Партиядошимиз ёзган китоб

Тажрибали шифокор Иброҳим Абдуллаевни Наманганда кўпчилик яхши танийди. У қирқ йилдан зиёд вақтдан бери ҳозирги вилоят кўп тармоқли болалар тиббиёт марказида меҳнат қилади. Соҳадаги узоқ йиллик самарали фаолияти давлатимиз томонидан муносиб тақдирланган. “Эл-юрт ҳурмати” ва иккинчи даражали “Соғлом авлод учун” орденлари билан мукофотланган.

Иброҳим ака Ўзбекистон “Адолат” СДП фахрийларидан ҳисобланади. У бир неча йил мобайнида юқорида тилга олинган шифохонада БПТ раиси сифатида фаолият олиб борган. 2014-2019 йилларда партиямиздан халқ депутатлари Наманган вилоят кенгаши депутати бўлган. Ҳозир ҳам кўп тармоқли болалар тиббиёт марказида бўлим мудири. Ўзининг бой иш тажрибасини ёшларга ўргатиб келмоқда.

Яқинда Иброҳим ака Абдуллаев ўзини ижодкор сифатида ҳам кўпчиликка таништирди. Намангандаги “Усмон Носир медиа” нашриёти унинг “Мен сиздан шифо топдим” номли китобини чоп этди. У партиядошимиз меҳнат қилаётган тиббиёт марказининг фаолиятига бағишланган.

– Мен шу шифохонада у ташкил топгандан бери ишлайман, - дейди муаллиф – Юзлаб ҳамкасбларимизнинг эл саломатлиги йўлида жонбозлик кўрсатиб ишлаганига гувоҳман. Улар ҳақида бир эсдалик китоб битишни орзу қилгандим. Шунинг учун кўп нарсаларни ён дафтаримга қайд этиб юрардим. Мана, ниятимга эришдим. У ўқувчиларга, айниқса, ҳамкасбларимизга маъқул тушса, ўзимни бениҳоя бахтиёр ҳис этардим.

Рисолада шифохона жамоасининг босиб ўтган қирқ йиллик йўли қаламга олинган. Кўплаб қизиқарли фактлар, ёрқин мисоллар келтирилган. Фидойи шифокорларнинг меҳнат йўли ҳақида батафсил ҳикоя қилинган. Китоб тиббиёт марказининг тарихига оид кўпдан-кўп фотосуратлар билан безатилганлиги билан ҳам диққатга сазовордир.

   Нурбек АБДУЛЛАЕВ,  Ўзбекистон “Адолат” СДП

Наманган вилоят Кенгаши матбуот котиби