Сайлов натижаларига бағишланган брифинг ўтказилди

Ўзбекистон “Адолат” СДП Сиёсий Кенгаши Марказий аппаратида сайлов натижаларига бағишланган брифинг ўтказилди. Унда партия Сиёсий Кенгаши раиси Наримон Умаров “Адолат” СДП 105 кун давомида тарихий воқеликнинг бевосита иштирокчиси ва гувоҳи бўлганини таъкидлади ва сайлов натижалари билан йиғилганларни таништирди.

-Партия томонидан кўрсатилган жами 24 нафар номзодимиз Олий Мажлис Қонунчилик палатаси депутатлигига сайланди. Шундай бўлса ҳам аввалги натижалар билан солиштирганда депутатлар сони бўйича энг кўп ўсишга эришган партияга айландик – деди партия раҳбари - Бундан ташқари партиялар орасида ўз ўрнини яхшилаб, юқорироқ поғонага кўтарилишга эришишга ҳам айнан “Адолат” социал-демократик партияси бўлди. Яъни депутатлар сони бўйича 4 ўриндан 3-ўринга кўтарилишга эришдик.

Мутахассислиги ва ихтисослиги бўйича ҳам сайланган депутатларнинг асосий қисмини электоратимиз вакиллари ташкил этади. Депутатларнинг 29 фоизини фан-таълим соҳаси ташкил этмоқда.

Шунингдек, депутатларнинг 16% ҳуқуқшунослар, 16% шифокорлар, 12% нафари банк, молия ва иқтисод соҳаси вакилларидир.

Депутатларимиз таркибини ёш жиҳатидан оладиган бўлсак, 12,5 % 31-40 ёшгача бўлган депутатлар, 33 % 41-50 ёшгача бўлган депутатлар,  яна 33 %  51-60 ёшгача бўлган депутатлар, 12 % 60 ёшдан ошган депутатлар ташкил этади.

Шу билан бирга Марказий салов комиссиясининг 2019 йил 15 ноябрдаги 167 фармойишига асосан, Ўзбекистон Республикаси Олий Мажлис Қонунчилик палатаси, Қорақалпоғистон Республикаси Жуқорғи Кенгеси, Халқ депутатлари вилоят, туман ва шаҳар Кенгашлари депутатлари сайловида иштирок этишини молиялаштириш мақсадида Ўзбекистон “Адолат” социал-демократик партияси ҳисоб рақамига жами 9 014 968 000 сўм маблағ ўтказиб берилди.

Ушбу маблағларнинг 7955102335,45 сўми номзодлар тарғибот воситаларини чиқаришга, уларнинг оммавий ахборот воситаларида чиқишларини ташкил этишга, номзоднинг қонунчиликда белгиланган сарф-ҳаражатларига йўналтирилди.

Ишлатилмай қолган 1 059 865 664, 55 сўм маблағ бюджетга қайтарилган. 

Партиянинг эндиги вазифаси сайловолди берган ваъдалари ижросини таъминлашдир. Наримон Умаровнинг айтишича, янги парламентда “Адолат” СДП фракциясининг қабул қиладиган илк қонун лойиҳаси бу шифокорларни тажовуздан ҳимоя қилишга қаратилган ҳамда инсон органлари трансплатацияси тўғрисидаги қонун лойиҳалари бўлади.

Партия раиси сайлов жараёнида “Адолат” СДП фаолиятини ёритган оммавий ахборот воситалари вакилларига миннатдорчилик билдирди.

“Адолат” СДП Матбуот хизмати