Аёлнинг муаммоси — жамиятнинг муаммоси

Аёлнинг муаммоси — жамиятнинг муаммоси
ёки “Мардикор бозори”даги аёллар

Бугунги кунда давлатимиз томонидан жамиятда хотин-қизларнинг фаоллигини оширишга алоҳида эътибор қаратилмоқда. Аёлга бўлган эътибор — оилага, жамиятга бўлган эътибор демакдир. Яратилган имкониятлардан самарали фойдаланган ҳолда барча соҳаларда уларнинг фаоллиги ортиб бормоқда. Бу албатта қувонарли.
Юқоридагиларга қарамай, тан олиб айтиш керак, хотин-қизлар билан боғлиқ муаммолар йўқ эмас. Жумладан, бандлигини таъминлаш борасида олдимизда катта вазифалар турибди. Негаки, бир нафар аёлнинг ишсизлиги — бутун бир оиланинг ташвиши демакдир.
Тўғри, менталитетимиздан келиб чиқиб, аёлларнинг оилада амалга оширадиган ишлари оз эмас: уйда фарзанд тарбияси билан бандлигининг ўзи энг шарафли иш. Бироқ оиласидан ортиб, бир касб эгаси бўлиш, қайсидир соҳа ривожига ҳисса қўшишни исташлиги аниқ.
Бугун андижонлик 19 минг 526 нафар хотин-қизни ўз атрофида бирлаштирган Ўзбекистон “Адолат” СДП Андижон вилояти кенгаши томонидан бу масала доим эътиборда. “Бир адолатчи юз аёлга ҳимоячи” лойиҳаси доирасида бандлигини таъминлаш чоралари кўрилмоқда. Бу борадаги ҳаракатларимиз натижасида уларда партиямизга бўлган ишонч ортмоқда. Якунланган 2023 йилда айни шу масалада 378 та мурожаат келиб тушди. Партия фаолларининг кўмаги билан 192 нафар хотин-қизнинг бандлиги таъминланди.
Бизни қийнаётган муаммолардан бири — айрим аёлларнинг норасмий меҳнат бозорида иштирок этаётгани. Тирикчилик, рўзғор ташвиши уларни бунга мажбур қилмоқда. Кунлик пул топаётганидан хурсандлиги аниқ. Бироқ унинг ҳуқуқи, хавфсизлиги ва эртаси ҳақида ўйлаш керак. Бугун кучи бор ишлаётган аёл саломатлигини йўқотса, келгусида ҳаёти қандай кечади? Дам олиши, даволанишини ким кафолатлайди?
Юқоридагилардан келиб чиқиб, мавжуд бўш иш ўринларини уларга таклиф этяпмиз. Амалдаги қонунчилик асосида ишлаш биринчи навбатда унинг ўзи учун фойдали эканлиги тушунтирилмоқда. Қайсидир даражада натижага эришиляпти. Бироқ бу оғриқдан батамом қутула олганимиз йўқ. Агар бутун жамоатчилик биргаликда ҳаракат қилсак “Мардикор бозори”дан уларни “озод” эта оламиз.

Малохатхон Мусаева,
Ўзбекистон “Адолат” СДП
Андижон вилояти кенгаши раиси ўринбосари.