Қозоғистонда Миллий геология хизмати ташкил этилади

Қозоғистон Экология, геология ва табиий ресурслар вазирининг биринчи ўринбосари Сериккали Брекешев янги ташкилотни ташкил этиш режасини маълум қилди, деб хабар бермоқда «Казинформ» агентлиги.

«Республика геология маълумотлари маркази «Казгеоинформ» базасида Миллий геология хизматини ташкил этиш режалаштирилмоқда», - деди Сериккали Брекешев брифингда.

Унинг таъкидлашича, ташкилотнинг асосий вазифаси геология-геофизикага тааллуқли  маълумотларни таҳлил қилиш ва инвесторлар учун сифатли маълумотларни тақдим этишдан иборат, шунингдек конларда давлат геология тадқиқотларини ўтказиш ҳамда  истиқболли инвестиция лойиҳалари қабул қилинишида тавсиялар ишлаб чиқиш бўлади.

Бундан аввал Брекешев илк бор 135 та углеводород хомашёси конлари, 99 та ерости сув ҳудудлари, 224 та қаттиқ фойдали қазилмалар кони, жкмладан 94 та олтин, 14 та мис, 19 та  марганц рудаси, 16 та темир рудаси, тўртта яримметаллар аниқланган конлар давлат балансига олинганини маълум қилган эди.

ЎзА