Филиппиндаги вулқоннинг заҳарли гази туфайли аҳоли ўз уйларини тарк этмоқда

Филиппиндаги Таал вулқони сабаб ҳавога тарқалган олтингугурт диоксиди туфайли Манилани қалин булут қоплади. Натижада 2000га яқин киши ўз уйларини тарк этишга мажбур бўлмоқда. Маниладан 50 километр жанубда жойлашган вулқон бир ҳафтадан буён ҳавога заҳарли газ тарқатмоқда, қалин тутун Филиппин пойтахти ва унинг атрофини эгаллаб олди. Бу ҳудудда яшовчи 300 мингдан ортиқ одам учун хавфли, дея ёзмоқда "India Times" нашри.

Вулқон кўл ўртасида жойлашган. Кўл яқинидаги қишлоқларнинг камида 2400 аҳолиси узоқроқ жойларга, ота-оналари ва бошқа яқинлари уйига, айримлари коронавирус туфайли ёпилган мактабларга кўчиб ўтишган. Филиппин Осиёдаги пандемиянинг фаол нуқтаси ҳисобланади. Бугунга қадар 1.3 миллиондан ортиқ касалланиш ҳолати тасдиқланган.

— Хавф туфайли қишлоқларда эвакуация ишлари давом этмоқда, — деди Филиппин президенти матбуот котиби Гарри Рок.  

Таал вулқонидаги фаоллик бир неча ҳафта ичида хавфли портлашларга олиб келиши мумкин. Ҳукумат вакилларининг айтишича, уйларини тарк этаётган одамларнинг бир жойда тўпланиши COVID-19 вирусининг қайта тикланишига олиб келиши мумкин.

Маълумот учун, 1965 йилда Таал вулқони отилганида ҳудудда яшовчи 200 дан ортиқ одам вафот этган.