Вакцинация – саломатлик кафолати

“Адолат” СДП Сиёсий Кенгаши ташаббуси билан партиянинг Тошкент вилояти Кенгаши ҳамкорликда Нурафшон шаҳар Марказий поликлиникасида кўнгиллилар ва партия фаоллари иштирокида “Биз ихтиёрий вакцинациялаш  тарафдоримиз” шиори остида  COVID-19 га қарши янги форматдаги оммавий эмланиш тарғибот тадбири ташкил қилинди.

Унда “Адолат” СДП Сиёсий Кенгаши Марказий аппарати ходимлари, партиянинг Тошкент вилоят Кенгаши фаоллари, депутатлар, таниқли санъаткорлар, адабиёт, спорт, маданият соҳасиамда  ОАВ  вакиллари иштирок этишди. Пойтахтдан ташриф буюрган санъаткорларнинг чиқишлари йиғилганлар кайфиятига кайфият қўшиб, тадбирнинг янада файзли ўтишини таъминлади.

Маълумки, ҳозирда  бутун дунёда коронавирус билан касалланиш даражаси ортиб бораётганлиги барча халқларни таҳликага солиб қўймоқда.

Мамлакатимиздаги бугунги ижтимоий-сиёсий масалалардан бири – аҳоли саломатлигини сақлаш, айниқса, пандемиядан асраш бўлиб турибди. Бу ҳақда ҳатто Ўзбекистон Республикасининг қонунида ҳам алоҳида чора-тадбирлар белгиланди. Шунингдек, бу борада Президент ва ҳукуматимиз томонидан кундан-кунга янгидан-янги чора-тадбирлар амалга ошириляпти. Бинобарин, жорий йил 5 майдан кучга кирган Президентнинг  “Соғлиқни сақлаш соҳасини комплекс ривожлантиришга доир қўшимча чора-тадбирлар тўғрисида”ги қарори ушбу саъй-ҳаракатларнинг давоми бўлди.

Юртимизда пандемияга қарши курашиш тадбирлари қатъий давом эттирилаётганига қарамай, янги коронавирус касаллигига чалинганлар сони кун сайин ошиб бораётгани, ташвишланарли ҳолат, албатта.

Дарҳақиқат, бугунги ўтказилган марафондан кўзланган мақсад ҳам аҳолини пандемия ҳавфидан асраш, аҳоли орасида вакцина олишни тарғиб этиш ва оммавий  вакцина олишига эришишдир.  

Айтиш жоизки, партия инсон, унинг ҳаёти давомийлигини таъминловчи эмланишнинг қанчалик зарур эканлигини  ҳисобга олиб касалликка қарши энг самарали усул – унга қарши вакцина олиш борасидаги улкан ишларга муносиб ҳисса қўшишни ўз олдига устувор вазифа сифатида қўйган.

Бугунги уюшқоқлик билан ташкил этилган марафонда партия ташкил этилганининг илк кунларида у билан бирга бўлган фаоллар, депутатлар, халқимиз суйган маданият ва санъат соҳаси вакиллари, таниқли спортчилар фаол иштирок этмоқда.

Заира Таирова, “Маърифат” МФЙ раис ўринбосари:

–Одамлар орасида турли ваҳима, асоссиз гумонлар тарқалган: вакцина олгандан кейин аҳвол ёмонлашиб қоларкан, вакцина йиллар ўтиб инсон саломатлигига салбий таъсир кўрсатаркан ва ҳоказо... Йўқ, эмланишдан қўрқиш керак эмас. Вакцина амалиётидан кейинги бир - икки кунда ўтиб кетадиган вақтинчалик ҳолсизлик ва бироз оғриққа чидаш касалликка чалиниб, ҳаво етмасдан реанимацияга тушиш ва ўлим билан якун топадиган қаттиқ жон азобидан солиштириб бўлмас даражада афзал. Табиийки, вакцина билакка қилинганидан кейин кучсиз оғриқ ҳис қиламиз, айримларда 3 кунгача бироз тана ҳароратининг кўтарилиши кузатилиши мумкин. Бу табиий жараён, ҳатто яхши белги. Демак организмда иммунитет пайдо бўляпти.Мен бугун вакцина олдим. Сиз-чи!? Ўзингиз ва яқинларингиз соғлиғига бефарқ бўлманг!

Дилфуза Абдуллаева Нурафшон Марказий поликлиникаси эпидемиолог шифокори:

– Бугун вазият кечагидан жиддий. Илгари касаллик тарқалиши нисбатан секин эди. Беморлар 7-8 кунгача вирусни сезмасди. Кейинги хафтада организмда оғирлик сезиларди. Ҳозир мутлақ бошқача ҳолат. Вирус тушган организмда касаллик икки-уч кунда авж олиб, тез оғир ҳолат ва ҳаттоки ўлим билан якун топяпти. Ўпкани тез ишдан чиқаряпти. Айни кунда ҳомиладор аёллар ва ёш болалар ўртасида коронавирус инфекцияси, афсуски, юқори кўрсаткичларда ўзини намоён этяпти. Яна омма ичида ёши катталар, сурункали касали борлар, ногиронлар бор. Уларнинг организмига вирус тез мослашади. Шу сабабли биз уларнинг яқинларига тўғри маслаҳатларни бериб, тарғиботнинг энг оммабоп усулларини қўллашимиз керак, деб ўйлайман. Штаммлар ва мутация афсуски мавжуд. Уни тўхтатишнинг ягона йўли – бу вакцинация. Бугунги партиянинг тарғибот тадбирида 200 нафардан зиёд фуқаролар ZF-UZ-VAC2001, Moderna, Astra Zeneca каби вакцина билан эмланишди.

Лазиз Назаров, Нарафшон шаҳар Чиғириқ қўрғонида яшовчи, хусусий тадбиркор:

–Марафон доирасида Ковидга қарши эмлаш тадбирлари уюшқоқлик билан олиб борилмоқда. Бугун мен коронавирус инфекциясига қарши ZF-UZ-VAC2001 вакцинасини олдим.

Эмланиш – фақат ўзимиз учун эмас, балки жамият соғлиғи учун ҳам ўта муҳим. Эмланиш – бу барчамизнинг фуқаролик бурчимиздир! Мен барча юртдошларимни   вакцина олишга, эмланиш тадбирларида фаол иштирок этишга чорлаб қоламан!

Таъкидлаш керакки, ҳали вирусга қарши вакцина олган ҳеч бир фуқарода коронавирус билан касалланиш ҳолати аниқланмади. Шундай экан, ҳамюртларимиз вакцинация жараёнларида фаол бўлишлари касаллик тарқалишини тўхтатишнинг асосий омили бўлиши мумкин.

Нурафшондаги  тадбир ана шундай кўтаринки руҳда ўтди.

“Адолат” СДП Тошкент вилояти Кенгаши матбуот хизмати