Депутатимиз – Халқаро мусобақа ғолиби

Сарвар Муродуллаевни Чортоқ туманида яхши билишади. Бугунги кунда йигирма тўққизга кирган бу йигит қарийб ўн йилдан бери партиямиз аъзоси. Айни пайтда халқ депутатлари туман кенгашининг депутати. Ёшлар парламентининг аъзоси этиб ҳам сайланган. Болалар-ўсмирлар спорт мактабининг директори сифатидаги фаолияти ҳам эътиборга лойиқ. У раҳбарлик қилаётган даргоҳда юзлаб навқирон авлод вакиллари шуғулланадилар.

 – Спортда “ўйновчи мураббий” деган ибора бор, - суҳбатга қўшилади “Адолат” СДП Чортоқ туман кенгаши раиси Ҳабибахон Мирабдуллаева. Ёшларга устозлик қилиб, ўзи ҳам мусобақаларда қатнашадиганлар шундай номга сазовор бўладилар. Бизнинг Сарвар ҳам маҳоратли каратечи. Кўплаб республика, қитъа ва жаҳон биринчиликларида қатнашиб, совринли ўринларни эгаллаган. Ҳозир ҳам мунтазам машқ қилади. Шу билан бирга ўнлаб ёшларнинг мураббийи саналади.

Яқинда  Россия Федерацияси пойтахти – Москва шағрида карате бўйича дунёнинг ўнлаб давлатларидан ташриф буюрган спортчилар қатнашган йирик халқаро турнир ўтказилди. Унда мамлакатимиз шарафини ҳимоя қилганлар орасида чортоқлик депутатимиз Сарвар Муродуллаев ва унинг шогирди Акбарали Маҳмуджонов ўз вазн тоифаларида ғолибликни қўлга киритиб, ҳурмат шоҳсупасининг энг юқори поғонасига кўтарилдилар.Албатта, бундай натижаларга эришиш осон кечмади. Финалда ва унгача бўлган босқичларда рўпара келган рақибларни енгиш учун бор маҳорат, куч ва иродани сафарбар этишга тўғри келди.

Куни кеча Чортоқда ҳар икки спортчини тантанали кутиб олиш маросими бўлиб ўтди. Унда кенг жамоатчилик вакиллари, жумладан, “Адолат” СДП фаоллари ҳам иштирок этдилар. Ҳар икки спортчига Фахрий ёрлиқлар ва эсдалик совғалари тақдим қилинди.

 – Бугунги учрашув барчамизнинг кўнглимизни кўтарди, - дейди Сарвар Муродуллаев. – Мен “Адолат” социал-демократик партияси аъзоси сифатида  юртимиз шарафини улуғлаганимдан хурсандман. Ўн ёшли шогирдим Акбаралининг ютуғидан ҳам чексиз қувондим. Келажакда у кўплаб мусобақаларнинг ғолиби бўлишига ишонаман. Фақат бунинг учун астойдил меҳнат қилиш керак.  Мактабда яхши ўқишни ҳам унутмаслик зарур.

 Бундай ёшлар янада кўпайишига тилакдошман.

Нурбек АБДУЛЛАЕВ,

“Адолат” СДП Наманган вилояти Кенгаши

матбуот котиби.