Хотира бор экан, миллат барҳаёт

Ўзбекистон халқи 9-май  “Хотира ва қадрлаш” куни “Мунгли она” ҳайкали остига гуллар қўядилар ва бу орқали иккинчи жаҳон урушида қурбон бўлганлар хотирасини ёдга оладилар ва ҳурмат бажо айлайдилар. Ёшлар ва ёши улуғлар, болалар ва ёши катталар бу кунда хотира майдонларини зиёрат қилишга ташриф буюрадилар. Она ҳайкали ёнидаги “Мангу олов” ёнида зар ҳарфлар билан “Сен ҳар доим қалбимдасан” деган сўзлар битилган. Бу кун халқимиз ҳаётида алоҳида ўрин тутган. Бу кун ҳар бир қишлоқ ва шаҳарда катта ҳурмат ва эҳтиром билан нишонланади.

Ўзбекистонда ҳар бир хонадон, оила тақдири ушбу кун билан боғланган. Чунки, деярли ҳамманинг отаси, бобоси урушда қатнашган ва иккинчи жаҳон урушида яраланган ёки вафот этган. Бу йил ғалабанинг 76 йиллиги муносабати билан юртимиз бўйлаб иккинчи жаҳон урушида жасорат кўрсатган ҳамюртларимизга эҳтиром рамзи сифатида “Шараф лентаси”ни улашиш акцияси бўлиб ўтмоқда. Ушбу аксияда юртимизнинг барча ҳудудларида фуқаролар ва ёшлар фаол иштирок этишмоқда. Хусусан, 42-мактаб Ёшлар иттифоқи сардорлари билан биргаликда туманимизда ҳам ушбу акцияни ўтказдик. Ёшлар иттифоқи сардорлар билан биргаликда иккинчи жаҳон уруши қатнашчилари, фронт ортида хизмат қилган улуғ боболаримиз холидан хабар олинди ҳамда уларнинг кўксиларига “Шараф ленталари” тақилди.

Бундан ташқари, эртамиз эгалари бўлган ёш авлод тарбиясига  улкан ҳисса қўшаётган кечани-кеча, кундузни-кундуз демай фидойи меҳнат қилаётган жонкуяр устозларимиз кўксиларига ҳам “Шараф ленталари”  қадалди.  “Шараф ленталари”ни улашиш туманимиз кўчаларида ҳам давом этмоқда.

Дўппимиз ўзбеклигимизнинг ифодаси, ифтихори бўлганидек, “Шараф лента”миз ҳам шу юрт, шу азиз ватаннинг баҳтиёр фуқароларимизнинг эрк ва озод ватанда яшаш сурури ифодаси эканлигининг ёрқин белгисидир. Иккинчи жаҳон уруши йилларида юрт ҳимоясига отланиб, ватанга муносиб хизмат қилган юртдошларимизга ҳурмат ва эҳтиром кўрсатиш мақсадида ташкил этилган бундай аксия ҳар қандай киши қалбини руҳлантиради ва қувонтиради. Зеро, аждодларимизга, бу муқаддас заминга, озодлик ва эркка муносиб фарзанд бўлиш ҳар бир ёшнинг бурчига айланмоғи ҳам фарз ҳам қарздиир. 

                              Абубакир АҲРОРЖОНОВ,

42-умумий ўрта таълим мактаби Ёшлар етакчиси

Олий Мажлис Қонунчилик палатаси

 ҳузуридаги Ёшлар парламенти аъзоси