Биз нимани унутдик? Ўйлаб кўринг!

Яқин кунлардан бери коронавирус балоси тағин урчигандан-урчиди. Мамлакатимиз раҳбари аҳолини пандемиянинг бешинчи тўлқинидан огоҳ этди. Юртимизда Сovid-19 билан касалланганлар ва беморлар орасида ўлим ҳолатлари ортиб бормоқда. Бу орада вакциналар тўғрисида ҳам асоссиз миш-мишлар одамларнинг ҳадик тўла кўнглига ғулғула солиб турибди.

Хўш, буларнинг ҳаммасига ким сабабчи? Чин юртининг Ухань шаҳридаги кўршапалакларни айблашга шошилманг. Фестивалларнинг ўтказилганини айтиб, хомтама бўлманг. Тўйларга рухсат берилгани-ю, яна бошқа-бошқа важларни келтиришнинг ҳам мавриди эмас. Ҳамма айб сизу бизнинг ўзимизда. Биз унутдик. “Инсон” сўзининг маъноси бежиз “унутувчи” эмас. Ҳақрост, биз тезда унутамиз, хаёлимиз шундай паришон. Ўтган йилнинг айни шу вақтида пандемия қандай ҳакалак отганини, юртимизда, шаҳару қишлоқларимизда туб қўйиб, палак ёзгани-ю қанча маҳалладошларимиз, юртдошларимиз умрига зомин бўлганини унутдик. Энг муҳими, уйдан чиқаётиб, ниқоб тақишни мутлақо эсдан чиқардик. Оқибати... ўзимиз пиширган ош.

Яқинда Зангиота туманидаги махсус шифохонада барча ўринлар тўлгани маълум қилинганди. Куни кеча эса пойтахтимизнинг 11 та туманида 1 тадан махсус поликлиникалар ташкил этилгани ҳақида хабар берилди. Бу поликлиникаларда коронавирус инфекциясига гумон қилинган ва инфекция тасдиқланган беморларга бирламчи тиббий-санитария ёрдами кўрсатилиб, уларга даво муолажаларини тавсия қилиш ва амбулатор даволаш ишлари йўлга қўйилади.

Ҳар бир марказга 3 тадан тиббий бригада бириктирилган бўлиб, уларнинг таркибида 2 нафар шифокор ва 2 нафар ўрта тиббиёт ходими мавжуд.

Афсуски, мамлакатимиз, айниқса, пойтахт аҳолиси орасида Сovid-19га гумон қилинган, пневмония ва коронавирус касаллиги тасдиқланган ҳамда бошқа юқумли хасталиклар билан оғриган фуқаролар томонидан  “103”  хизматига бўлаётган чақириқлар сони ҳам ортмоқда. Рақамларга мурожаат қилинса, пойтахтда “Тез ёрдам” хизматига бир кунда ўртача 5000-5100 нафар фуқаро мурожаат қилмоқда. Бунинг замирида ҳам унутганларимиз турган бўлса, не ажаб?!

Жаҳон соғлиқни сақлаш ташкилоти маълумотларига кўра, Сovid-19 билан хасталанганлар сони 194 миллиондан ортиқ кишини ташкил этган. Беморларнинг 4 миллион 49 мингдан зиёди касаллик оқибатида вафот этган. Охирги кўрсаткичлар бир суткада дунё бўйича 362 минг 31 киши коронавирус юқтиргани ва Сovid-19 билан касалланган 6 минг 135 нафар бемор бу дард оқибатида вафот этганини кўрсатмоқда. Касаллик тасдиқланиш ҳолатлари бўйича АҚШ (34,443 млн киши касалланган) биринчи ўринда турибди. Рўйхатни Ҳиндистон (31,371млн киши), Бразилия (19,688 млн киши), Россия (6,049 млн киши) давом эттирган. Жонс Хопкинс университети маълумотларига кўра, коронавирусга қарши дунёда жами 3 миллиард 845 миллион доза вакцина қўлланилган. Мамлакатимизда эса коронавирус инфекцияси қайд этилганлар сони 117 минг 902 тани ташкил этди.

26 июль куни юртимизда пандемия бошидан бери  кузатилмаган нохуш рекорд қайд этилиб,  789 кишида коронавирус, 521 кишида пневмония аниқланиб, 6 нафар бемор вафот этди. Касалланганларнинг 112 941 нафари соғайди. 14 июль ҳолатига кўра, 5 миллион 275 минг 191 доза вакцина қўлланилди. Шу кунгача 972 минг 807 нафар фуқаро тўлиқ эмланди. Бу рақамлар ҳар куни, ҳар соатда ўзгариб турибди. Шунча унутганимиз етар. Энди унутмаслик керакки, ҳар бир рақам ортида бир инсоннинг ҳаёти турибди.  Республика махсус комиссиясининг қарорига кўра, мамлакатимизда карантин чекловлари кучайтирилди. Аммо минг бир чеклов бўлса-да, ниқоб тақмаслик, шахсий гигиена қоидаларига риоя қилмаслик, вирусни авж олдираверади, авж олдираверади. Бундан буёғига унутишга ҳаққимиз йўқ! Уйдан чиқаётганингизда ниқоб тақишни унутманг!

Бахриддин ҚИЛИЧОВ,

Халқ депутатлари Нуробод туман Кенгаши депутати,

 Ўзбекистон “Адолат” СДП туман кенгаши депутатлик гуруҳи раҳбари