Депутатлар сафи кенгаймоқда

Октябрь ойида Ўзбекистон “Адолат” СДП Наманган вилоят ташкилоти учун депутатлар сафини кенгайтириш борасида яхши натижаларга эришди. Ўрни бўшаб қолган депутатлар ўрнига ўтказилган сайловлар Чуст, Норин ва Поп туманларида муваффақиятли якунланди. Вакилларимиз ана шу туманлар халқ депутатлари кенгашларидан ўрин олдилар.

“Адолат” СДП аъзоси, туман ҳокими Бекзод Ҳамдамов  11 октябрь куни5-Ипак йўли сайлов округида  ўтказилган сайловда ғолиб чиққанлиги ҳақида аввал хабар бергандик. Бу билан халқ депутатлари туман кенгашидаги “Адолат” СДП гуруҳи аъзолари сони беш кишига етган.

Кейинги ҳафта, яъни 18 октябрда Норин туманидаги 17-Бойовул сайлов округида ҳам ўрни бўшаб қолган депутат ўрнига сайлов ўтказилди. Бу ерда партиямиз номзоди Шарифжон Омонов энг кўп овоз олди. У халқ депутатлари туман кенгашидаги “Адолат” СДПнинг учинчи депутати бўлди. Бу билан партия гуруҳи тузиш имконияти қўлга киритилди.

“Адолат” СДП туман кенгаши раиси Носиржон Ҳасановнинг айтишича, Шарифжон Омонов ҳозир “Хўжаобод” муқобил машина-трактор парки раиси бўлиб ишлайди. У етакчилик қилаётган жамоа бу йилги пахта тайёрлаш шартномавий режасини муваффақиятли бажарди. Қишлоқ хўжалигининг бошқа тармоқларида ҳам ўсишга эришилган. Ш. Омонов деҳқончилик илмини пухта ўзлаштирган инсон. Одамлар билан ишлашни ҳам яхши билади. Шунинг учун у етакчилик қилаётган жамоа туманда илғорлар сафидан жой олган. Белгиланган режалар ортиғи билан бажарилиши эвазига ишловчиларнинг моддий манфаатдорлиги  ортиб бормоқда.

Кейинги якшанба, яъни 25 октябрда Поп туманида тўртта округда бўшаб колган ўринларга   сайлов бўлди. 9-Хўжаобод сайлов округидан “Адолат” СДП вакили “Агробанк” туман бўлими бошқарувчисининг ўринбосари Аброржон Рапиғалиев номзоди қўйилган эди. Сайловчиларнинг ярмидан зиёди партиядошимизни ёқлаб овоз берди. Депутатимиз 38 ёшда, Наманган муҳандислик-педагогика институтини ва Тошкент молия институтини битирган. 17 йилдан буён “Агробанк” туман бўлимида ишлайди. Оддий мутахассисликдан бошқарувчи ўринбосари лавозимигача бўлган йўлни босиб ўтган.

Дарвоқе, келгуси якшанбада Поп туманидаги 25-Маданият сайлов округида такрорий овоз бериш ўтказилади. Бу ерда биринчи турда “Адолат” СДП вакили, 31-мактаб директори Мафтуна Маматова 44 фоиз овоз олганди. Ажаб эмас, такрорий овоз берпишда ҳам омад унга кулиб боқса... Шунда халқ депутатлари Поп туман кенгашида ҳам партиямизнинг депутатлик гуруҳи тузиларди.

                                                                                     Нурбек АБДУЛЛАЕВ,

Ўзбекистон “Адолат” СДП

Наманган вилоят Кенгаши матбуот котиби