Навоий кўчасида нима бўлди?

Ўтган шанба, яъни 24 апрелда ижтимоий  тармоқларда Наманган шаҳрининг Навоий кўчасида юз  берган воқеа ҳа  қида хабар  тарқалди.  Унда янги қурилаётган уйга  канализация  тармоғини тортиш учун бошланган ишда фожеа содир бўлганлиги айтилганди. Оқибатда икки оила боқувчисиз қолди, яқинлари бошига қайғу алами тушди. Ахир эрталаб уйдан соппа-соғ чиқиб кетган инсоннинг кечқурун  мурдасини кутиб  олиш  қанчалик оғир...

Маълум қилинишича, воқеа Наманган шаҳрининг Навоий ва Тўрақўрғон кўчалари кесишмаси ҳудудидаги айлана яқинидаги ҳудудда  кундузги соат  иккига яқин рўй берган. Бу ерда янги қурилаётган кўп қаватли уйлар  учун йўлнинг ўртасида канализация тармоғи тортиш учун  хандақ қазилган. Унинг узунлиги 5, эни 2, чуқурлиги 4 метр бўлган. Кутилмаганда  хандақ атрофидаги тупроқ уюми емирилиб,  кўчки ҳосил бўлган ва унинг тубидаги икки ишчини босиб    қолган. Ҳозирча бу  техника хавфсизлигига риоя қилинмаганлиги оқибати, деб  тахмин қилинмоқда.

Зудлик билан вилоят Фавқулодда вазиятлар бошқармасига тезкор хабар берилган. Воқеа  жойига етиб келган қутқарувчилар тупроқ остидан жабрланганларни чиқариб, тиббиёт ходимларига топширганлар. Бироқ уларнинг ҳаётини сақлаб қолишнинг иложи бўлмаган.

Аниқланишича, қурбонлар объект қурлишига жалб этилган ёлланма ишчилар экан.    Уларнинг бири – 54 ёшли Шуҳрат Акбаров Наманган туманининг «Навбаҳор» маҳалласида яшаган,  иккинчиси – 50 ёшли Ёдгор Каримов эса Чортоқ туманидаги “Чортоқ” маҳалласида истиқомат қилган.

Рўй берган ҳолат юзасидан суриштирув ишлари давом этмоқда. Албатта, фожеанинг сабаблари  аниқланади,  тегишли  чоралар кўрилади.  Лекин икки инсоннинг умрини тиклаб  бўлмайди. Шунинг учун баъзи    бир  мулоҳазаларга боради, киши. Шундай воқеа содир бўлмаслиги мумкинмиди? – деган савол  туғилади. Унинг жавоби ҳақида ўйланганда халқимизнинг бир нақли эсга   тушади. Кўза кунда эмас, кунида синади, дейишган донолар.

Гап шундаки, юқорида тилга олинган объект Навоий кўчасида қурилаётган ва расмий ҳужжатларда 1-сонли “Савдо шохобчаларини ўз ичига олган кўп қаватли турар-жой” деб қайд этилган. Унинг буюртмачиси ва пудратчиси “Azizbek Avtogaz Servis” масъулияти чекланган жамияти ҳисобланади. Вилоят қурилиш соҳасида  назорат инспекциясидан берилган маълумотда айтилишича, бу ерда аввал ўтказилган ўрганишларда  лойиҳа талабларини бузиш, техника хавфсизлиги қоидаларига риоя этмаслик, ишлаб чиқариш қоидаларига амал қилмаслик ҳолатлари кўп марта аниқланган. МЧЖ раҳбариятига бу ҳақда огоҳлантириш хатлари берилган. Лекин кўриниб турибдки, мутасадди шахслар тегишли хулосаларни чиқармаганлар. Уларнинг белгиланган тартиб-қоидаларни писанд  этмасликлари канализация тармоғи тортиш учун кўчада қазиш ишларини амалга оширишга шаҳар ҳокимлигининг тегишли рухсатномасини  олинмаганлигида  ҳам яққол кўга ташланмоқда.

Нурбек АБДУЛЛАЕВ,

Ўзбекистон “Адолат” СДП Наманган вилоят Кенгаши матбуот котиби