмосдан, бес кунлик дунёда ёруғ юз билан яшаб, бахтли умр кўриши инсон боласининг онгу-тафаккури, жамиятда олган таълим-тарбиясига боғлиқдир.

   Кенг ва ёруғ олам бизга инъом  этган барча гўзалликлардан баҳро олиб, ризқини ҳалол териб, тинч ва осуда, бахтиёр ҳаёт кечиришга нима етсин.

   Лекин, инсон боласи айрим вақтларда нафс деган балонинг қулига айланиб, ҳаётига қора чизиқ, юзига доғ тушуриб олиш ҳолатлари учраб туради.

   Кейин минг афсуслар қилгани билан кеч.

Инсониятга хавф, жамиятга тўсиқ ҳисобланган коррупция балосига қарши кескин курашиш, доимо инсоният олдидаги аҳамиятли вазифа бўлиб келган.

Боболаримиз, момоларимиз асрлар давомида ҳар қандай хавфли иллатларга маънавият, маърифат орқали кескин кураш олиб борган.

   Болага кичкиналигидан ёлғон гапиришнинг зарари, тирик жониворларга зиён етказмаслик, бировнинг нарсасига кўз олайтирмаслик, уйин уйнаганда ғирромлик қилмаслик, тозалик, каттага ҳурмат, кичикга иззат кўрсатиш каби қатор эзгу амалларни уқтириб келган.

Нақл-мақоллар, эртак, афсоналар, достонлардан унумли фойдаланган, бунда китоблар асосий ёрдамчи хизматини ўтаган.

    Ҳар қандай давлатнинг  иқтисодиётини издан чиқарадиган, жамияда маънавий муҳитнинг бузилишига олиб келадиган коррупция иллатига қарши курашиш- жамиятнинг барча аъзоларидан бирдек ҳаракат қилишни талаб қилади.

Фуқароларнинг жамият ҳаётидаги фаоллиги, ислоҳотларга дахлдорлик ҳисси, давлат ҳокимияти ва бошқаруви органлари фаолияти очиқлиги, жамоат ва парламент назорати каби қатор омиллар орқали ушбу иллатнинг илдизини қуритиш мумкун.

         Мамлакатимизда коррупцияга қарши курашиш буйича ҳуқуқий асослар мустаҳкамланиб бормоқда.

       Коррупцияга қарши курашиш соҳасидаги муносабатларни тартибга солиш мақсадида “Коррупцияга қарши курашиш тўғрисида”ги (2017 йил 3 январь) қонуни ҳар бир соҳа вакили чуқур ўрганиши лозим бўлган ҳуқуқий ҳужжатларнинг биридир.

   Ушбу қонуннинг 5-моддасида коррупцияга қарши курашиш соҳасидаги давлат сиёсатининг асосий  йўналишлари сифатида куйидагилар белгиланган;

- аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш;
- давлат ва жамият ҳаётининг барча соҳаларида коррупциянинг олдини олишга доир чора-тадбирларни амалга ошириш;
- коррупцияга оид ҳуқуқбузарликларни ўз вақтида аниқлаш, уларга чек қўйиш, уларнинг оқибатларини, уларга имкон берувчи сабаблар ва шарт-шароитларни бартараф этиш, коррупцияга оид ҳуқуқбузарликларни содир этганлик учун жавобгарликнинг муқаррарлиги принципини таъминлаш.

   Кўриниб турганидек, жамиятнинг ҳар бир онгли фуқароси зиммасига вазифалар белгиланмоқда.

     2018 йилда 12 апрель куни қабул қилинган «Жамоатчилик назорати тўғрисида»ги қонун давлат органлари фаолияти устидан жамоатчилик назоратини ташкил этиш ҳамда амалга ошириш соҳасидаги муносабатларни тартибга солишда юксак аҳамият касб этмоқда.

    Қонунни ҳурмат қилиш, давлатни, ушбу давлатнинг бир бўлаги бўлган фуқароларни ҳурмат қилиш демакдир.

    Биз ҳар бир инсон қалбида қонунлар ҳурмат ва унга амал қилиш туйғусини шакллантира олсак, кўзлаган барча эзгу ниятларимизга эришиб, турли хил хавф-хатарлардан ўзимизни ва келажак авлодимизни асраймиз.

   Қўлимиз тоза, қалбимиз озода, йўлимиз доимо равон бўлиши учун, яхши ниятлар қуршовида, яхши тилаклар қилиб, яхшилар қолдирган эзгу амалларни давом этиб, ўзимиз ва фарзандларимизга бахтиёр ҳаёт ином этайлик азизлар!

  Зеро, инсон боласининг зийнати ҳисобланган гўзал фазилатларни асраш, бойитиб бориш, уларга амал қилиб яшаш, ҳар биримиз учун бахт калитидир.

Рауаж Отарбаев,

Халқ депутатлари Чимбой туман Кенгаши депутати