Президент ташрифи: ҳар бир соҳага чуқур муносабат

19.03.2021 13:03:45

Тошкент вилоятининг Қуйи Чирчиқ туманидаги “ТСТ Rice” номли  масъулияти чекланган жамиятда шоли етиштириш ва уни чуқур қайта ишлаш бўйича тўлиқ саноат занжири яратилган. Ўтган йили 2,6 минг гектардан ортиқ ерда “Лазурний”, “Искандар”, “Мустақиллик”, “Нукус” навларидан мўл ҳосил етиштирилган.

Илгари шоликорлар фаолияти тарқоқ бўлгани учун шолини қайта ишлашда кўплаб муаммоларга дуч келинарди.

Сўнгги йилларда қишлоқ хўжалиги маҳсулотларини етиштириш, экспортни ошириш, соҳага замонавий технологияларни татбиқ этиш ҳамда сув ресурсларидан оқилона фойдаланишга алоҳида эътибор қаратилмоқда. Бироқ, бугунги кунда тобора кучайиб бораётган сув тақчиллиги, аҳоли ўсиши ҳамда бошқа инсон таъсири билан боғлиқ омиллар сувни кўп истеъмол қиладиган экинларни етиштиришга сувни тежайдиган технологияларни жорий этишни тақозо этмоқда.

“ТСТ Rice” мажмуаси жойлашган майдон ҳам илгари ташландиқ жой эди. 27 миллиард сўмликдан зиёд лойиҳа туфайли ушбу 6 гектар ҳудудда замонавий мажмуа барпо этилди. У хирмон майдони, умумий сиғими 15 минг тонналик 2 та ёпиқ омбор, шолини тозалаш ва қуритиш цехи ҳамда қайта ишлаш заводини ўз ичига олган. 

Шолини тозалаш ва қуритиш цехи тўртта линия билан жиҳозланган. Уларнинг ҳар бири ёрдами бир сменада 120 тонна шолини қуритиш мумкин. Бу ерда бошқа дуккакли маҳсулотларни тозалаш ва қуритиш ҳам мумкин. Яна бир эътиборли жиҳати, мазкур цех кўмирда ишлайди.

Шолини қайта ишлаш заводи Туркиянинг “Yashar Makina” компанияси ускуналари билан жиҳозланган. Улар ёрдамида энг юқори навдаги гуруч маҳсулотлари ишлаб чиқарилади. Чунки “ақлли” ускуналар гуручни нафақат катта-кичиклиги, балки ранги бўйича ҳам саралайди. 

Ҳозирги пайтда завод бир йилда 40 минг тонна маҳсулотни қайта ишлаш қувватига эга. Истиқболда режалаштирилган иккинчи босқич ҳам ишга туширилгач, корхона қуввати икки баробарга ортади. 

Бу ерда замонавий лаборатория ҳам бор. Бу ерда қабул қилинаётган шолининг намлиги, қуритиш ва қайта ишлаш жараёнлари, шунингдек, гуруч маҳсулотларининг сифат кўрсаткичлари доимий назорат қилиб борилади. 
“Даладан дастурхонгача” тамойили асосида иш юритаётган шоличилик кластерида жорий йилда ҳосилдорликни 60 центнердан ошириш, хорижга 100 минг АҚШ доллари миқдорида гуруч экспорт қилиш режалаштирилган.

- Мана, инсон ҳуқуқлари деймиз. Энг катта ҳуқуқлардан бири - иш билан таъминланиш. Бизнинг ҳамма ҳаракатларимиз шунга қаратилган. Одамларни ишли қилсак, аҳоли жон бошига даромадни кўпайтирсак, сотиб олиш қобилияти ошса, бошқа ҳамма ҳуқуқлар ўзи жой-жойига тушади. Шунинг учун Тошкент вилоятини ишсизлик минимал даражада бўлган ҳудудга айлантирмоқчимиз. Вилоятда бунинг учун ҳамма шароит бор, - деди Шавкат Мирзиёев, - деди “ТСТ Rice” корхонасига ташрифи давомида. 

Асосий эътибор экспортни кўпайтириш, янги бозорларни ўзлаштиришга қаратилмоқда. Хусусан, келгуси йили гуруч экспортини 500 минг АҚШ долларига етказиш мўлжалланган. Бундан ташқари, “ТСТ Сluster” кластерининг 2021-2023 йилларга мўлжалланган тўрт босқичли лойиҳаси доирасида 114 миллион долларлик тайёр тўқимачилик ва тикувчилик маҳсулотлари экспорт қилиниши кўзда тутилган.

Шу ерда вилоят қишлоқ хўжалиги ва тўқимачиликни ривожлантириш бўйича лойиҳалар тақдимоти ўтказилди.

Очиғи, бугун Президентимизнинг талаби ўзгача. Шунга монанд партиямиз ташаббус кўрсатиб, депутатларимиз фидоийлик кўрсатса, сайловчилар ва жамоатчилик олдидаги нуфузимиз янада баланд бўлади.

 

Нурбек МИРЗАКУЛОВ,

Олий Мажлис Қонунчилик палатаси депутати  ижрочи котиби

Улашинг!

Фикрингизни қолдиринг

Илтимос жавобингизни киритинг

+