“Бир адолатчи - юз аёлга ҳимоячи” лойиҳаси доирасида аёллар тикув машиналари билан таъминланди

Юртимизда хотин-қизларнинг яхши яшашига кўмаклашиш, айниқса ижтимоий кўмакка муҳтож аёлларнинг фаоллигини ошириш, бандлигини таъминлашга ҳамиша катта эътибор қаратилиб келиняпти. Бу борада “Адолат” СДП депутатлари ва фаоллари ҳам маҳаллаларда “Аёллар дафтари”га киритилган аёлларни бандлигини таъминлашга кўмаклашиш борасида ишларни фаоллик билан амалга оширмоқда.

Хусусан, Халқ депутатлари Шеробод туман Кенгаши депутати Саодат Туляева томонидан  “Бир адолатчи - юз аёлга ҳимоячи” лойиҳаси доирасида олиб борилаётган ишлари таҳсинга сазовор. Жумладан, депутатимизнинг саъй-ҳаракати билан тумандаги “Темир дафтар”га киритилган  23 нафар хотин-қизлар бепул тикув машиналари билан таъминланди.

Дастлаб депутатимиз тумандаги маҳаллаларда “Аёллар дафтари”га киритилган аёлларни аниқлаш учун уйма-уй юриб уларнинг яшаш шароитларини ўрганиб чиқди. Хонадонларга ташриф давомида маҳаллаларда яшовчи 23 нафар ишсиз аёлларнинг яшаш шароитларини  ўрганиб, уларнинг бандлигини таъминлашни мақсад қилди. Шундан сўнг туманда фаолият олиб бораётган тадбиркорларни мазкур хайрли ишга жалб қилиб, 23 нафар "Аёллар дафтари"га киритилганларга, ўзларини тадбиркорлик фаолиятини бошлаши ва ўз бандлигини таъминлаш мақсадида бепул замонавий тикув машиналарини тарқатди.

 Нозила Сафарова, тумандаги “Бойқишлоқ” МФЙ фуқароси:

-Уч нафар фарзандим бор. Ўзим тикувчиликка қизиқаман. Тикиш- бичиш билан шуғулланиб, даромад топишни орзу қилардим. Лекин, тикув машинаси сотиб олишга имкониятимиз етарли эмас эди. Депутатимизга тикув машинасига эҳтиёжимиз борлигини айтгандим. Бугун ана шу тикув машинасига эга бўлдим. Мен бу кўрсатилган эътибордан жудаям хурсандман. Энди мен янги мақсадлар сари олға интилиб, ўз бандлигимни таъминлаб, маҳалламиз хотин-қизлари учун чиройли кўйлаклар тикиб бермоқчиман. Бизга кўрсатилган бу эътибор учун депутатимизга каттадан катта раҳмат айтиб қоламан.

Шунингдек, тумандаги “Бойқишлоқ” МФЙ фуқароси Раъно Эшқобилова оилавий тадбиркорлик қилиш учун депутатимизга кредит олишда амалий ёрдам сўраб мурожаат қилганди. Унга оилавий тадбиркорлик билан шуғулланиш учун 15 миллион сўм банк кредити олиб берилди ва Р.Эшқобилова томорқасида кичик иссиқхона ташкил этди. Айни пайтда иссиқхонага кузги  помидор, бодринг, турли хил сабзавот ва кўкатлар етиштириляпти. Муҳими, оилада икки кишининг бандлиги таъминланди.

Фазолат ХОЛМАНОВА,

Ўзбекистон “Адолат” СДП Шеробод туман “Аёллар қаноти” Кенгаши раиси