Иллатга қарши курашда юксак кафолат

“Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги қарор ва “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги фармонда  назарда тутилаётган чоралар мамлакатда коррупцияга қарши ростмана уруш бошланаётганидан далолат беради.

Афсуски, фуқароларимиз коррупция деганда, кўпроқ пора олиш ва пора бериш, бу жараёнда воситачилик қилишнигина тушунишади. Аслини олганда, давлат хизматчиси ўзи эгаллаб турган лавозими ёки моддий мансабдор шахснинг моддий жавобгарлигида бўлган мулклардан ноқонуний бойлик орттириш йўлидаги ҳар бир ҳаракати коррупцион жиноятни келтириб чиқаради. Шу билан бир қаторда, хўжалик соҳасидаги жиноятлар туркумига кирувчи ноқонуний тадбиркорлик билан шуғулланиш, савдо ёки хизмат кўрсатиш қоидаларини бузишда ҳам давлат органи вакилларининг аралашуви коррупцион жиноятларни келтириб чиқаради.

Умуман, янги ҳужжатлар мамлакатимизда энди юқоридаги каби ҳолатларга бағрикенглик қилиб ўтирилмаслигидан далолат бермоқда.

Фармонда таъкидланганидек,  “Коррупцияга оид жиноятларни содир этишда айбдор деб топилган шахсларнинг очиқ электрон реестри”ни юритиш кўзда тутилган. Ушбу реестрга киритилган шахслар давлат хизматига қабул қилинмайди, давлат мукофотлари билан тақдирланмайди, сайланадиган ва алоҳида тартибда тайинланадиган лавозимларга уларнинг номзодлари кўрсатилмайди. Ўз навбатида, “қора реестр”га тушган шахснинг давлат органлари ҳузуридаги жамоатчилик кенгашлари ҳамда тадбиркорлик субъектлари давлат харидларида ва давлат-хусусий шериклик битимида иштирокчи сифатида қатнашиши, давлат таълим муассасаларида раҳбарлик лавозимларида фаолият юритиши тақиқланади.

Фармонга кўра 2022 йил 1 январдан бошлаб “ҳалоллик вакцинаси” тамойили асосида давлат хизматчилари мунтазам коррупцияга қарши курашиш бўйича ўқитилади.

Давлатимиз раҳбари таъкидлаганидек, “Коррупцияга қарши курашишда аҳолининг барча қатламлари, энг яхши мутахассислар жалб қилинмас экан, жамиятимизнинг барча аъзолари, таъбир жоиз бўлса, “ҳалоллик вакцинаси” билан эмланмас экан, ўз олдимизга қўйган юксак марраларга эриша олмаймиз.

Жамиятда коррупцияга нисбатан муросасиз муносабатни шакллантириш бугунги кунда ниҳоятда долзарб масала бўлиб, бу борада нафақат масъул идоралар, балки кенг жамоатчилик ҳам ҳамжиҳат ва ҳамфикр бўлмоғи мақсадга мувофиқдир. Шундан келиб чиқиб, қаердадир таъмагирлик, порахўрлик ҳолатларига дуч келсак, ҳар биримиз бу нохуш ҳодисага нисбатан бефарқ бўлмаслигимиз, лоқайдлик қилмаслигимиз, аксинча, коррупция иллатини таг томири билан қуритишга қаратилган саъй-ҳаракатларни виждонан бажаришга киришмоғимиз бурч ва масъулиятимизга айланмоғи даркор. Бошқача ифодалаганда, адолатсизликка нисбатан муросасиз бўлишни ўзимиздан бошлашимиз зарур. Гарчи бу масала узоқ йиллардан бери таъкидланиб, “қўлга тушган” мансабдор шахслар телевидение ва матбуотда намойиш этилганига қарамасдан, суд, прокуратура, идора раҳбарлари ҳамда оддий фуқароларнинг қон-қонига сингиб кетган таъмагирлик, бюрократия жамиятимиз ҳаётидан йўқолиб кетмаяпти.

Президентимиз таъкидлаганидек, “жамиятимизда коррупция, турли жиноятларни содир этиш ва бошқа ҳуқуқбузарлик ҳолатларига қарши курашиш, уларга йўл қўймаслик, жиноятга жазо, албатта, муқаррар экани тўғрисидаги қонун талабларини амалда таъминлаш бўйича қатъий чоралар кўришимиз зарур”.

“Адолат” СДП аҳолининг барча қатламлари орасида, айниқса, ёшларда коррупцияга қарши муросасиз кураш маданиятини кучайтиришни муҳим деб,  ҳисоблайди. Биз коррупция билан курашиш нафақат давлат органлари ва ҳуқуқни муҳофаза этиш тузилмаларининг вазифаси, балки бутун жамиятнинг бурчи эканлигини эътироф этамиз.

Мухтасар қилиб айтганда, қабул қилинган янги ҳужжатлар давлат ва жамият тараққиётига салбий таъсир этувчи мазкур иллатга қарши курашишнинг ҳуқуқий механизми сифатида хизмат қилади.

Бобур МАМИРОВ,

Ўзбекистон “Адолат” СДП

Тошкент вилояти Кенгаши раиси