Депутат аҳоли мурожаатига “лаббай” дея жавоб бера олди

Халқ депутатлари Гулистон туман Кенгашидаги Ўзбекистон “Адолат” СДП депутатлик гуруҳи аъзолари томонидан партиянинг туман Кенгаши билан ҳамкорликда “Муаммо билан юзма-юз” лойиҳаси ташкил этилди. Манзил эса туманнинг “Деҳқонобод” шаҳарчасидаги “Ғаллаорол” кўчаси бўлди. Бу ҳудуддан сайланган туман Кенгаши депутати Анваржон Холмирзаев ўз сайловчилари билан мулоқот қилар экан, депутатлик гуруҳининг эътиборига аҳолини ўйлантириб келаётган бир қатор масалаларни ҳавола қилди. Халқнинг мурожаатига асос бўлган масалалар рўйхатидан биринчилардан бўлиб ичимлик суви билан таъминланмаганлик муаммоси ўрни олди. Яъни ушбу кўчада мавжуд бўлган 72 та хонадонга ичимлик сувининг қувури олиб кирилмаган.

Аҳоли эса кўп йиллардан буён ичимлик сувини 200-500 метр узоқликдаги масофадан ташиб келтиради. Бу эса ёш болали аёллар ва ёши кекса нуронийларга қийинчилик туғдирмоқда. Депутатлар ушбу масалани ўрганиш асносида «Аҳиллик» ва «Ибратли» маҳалласидаги «Зиёкор», «Ўзбекистон» кўчаларида ҳам ичимлик суви билан боғлиқ ўз ечимини кутаётган масалалар борлиги маълум бўлди. Айнан шу ҳудуддан халқ депутатлари туман Кенгашига сайланган депутат Анваржон Холмирзаев фуқароларнинг мурожаатидаги ушбу масала юзасидан туман «Сувоқова» ДУКга депутатлик сўровини юборди.

Натижада депутатлик сўровига ижобий жавоб берилди. Яъни, мазкур маҳаллаларга ичимлик суви қувурларини тортиб келиш ва борларини таъмирлаш ишлари бошлаб юборилди. Туман «Сувоқова» ДУК ходимлари билан ҳамжиҳат иш олиб борган аҳоли вакиллари депутат Анваржон Холмирзаевга бежизга ишонч билдирмаганларига яна бир бора амин бўлишди. Сув қувурларини тортиш ва таъмирлаш ишлари якунланиши билан хонадонидан ичимлик суви чиққан аҳоли вакиллари мурожаатларига «лаббай» дея жавоб бера олган депутатидан миннатдор эканлиги бунга ифода.   

Зеро адолат бор жойда ҳар қандай масалага ечим бор.

Маҳфират ХУДОЙБЕРДИЕВА,

Ўзбекистон “Адолат” СДП Сирдарё вилоят

Кенгаши матбуот котиби