Кўнгилларимиздан хавотир ариди

Тинчлик беқиёс неъмат-ўз тинчлиги осойишталигини сақлаган юртдагина файзу-барака бўлади, халқ фаровонлиги таъминланади. Ҳар бир юртдошимизнинг эртанги кунга бўлган ишончи ёрқин келажакка бўлган интилиши мана шу тинчлик деган биргина сўз негизида акс этган.

Бугунги таҳликали ва хавотирли замон тинчликнинг қанчалик биз учун сув ва ҳаводек зарур эканлиги англатмоқда.

Қорақалпоқ халқининг тинч ҳаётига рахна солиш мақсадида қора Ниятли кимсаларнинг кечаги амалга оширган қабиҳ ишлари, барчамизни яна бир марта огоҳликка даъват этди.

Ет ғоялар таъсирига қарши ҳар бир фуқаро соғлом фикр ва теран ақл билан иш кўрмоғи лозим.

Азалдан бир дарёнинг сувини ичган икки дўст ва аҳил халқимиз ўтган йиллар мобайнида бутун жаҳонга тинчлик, дўсту-бирoдорликни ибрат қилиб ҳамжиҳатликда қанчадан-қанча ислоҳотларни амалга ошириб, вақти келганда елкама-елка бир-бирига суянч бўлдилар. Бунинг барини йўққа чиқаришнинг асло иложи йўқ, зеро қонимиз бир, нонимиз бир халқмиз.

Муҳтарам Президентимиз доимо Қорақалпоқ халқига алоҳида эътибор ва юксак ишонч билан қараб, халқимизнинг фаровон ҳаёти, ёруғ келажаги учун зарур бўлган янги ислоҳотларни амалга оширишда, донишмандлик билан ҳаракат қилмоқда. Шунинг учун ҳам мамлакатимиз ҳудудларига бўлган аҳамиятли ташрифларини ушбу юрт заминидан бошлашни асло канда қилмайдилар.

Муҳтарам Президентимиз ташаббуслари билан қайта туғилган Мўйноқ, яна бир бор туман мақомини олган, бахтиёрлик оғушидаги бузaтoвлик юртимизда амалга оширилаётган кенг кўламли бунёдкорлик ишларининг ўзларининг кўз ўнгида, рўй бераётганлигидан миннатдор.

Қорақалпоғистон иқтисодиётини кўтариш мақсадида, тадбиркорларимизга берилаётган имтиёзлар, янгидан-янги корхоналар ишга тушиши ва кўп минг сонли аёл-қизларимиз ва ёшларимизнинг бандлигини таъминлашга асос бўлмоқда.

Айрим фитнaчилар томонидан уюштирилган, тинчлигимиз, бирлигимизга хавф туғдирган кўнгилсиз ҳолат юз берган бир вақтда Президентимизнинг Нукус шаҳрига шахсан ташриф буюргани халқнинг кўнглидаги гап бўлди, десак янглишмаган бўламиз.
Эртасига 3 июль санасида яна Қорақалпоғистонга келиб, Нукус шаҳри ва Нукус туманида аҳоли вакиллари, нуронийлар билан дилдан суҳбатлашиши халқимизнинг давлатимиз раҳбаридан миннатдорлик туйғуларини янада оширди.
Халқимизда «Ўз уйингни ўзинг асра», «Ўз болангни ўзинг асра» сингари донишмандлик фикрлар бежизга айтилмаган,
Фарзандларимиз тарбиясида бўшлиққа йўл қўйиб бўлмайди.
Ёшлар тарбиясидаги озгина эътиборсизлик, бугунги таҳликали, глобаллашув даврида ўрни тўлмас йўқотишларга сабаб бўлиши аниқ.
Яратганга шукрлар бўлсин, бугун Қорақалпоғистонда осойишта ҳаёт изга тушиб, кўнгилларидаги хавотир ариди, юртдошларимиз эзгу ниятлар билан мамлакатимиз ва фарзандларимиз келажаги йўлида ўз фидойиликларини кўрсатиб меҳнат қилмоқдалар.

Нурлыбай ҚАЙПБEРГEНОВ,

«Адолат» СДП Қорақалпоғистон Республикаси Кенгаши раиси