"Адолат”нинг зукко қизи яна ғолиб бўлди

Ўзбекистон республикаси Ички ишлар вазирлиги қошидаги лицейлар ўртасида ҳуқуқшунослик фани бўйича республика олимпиадаси бўлиб ўтди. Унда юртимиздаги 14 та маъмурий-ҳудудий бирликларидаги лицейларнинг энг фаол, билимли, зукко ёшлари иштирок этиб, ўз билимларини синовдан ўтказдилар.
Танловда Ўзбекистон “Адолат” социал демократик партиясининг республика Сиёсий Кенгаши томонидан ўтказилган “ Конституция билимдони” кўрик- танловининг республика босқичида Фарғона вилояти шарафини ҳимоя қилиб, биринчилик қўлга киритган Сабринабону Неъматова ҳам иштирок этди.
Асли Фарғона вилояти Фурқат тумани “Тўрғай” қишлоғида яшовчи Сабринабону бугунги кунда Фарғона шаҳридаги Ички Ишлар Вазирлиги қошидаги Академик лицейда таҳсил олмоқда.
Ўзбекистон республикаси Ички ишлар вазирлиги қошидаги лицейлар ўртасида ҳуқуқшунослик фани бўйича республика олимпиадасида ҳам ўз билим ва маҳоратини намоён этган заковатли қизимиз республика танловида фахрли иккинчи ўринни қўлга киритиб, ташкилотчиларнинг диплом ва қимматбаҳо совғаларини қўлга киритди.
Сабринабонуни яна бир ютуғи билан қутлаймиз!

Гулчеҳра Аҳмедова,
Ўзбекистон “Адолат” СДП
Фарғона вилоят Кенгаши матбуот котиби.