Коррупцияга қарши руҳдаги саҳна кўринишлари намойиш этилди

Коррупцияга қарши курашиш бутун дунёда глобал аҳамиятга эга муаммолардан биридир. Биз коррупциянинг қанчалик жиддий иллат эканлигини таълим олаётган ёшлар онгига сингдирмоғимиз зарур. Чунки айнан улар бизнинг келажагимиздир. Маълумки, Ўзбекистон Республикаси Президенти Шавкат Мирзиёевнинг 2019 йил 27 майдаги “Ўзбекистон Республикасида Коррупцияга қарши курашиш тизимини янада такомиллаштириш чора-тадбирлари тўғрисида”ги ПФ-5729-сон Фармони қабул қилинган эди. Унинг мазмун-моҳиятини кенг жамоатчиликка етказиш тегишли ташкилотларнинг  зиммасига катта масъулият юклайди.

“Коррупция” деганда нимани тушунамиз, у ўзи нима? Юридик энциклопедияда: “Коррупция – мансабдор шахслар ўзларига берилган ҳуқуқлар ва ҳокимият ваколатларидан шахсий бойлик орттириш учун фойдаланишда ифодаланувчи сиёсат ёки давлат бошқаруви соҳасидаги жиноий фаолият” сифатида ифода этилган. Мазкур иллат мамлакатларнинг иқтисодий ривожланишига путур етказади, демократик институтларни заифлаштиради, ижтимоий тартибни бузади. Коррупциянинг олдини олишнинг асосий йўлларидан бири, шубҳасиз, аҳолининг, давлат ва жамоат ташкилоти вакилларининг ҳуқуқий маданиятини юксалтириш, жамиятда қонун устуворлигини таъминлаш ҳисобланади.

Бунга қарши барча биргаликда курашсагина, муайян натижага эришиш мумкин. Шундай экан, бу борада барчамиз фаол бўлишимиз,биргаликда курашишимиз зарур.

Жорий йилнинг 3 июнь куни Қашқадарё Юридик техникумида  Ўзбекистон “Адолот” СДП Қашқадарё вилоят ва шаҳар Кенгашлари, Қарши шаҳар ИИБ, вилоят Адлия бошқармаси билан ҳамкорликда “Коррупция тараққиётга тўсиқ” мавзусида амалий семинар ташкил этилди. Ўтказилган амалий семинарда ушу таълим муассасаида таълим олаётган партия фаолларига мавзу юзасидан керакли маълумотлар ва қонун янгиликлари тўғрисида тушунчалар берилди. Талабалар томонидан саҳнавий кўринишлар намойиш этилди.

Хулоса сифатида айтиш мумкинки, бугунги кунда коррупцияга қарши курашиш ҳар бир давлат сиёсатининг энг устувор йўналишларидан бири бўлиб қолмоқда. Муҳтарам Президентимиз таъбирлари билан айтганда коррупция деган бало, яъни порахўрлик, таъмагирлик, хизмат вазифасини суиистеъмол қилиш каби иллатлар учраб тураётганини инкор этиб бўлмайди. Қонунга зид бўлган бундай хунук холатлар билан муроса қилишга чек қўйишнинг вақти келди!

                                                        Бахоргул НОМОЗОВА,

Қашқадарё Юридик техникуми

ўқитувчиси, партия фаоли