Сурия учун 5,5 миллиард евро ваъда қилинди

Европа Иттифоқи, Aмерика Қўшма Штатлари ва бошқа ўнлаб давлатлар Сурияга реконструкция учун беш ярим миллиард евро маблағ ажратишини маълум қилди. Бундан кўзланган мақсад мамлакат уруш натижасида дуч келган гуманитар ва иқтисодий инқирозни бартараф этиш, қочқинларни қабул қилаётган қўшни давлатларга ёрдам беришдан иборат.

Келишув Бирлашган Миллатлар Ташкилоти ва ЕИ томонидан ўтказилган йиллик конференциянинг сўнгги кунида амалга оширилди. Йиғилишда Сурия билан боғлиқ можаро ҳеч қандай сиёсий ечимсиз 11 йилдан буён давом этиб, борган сари хавфли тус олаётгани қайд этилди. Иштирокчилар ҳолат юзасидан ўз муносабатини билдиришди ва якунда бир қарорга келишди.

ЕИ Инқирозларни бошқариш бўйича комиссари Янез Ленарчичнинг баёнотига кўра, Сурияга кўмак учун алоҳида грантлардан ташқари, молия институтлари ва донорлардан 6 миллиард евро миқдорида қарз олинади. Жорий йилда 3,7 миллиард евро ажратилиши кераклиги эълон қилинди.

«Сурияликлар тинчлик, эркинлик, адолат ва иқтисодий истиқбол истаб кўчаларга чиққанига ўн йилдан ошди. Афсуски, бу талаблар ҳануз қондирилмаган, мамлакат тартибсизлик гирдобида», – дейди ЕИ ташқи ишлар ва хавфсизлик сиёсати бўйича олий вакили Жозеп Боррел.

Анжуманда БМТ Сурияга 4 миллиард доллардан кўпроқ маблағ зарурлигини таъкидлади. Ватанидан чиқиб кетган 6 миллионга яқин суриялик учун яна 5,8 миллиард доллар сўралган.

БМТ маълумотига кўра, мамлакатда 13 миллиондан зиёд киши, яъни урушгача бўлган аҳолининг ярмидан кўпи ёрдамга муҳтож. Ушбу кўрсаткич ўтган йилга нисбатан 20 фоизга ортган.

маълумот: УзА