Унутмайлик, мурожаат ортида инсон бор

Муҳтарам Президентимиз бошчилигида қонун устувор бўлган, демократик жамият қурмоқдамиз. Шу ниятда қадамба-қадам тегишли қонунлар қабул қилинаяпти, уларни амалга ошириш борасида тегишинча тадбирлар кўрилаяпти. Одамларни иш билан банд этиш, мурожаатларини ўз вақтида ўрганиб, ижобий ечим топиш чоралари кўрилаяпти.

Бу борада Ўзбекистон “Адолат” СДП вилоят ва туман Кенгашлари томонидан амалга оширилаётган хайрли ташаббуслар кўпчиликка манзур бўлаётир.

Жорий йилнинг ўтган ойларида партиянинг вилоят ва туман ташкилотларига фуқаролардан 400 дан ортиқ мурожаат бўлган. Уларнинг қарийб ярми ариза ва шикоятлардир.  Фуқаролар кредит олиш, тадбиркорлик билан шуғулланиш ва жойларда у ёки бу соҳада юз бераётган камчиликлар  кўрсатилган ёзма ва оғзаки мурожаатлар қилишаяпти. Вилоят Кенгаши  фаоллари  Президентимизнинг халқимиз бугун яхши яшаши  керак, деган кўрсатмасига асосан, ёшлар ва фуқаролардан келиб тушаётган  мурожаатларни вилоят ва туман ҳокимликларига, ҳуқуқни муҳофаза қилувчи органларга, республика вазирликларига  текшириш ва чора кўриш учун юбормасдан партиянинг туман Кенгашлари ва мутасадди идоралар  вакиллари билан ҳамкорликда жойида ўрганишаяпти.

Худди шундай ўрганишлар Шахрисабз туманида ўтказилганда  партиянинг “Бир ойда бир иш ўрни“ лойиҳаси доирасида 100 нафар  фуқаронинг мурожаати ҳал этилди. 30 нафар фуқаро кредит олиб, ўз тадбиркорлигини йўлга қўйган бўлса, 20 нафар киши касб-ҳунарга ўқитилиб,  50 нафар одамга эса мутасаддилар ҳамкорлигида 10-50 сотихдан ер ажратиб берилди. Партия фаолларининг беминнат кўмаги  ва эътибори туфали жорий йилнинг апрель ойида 100 нафар фуқаро ўз муқим иш жойига эга бўлди. Биз уларнинг айримлари билан мулоқотда бўлдик.

-Менга тадбиркорлик билан шуғулланишим учун  Агро  банкдан 30 миллион  сўм кредит олишда амалий ёрдам беришгани учун Ўзбекистон “Адолат” СДП фаоллари ва депутатларга миннатдорчилик билдираман,-дейди Шахрисабз туманидаги “Тошбулоқ” МФЙда яшовчи Савриддин Муҳаммадиев.- Ҳозир ушбу кредит ҳисобига аҳолига  маиший хизмат  кўрсатиш шахобчаларини очаяпман. Сартарошхона, этикдўзлик, темирчилик, ҳунармандчилик ва автомобилларга техник хизмат кўрсатишни йўлга қўймоқчиман.  6 нафар  маҳалламиз ёшларини иш билан таъминлайман.

-Мен ҳам партия кўмаги туфайли тикувчилик цехини очиб ўзимга ўхшаган 4 нафар  қизларни ишга жалб этдим,-дейди  “Сарой” МФЙда истиқомат қилувчи ёш  тадбиркор  Дилноза Эштўхтарова. - Фуқаролар талабига мос хушбичим кийимлар тикаётганимиз учун буюртма кўп тушаяпти. Шунга асосан ойликларимиз ҳам кўнгилдагидек. Келгусида савдо шахобчалари билан шартнамалар тузиб, уйда ўтирган қишлоғимиздаги хотин-қизларни касаначилик ишларига жалб этмоқчиман.

                                                            Гулноза  Раджабова