Коррупцияга муросасизликда янги тизим

Жамият пайдо бўлган даврдан  бошлаб инсонлар  ўртасидаги манфаатлар тўқнашувининг вужудга келиши коррупция келиб чиқишининг асосий омили саналади.

Ўтган йиллар давомида жаҳондаги иқтисодий инқирозлар ва  иқтисодий хавфсизликка бўлаётган таҳдидлар  инсонлардаги ҳуфиёна даромад орттиришга қаратилган ҳаракатларнинг сиёсий тус олганлигини кўрсатди.  

Бу эса ўз навбатида кишилардаги ўзаро манфаатлар уйғунлигининг бирлашиши, коррупциянинг келиб чиқишига ва жамиятнинг емирилишига сабабчи бўлмоқда.

Коррупциянинг олдини олиш ва унинг улушини пасайтириш эса бугунги замон иқтисодий сиёсатининг ўта долзарб муаммоси бўлиб,  уни бартараф этишда нафақат давлат ва жамият, балки, халқнинг бирлиги ҳам муҳим аҳамиятга эгадир.

Шу ўринда Швецария, Финландия ва Сингапур тажрибасига назар ташласак, уларни коррупиядан ҳоли мамлакат сифатида эътироф этилиши мамлакатлар тараққиётида  давлат ҳокимияти органларининг фаолияти очиқлик ва шаффофлик билан олиб борилганлиги, бу борадаги ишлар изчил амалга оширилганлигини кўрсатади.

Давлатимиз раҳбари томонидан “Коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги фармони қабул қилиниши эса ушбу соҳани ривожлантиришда  аниқ механизмларни кўрсатиб берганлиги билан катта аҳамиятга эгадир.

Хусусан, коррупцияга оид жиноятларни содир этишда айбдор деб топилган шахсларнинг очиқ электрон реестри юритилиши ушбу жиноятни содир этган мансабдор шахслар ёки давлат хизматчиларига нисбатан бир қатор чекловларнинг ўрнатилиши,  уларни жамият олдида  ошкора кўрсатилиши,  ушбу жиноятни содир этганликдаги айдорлик ҳиссини ошириб, унинг салбий оқибатларни келтириб чиқаришга бўлган иммунитетни шакллантиришга олиб келади.

Ёки давлат хизматчилари,  уларнинг турмуш ўртоғи ва вояга етмаган фарзандларининг  даромадлари ва мол-мулкини мажбурий декларация қилиш тизимининг жорий этилиши коррупцион ҳаракатларни келтириб чиқарадиган омилларни бартараф этишдаги асосий қадам эканлигини англатади.

Хулоса қилиб айтганда, мазкур фармонда белгиланган қатор вазифалар коррупцияга оид жиноятлар учун жавобгарликни кучайтирилиши ва  адолатли фуқаролик жамиятини қуришда дастуриламал ҳужжат бўлиб хизмат қилади.

Дилноза МИРЗАМАҲМУДОВА,

“Адолат” СДП Сиёсий Кенгаши Марказий аппарати

 бошқарма бошлиғи