“Бир адолатчи – юз аёлга ҳимоячи” лойиҳаси – Самарқандда

Ўзбекистон “Адолат” СДП Самарқанд вилоят Кенгаши ташаббуси билан Халқ депутатлари Самарқанд шаҳар Кенгаши депутатлари ҳамкорлигида  ўтказилган  навбатдаги лойиҳа маҳаллабай тизимини ўзида ифода этганлиги билан аҳамиятли бўлди. Яъни партиянинг “Бир адолатчи – юз аёлга ҳимоячи”  лойиҳаси доирасида Самарқанд шаҳридаги “Қуйи хўжасахат” ҳамда “Кўл” маҳаллала фуқаролар йиғинидаги аҳоли бандлиги таъминлаш борасида депутатлар ҳамкорлигида амалга оширилаётган ишлар билан танишди.

Таъкидлаш жоизки, мамлакатимизда  аҳолини ижтимоий қўллаб-қувватлаш мақсадида моддий ёрдам ва кўмакка муҳтож оилалар рўйхати шаклланган “темир дафтар” тузилиб камбағалликни тугатишда ўз самарасини бераётгани қувонарли ҳол. Шу ўринда, партиямизнинг  шаҳар ва туман Кенгашлари ўртасида  ташкил этилган партиянинг  “Бир ойда бир иш ўрни” лойиҳаси ҳам  ишсиз юрган фуқароларнинг бандлигини таъминлаш орқали камбағалликни тугатишга хизмат қилмоқда. Президентимиз ташаббуси билан ёшлар ва хотин-қизларни иш билан таъминлаш ва уларнинг жамиятдаги муносиб ўринини эгаллашларини кўзлаб, ҳар бир маҳаллада “ёшлар дафтари” ва “хотин-қизлар дафтари”нинг шакллантирилиши тўғрисидаги мурожаати ҳам партиямиз фаоллари ва депутатларининг  диққат марказидан жой олди.

Тадбир иштирокчилари дастлаб, халқ депутатлари Самарқанд шаҳар кенгаши депутати Аҳмаджон Маматов сайлов округи ҳудудидаги “Қуйи хўжа сахат” маҳалласида бўлиб “Темир дафтар”, “Ёшлар дафтари” ва “Аёллар дафтари”га киритилган хотин-қизлар билан суҳбатлашиб, уларнинг муаммолари, таклифларини ўрганди. Маҳаллада темир дафтарга рўйхатга олиш бошланганида 30 нафар аҳоли киритилган бўлса, бугунги кунга келиб улардан 4 нафари темир дафтарда рўйхатда туради, 26 нафари  эса турли ишлаб чиқариш соҳаларига жалб этилиб, бандлиги таъминланган. Аёллар дафтарида эса 631 нафар хотин-қизлар, ёшлар дафтарига эса 595 нафар ёшлар рўйхатга киритилган. Маҳаллада ушбу дафтарларда рўйхатга киритилган аҳоли асосан бандлик масаласида мурожаат қилган. Маҳаллада ўтган йил давомида биронта ҳам жиноят кузатилмаган.

Бу борада қилинадиган ишлар ҳали кўп бўлсада, бир талай амалий натижаларга ҳам эришилган, хусусан, ушбу маҳаллада истиқомат қилувчи Феруза Гулямова хонадонига ташриф буюрган ишчи гуруҳи тикувчилик цехининг фаолиятини кўздан кечирар экан, Феруза Гулямованинг ташаббускорлиги, изланувчанлигига юқори баҳо берди. Депутат Аҳмаджон Маматов ташаббуси билан имтиёзли кредит олиб ўз ишини бошлаган Ф.Гулямова бугун маҳаллада “темир дафтар”да рўйхатда турувчи 6 нафар хотин-қизларнинг бандлигини таъминлашга ҳиссасини қўшгани эътиборга лойиқ.

Бундан ташқари маҳалла қошида Қ.Азғаров, Ш.Каримова, Д.Шарипова, Ҳ.Ибрагимовалар ҳам субсидия олиб ўзларининг тадбиркорлик фаолиятларини бошлаган. Улар тикувчилик, тўқувчилик, қандолатчилик, автомашиналар учун ўриндиқ ғилофларини тикиш каби йўналишларда 5 нафардан ёшлар, хотин-қизларга устоз-шогирд анъанаси орқали таҳсил бериб келмоқда. Депутат ташаббуси билан маҳалла қошида ташкил этилган спорт залида маҳалланинг ёшлари жалб этилган. Ушбу залда 3 навбатда ёшлар турли спорт турлари бўйича машғулотлар олиб бормоқда. Маҳалла қошида ташкил этилган болаларни мактабгача тайёрлов курси эса болажонларнинг севимли маскани. Бу ерда уларга ширинсухан педагоглар томонидан рус, инглиз тилидан бошланғич дарслар бериб борилади. Ўқиш ва ёзишдан сабоқлар ўргатилади.

Бугунги кунда темир дафтар, аёллар дафтари ва ёшлар дафтарига киритилган фуқароларга амалий ёрдам кўрсатиш, ҳудудда камбағалликни қисқартириш борасида изчил ишларни амалга ошириш долзарб масала. Уларга нафақат моддий ёрдам кўрсатиш, балки жамиятда ўз иш ўрнига эга бўлишига кўмаклашиш орқали ушбу рўйхатдан чиқариш лозим. - дейди партиянинг Самарқанд шаҳар Кенгаши депутати Аҳмаджон Маматов. - Таъкидлаш жоизки, “маҳаллабай” ишни ташкил қилиш жараёнида давлатимиз раҳбарининг нақадар ҳақ эканликларига гувоҳ бўляпмиз. Аёллар муаммоларини ҳал этиш, уларни рози қилиш орқали жамиятда ижтимоий фаоллигини мустаҳкамлашга эришилади. Бунинг учун нафақат “маҳаллабай”, хонадонма-хонадон ишлашимиз жоизлигини теранроқ англадик. Биз сиёсий куч фаоллари бу мақсадли тизимга беэътибор бўлмасдан, аёллар ва ёшларнинг муаммоларини имкон қадар депутатлик гуруҳимиз аъзолари ҳамкорлигида ижобий ҳал қилиш йўлларини излашимиз зарур.

Шундан сўнг тадбир иштирокчилари шаҳардаги “Кўл” маҳалласида бўлиб аҳолининг мурожаатларини тинглади. “Кўл”  маҳалласи қошида  депутатимиз Озода Назарованинг кўмагида ташкил этилган “Кўл текстил”  тикувчилик цехининг фаолияти кўздан кечирилди. Ушбу тикувчилик цехида маҳалладаги аёллар дафтарига киритилган 10 нафар хотин-қизлар  фаолият юритмоқда.

Президентимиз ташаббуси билан ташкил этилган “ёшлар дафтари” ва “аёллар дафтари”  ёшлар ва хотин-қизларни қийнаётган муаммоларини яна ижобий ҳал этишда замин яратиб берди.  Фуқаролар билан суҳбатимиз чоғида аниқланган муаммоларнинг аксарияти бандлик масалаларидан иборат бўлмоқда. - дейди партиянинг Самарқанд шаҳар Кенгаши депутати Озода Назарова - Айниқса, бу ҳолат “темир дафтар”га киритилган оилаларда кўплаб  кузатилади. Имконият даражасида ушбу оилаларга кўмак бериб келмоқдамиз.

Камола Шокирова, тадбиркор:

– Тикувчилик соҳасига ёшлигимдан қизиқаман. Бугунги кунда юртимизда аёллар учун яратилган имкониятлардан фойдаланиб, тикув цехи очиш истагида эканлигимни депутатимиз Озода опа Назаровага маслаҳат солдим. Опа фикрларимни қўллаб-қувватлаб, кредит олиб, тикув машиналарини олиб келиб ўрнатгунимча ҳам ёнимда бўлиб қўллаб турди. Ўзларининг ёрдамини аямади. Фаолиятимизни йўлга қўйиб олдик, маҳалладаги хотин-қизларни ёнимга олдим. Ҳозирги кунда депутатимиздан яна бир масалада ёрдам сураб мурожаат қилмоқчи эдим, тикув цехида ишлаб чиқарилаётган кийим-кечак, маҳсулотларни сотиш учун жой ажратишда амалий ёрдам керак.

Фуқаролар томонидан шу каби кўтарилган масалалар, таклиф ва мулоҳазалар депутатлар назоратига олинди.

Муҳиба БАБАБЕКОВА,

Ўзбекистон “Адолат” СДП  Самарқанд вилоят Кенгаши раиси,

халқ депутатлари Самарқанд шаҳар Кенгаши депутати