“Бир адолатчи-юз аёлга ҳимоячи” лойиҳаси Бандихонда

Ўзбекистон «Адолат» социал-демократик партиясининг «Бир адолатчи юз аёлга ҳимоячи» лойиҳаси доирасида хотин-қизларни ижтимоий-ҳуқуқий жиҳатдан қўллаб-қувватлаш, уларнинг оила ва жамиятдаги мавқеини мустаҳкамлашга қаратилган кенг кўламли ишлар амалга оширилмоқда.

Бу борадаги саъй-ҳаракатлар партиянинг Бандихон тумани Кенгаши томонидан ҳам тизимли йўлга қўйилган.

Тумандаги  “Обод юрт” маҳалласида халқ депутатлари Бандихон тумани Кенгаши депутати Содиқ Каримбердиев томонидан партиянинг «Аёллар қаноти» кенгаши фаоллари ҳамда туман Ҳокимлиги билан биргаликда «Аёлга эътибор жамият келажагига эътибор» мавзусида хотин-қизларнинг муаммоларини ўрганишга қаратилган учрашув ва сайёр қабул ташкил қилинди. Унда ушбу ҳудудда истиқомат қилаётган «Аёллар дафтари» рўйхатидаги бир гуруҳ хотин-қизлар билан суҳбат олиб борилди. Муаммолари ўрганилди.Очиқ мулоқот жараёнида хотин-қизлар томонидан келиб тушган ўнга яқин мурожаат бўйича ҳуқуқий ва психологик маслаҳат берилди.

– Лойиҳа доирасида хотин-қизларнинг ҳуқуқий манфаатларини ҳар томонлама ҳимоя қилиш, иш билан таъминлаш, меҳнат ва ўқиш шароитларини яхшилашга алоҳида эътибор қаратилмоқда, – дейди “Аёллар қаноти” Кенгаши фаолларидан бири Лола Абдурасулова. – Айниқса, уларни тадбиркорлик фаолиятига кенг жалб этишга қаратилган ишлар ўзининг ижобий самарасини бермоқда.

Ўрганишлар давомида мазкур туманда 345 нафар хотин-қизлар билан суҳбат ўтказилиб, унинг якунлари бўйича 30 ёшдан ошган 125 нафар хотин-қизлар “Аёллар дафтари”га киритилган. Рўйхатга киритилган  хотин-қизлардан 75 нафарини ижтимоий ҳимояга муҳтож ишсиз аёллар ташкил этади.

Учрашувда депутатимиз туман Ҳокимлиги масъуллари билан ҳамкорликда хотин-қизлардан 16 нафарининг иш билан бандлиги таъминланишида амалий ёрдам берди, тадбиркорлик қилиш истагини билдирган яна 6 нафар аёлга имтиёзли кредитлар ажратилишида кўмаклашди. Шунингдек, 15 нафар хотин-қизнинг эса касб-ҳунарга ўқитилиши режалаштирилди, 10 тасига такрорий экин жойларидан ер ажратилиб, бандлиги таъминланиши айтиб ўтилди.

Яна шунингдек, депутат ташаббуси билан 4 нафар аёлга уйда тадбиркорлик билан шуғулланиши учун жўжа очадиган инкубаторлар берилди. Ногиронлиги бўлган ва ўзгалар парваришига муҳтож хотин-қизларга даволаниши учун туман ҳокимлиги билан ҳамкорликда  моддий ёрдам тўлаб берилиши белгиланди.

Учрашув давомида сўнгги пайтларда қонунчиликка киритилган сўнгги ўзгаришлар борасида хам тўхталиб, юртимизда амалга оширилаётган ислоҳотлар бўйича кенг қамровли тушунтиришлар берилди.

Назокат Хидирова,

Ўзбекистон “Адолат” СДП Сурхондарё вилоят  “Аёллар қаноти” Кенгаши раиси