Коррупция – келажак авлод учун хиёнат

Жорий йилнинг 22 апрель куни Президент Шавкат Мирзиёев хизмат кўрсатиш соҳасини ривожлантириш масалалари бўйича ўтказилган видеоселектор йиғилишида Самарқанд ва Андижон мисолида коррупцияга қарши курашиш сустлиги учун мутасаддиларни қаттиқ танқид қилди.

Президентимиз раҳбарлигидаги ушбу видеоселекторда энг кўп коррупция қурилиш, тиббиёт, мактабгача таълим соҳаларида юз бераётгани таъкидланди.

Президентимиз нутқини тинглар эканман, асосан бюджет маблағларининг талон-торож қилинганлиги мени қаттиқ ташвишга солди. Ташвишга солган нарса фаровон келажагимиз учун ажириталаётган маблағларни нима учун талон-торож қилади, нима ҳаққи бор деган саволлар қийнади. Бу халқимизга бўлган тўғридан-тўғри хиёнат эмасми?

Президентимизнинг биринчилардан бўлиб имзолаган ҳужжати бу «Коррупцияга қарши кураш тўғрисида»ги Қонуни ҳисобланади. Бундан ташқари коррупцияга қарши курашиш уни бартараф этиш бўйича бир нечта қарорлар ҳам қабул қилинган эди. Шунга қарамасдан ҳалигача бу иллат давом этмоқда.

Ушбу ойда ўтказилган Олий Мажлис Сенати йиғилишида Сенат раиси Танзила Норбоева соҳаларда йўл қўйилаётган коррупциявий ҳолатлар йилдан йилга кўпайиб бораётганини таъкидлади.

Биргина Халқ таълими ва соғлиқни сақлаш тизимида катта миқдорда молиявий камчиликлар аниқланган. Бу ишларни келажак авлод қандай баҳолайди экан? Ҳар бир ўтган кунимиз тарих деймиз. Агар тарихимизни шундай қилиб яратадиган бўлсак, келажак авлод бизни ҳеч қачон кечирмаслиги аниқ.

Яна бир савол туғилади, умуман олганда шу каби соҳаларда ички назорат тизими йўқми, бюджет маблағларининг тўғри тасарруф этилишига бевосита жавобгар бўлган ташкилотлар қаерга қараяпти?

Ўзбекистон «Адолат» СДП аҳолининг барча қатламлари орасида, айниқса, ёшларда коррупцияга қарши муросасиз кураш маданиятини кучайтиришни муҳим деб ҳисоблайди. Партиямиз коррупция билан курашиш нафақат давлат органлари ва ҳуқуқни муҳофаза этиш тузилмаларининг вазифаси, балки бутун жамиятнинг бурчи эканлигини эътироф этади. Шундай экан партия ушбу иллатни таг–томири билан йўқотиш учун курашади ва бу йўлдан қайтмайди.

Президентимиз таъкидлаб ўтканидек «Энди қонун устувор, жазо муқаррар бўлади».

Гулхатша АЙЫМБЕТОВА,

Қорақалпоғистон Республикаси

Жўқорғи Кенгеси депутати,

Партия “Аёллар қаноти” Кенгаши аъзоси