«Ёшлар парламенти» аъзоси болаларга совға улашди

Халқаро болаларни ҳимоя қилиш куни муносабати билан Олий Мажлис Сенати ҳузуридаги «Ёшлар парламенти» аъзоси, Халқ депутатлари Фарғона туман Кенгаши депутати Файзулла Мирзаев туманнинг «Янги аср» МФЙдаги «Келажак ва бахт» оилавий болалар уйи тарбияланувчилари билан учрашиб, уларни байрам билан табриклади.

Болажонларга эсдалик совғалари берилиб, Ватанимиз равнақига ҳисса қўшадиган муносиб фарзандлар бўлиб камол топишлари тиланди. Уларни бағрига олиб, тарбия бераётган ота-оналарига миннатдорчилик билдирилди.

- Болаларнинг кўзларидаги қувончни кўрсам, яйраб кетаман, – дейди депутат. – Мазкур оила бағрида униб-ўсаётган 7 нафар қизларнинг барчаси бугун меҳр ва ғамхўрлик оғушида. Келгусида халқимиз корига камарбаста инсон бўлиб камолга етишлари, шубҳасиз. Ота-оналари билан суҳбат чоғида ҳам уларнинг қизиқишлари, мақсад ва орзуларини эшитиб, бунга яна бир карра амин бўлдик.

Шунингдек, «Ёшлар парламенти» аъзоси туманнинг Аввал қишлоғидаги 10 нафар болажонларнинг хатна тўйида ҳам иштирок этди.

Озода Дадажонова,

Халқ депутатлари Фарғона туман Кенгаши депутати.