Коррупциялашган тизимнинг келажаги йўқ

Мамлакатимиз тараққиётида қоррупция асосий ғов бўлмоқда. Давлат томонидан олиб борилаётган ислоҳотларда унга қарши кураш тўхтамаяпти. Коррупцияга қарши курашиш агентлиги тузилиб, жойларда ушбу иллатни йўқотиш бўйича илдам ишлар олиб борилаётган бўлса-да, бироқ унинг чуқур ва мустаҳкам илдизига таъсир қилмаяпти. Сабаб нима? Албатта, муаммо яна жамият одамларига келиб тақалади. Инсонларнинг ўзлари тартиб-қоидаларга амал қилмас эканлар коррупциялашган тизим чуқурлашса чуқурлашадики, асло камаймайди.

Барчамизга яхши таниш бўлса керак. Яқинда пойтахтда ер усти метролари қурилиб фойдаланишга топширилди. Бундан фуқаролар жуда хурсанд. Метролар тармоғининг кенгайгани ва чекка ҳудудларга ҳам етиб бориши, албатта, кўпчиликнинг орзуси бўлган. Аммо масалани бошқа томондан олиб қараганда қурилиш сифатига эътибор қаратилмагани ёки метро қурилиши учун ажратилган пуллардан 900 миллион сўм камомад чиқишини қандай изоҳлаш мумкин?! Бу ишларнинг бошида турган мансабдор ўз фойдаси, жиғилдонини кўзлаб хизмат вазифасини суистеъмол қилса-я. Лойиҳага жалб қилинган пулларни киссасига урса, бу кетишда жамият қай томон юз буради? Йўқлик ва жар ёқасига келиб қолишини ва қулашини жимгина кузатамизми ёки халокат юз бермаслиги учун бирдамликда курашамизми? Бу ёғи эса сиз-у бизга боғлиқ жараён.

Бу каби мисолларни ҳар қадамда ва ҳар ерда учратиш мумкин. Негаки, коррупция кириб бормаган соҳа, эшигини қоқиб кирмаган хонадон йўқ. Унга қарши қандай курашамиз, деган савол бизни қийнаши мумкин. Албатта, ўз хатти-ҳаракатимиз ва амалларимиз билан коррупцияни енгишимиз мумкин. Пора олиш, бирор бир ишимизни битириб олиш учун пора бермаслигимиз ёки ўз хизмат вазифамизда таъмагирлик, товламачилик ишларига йўл қўймаслигимиз зарур.

Мазкур метро қурилишида ҳам шунча маблағнинг талон-тарож қилинишида ваколатли мансабдорнинг ўз вазифасидан фойдаланиб халқ ҳақига ҳиёнат қилганини билдик. Бу каби ишлар тугамас экан, ёрқин келажакдан умид қилиш даргумон.

Бахром ВАЛИЕВ,

Ўзбекистон “Адолат” СДП

Тошкент шаҳар Кенгаши раиси