Заминга меҳр ташкилотчилик ва ташаббусга чорлайди

Айтишларича, Тошкент  вилоятининг у четидан тонгда йўлга чиқсангиз, бу четига шомда етиб келишингиз мумкин экан. Бу қанчалик маъжозий маънода айтилган билмадик-у, вилоятимиз  нафақат ижтимоий ва иқтисодий кўламда салоҳиятли, балки республикамизнинг ҳудудий жиҳатдан ҳам йирик масканларидан ҳисобланади.

Бу йирикликнинг ўзига хос ташвиши, масъулияти бўлганидек, уни бошқаришда мураккабликлар мавжудлигини ҳам инкор қилиб бўлмайди. Аммо замон шуни талаб қилмоқдаки, қанчалик залворли ва ташвишли бўлмасин, халқни рози қилиш учун ҳар қачонгидан ҳам шиддатли, шижоатли бўлиш лозим.

Тошкент вилоятига раҳбарликни ҳамма ўйлаб кўради. Аввал бошдан бундай катта вилоятни қандай эплаш мумкин деган савол туғилиши табиий. Аммо унга кириб боргандан сўнг, ранг-баранг табиати, одамларига меҳр қўймай иложи йўқ. Шоир ва сенатор Махмуд Тоир таърифлаганидек, “Ўзбекистонни Швецарияси” бўлмиш Бўстонлиқ, узуми тилни ёрадиган Паркент, муқаддас қадамжоли Зангиотага тенг келадиган жойлар саноқли юртимизда. Агар бу заминга раҳбар бўламан деган одам ҳақиқий фарзанд бўлиб қадам қўймас экан, албатта мураккабликлар лабиринтига тушиб қолиши ҳеч гап эмас.

Президент Тошкент вилояти раҳбарини тайинлаш учун сўнгги келишларида ана шундай фикрлар ўтган эди ҳаёлимдан. Янги ҳокимни таништирганларида “Менинг командамдан” деганлари, бунга жавобан пойтахтлик кадр  Даврон Хидоятов “Мен шу бугундан Тошкент вилояти фарзандиман” дегани ҳамон ёдимизда.

Ҳақиқатдан ҳам, Тошкент вилоятининг ёш ва фаол замонавий ҳокими Даврон Хидоятов қисқа муддатда, Халқ депутатлари Тошкент вилоят кенгаши раиси сифатида ҳам ўз ўрни ва ҳурматига эга бўлиб, вилоят аҳли ўртасида эътибор ва эътирофга сазовор бўлди. Бир сўз билан айтганда, мамлакатимиздаги иктисодий-ижтиомий ривожланишни яхши тушунадиган, ташкилотчилик ва ташаббускорликда фаоллик кўрсатадиган кадр сифатида кўз олдимизда намоён бўлди.

Айниқса,  Тошкент вилояти бўйича катта хажмдаги бунёдкорлик ишларига қўл урилгани, иқтисодий-ижтимоий соҳалар бўйича туманларнинг ўзига хослиги ўрганиб чиқилиб, ҳар бир ҳудуднинг ривожлантириш режалари амалга оширила бошланди.

Шунингдек, май ойида Чирчиқ шаҳрида минглаб ёшларнинг бошини қовуштириб, форум ташкил этилганлиги, бу ташаббус кенг қулоч ёйиб 22 та туман ва шаҳарларда ўтказилганлиги бутун республикага ўрнак бўлди. Бу ёшларга мотивацион руҳ бағишлаб, креатив фикрлашга ундади.

Тошкент давлат аграр университетида вилоятда бўшаб қолган ўринга Ўзбекистон Республикаси Олий Мажлиси Сенати аъзоси сайловини ўтказиш бўйича қўшма мажлис  жараёнида Халқ депутатлари Тошкент вилояти кенгашининг 60 нафар, туман-шаҳар кенгашларининг 600 нафарга яқин депутатлари айнан Даврон Хидоятов номзодини ёқлаб берганлари бежизга эмас.

Мажлисда Марказий Сайлов комиссияси раиси Зайниддин Низомходжаев сўз олиб, номзодни сайлаш тўғрисида тўлиқ маълумот берди. Сенаторлар, депутатлар сўз олиб, номзод ҳақида ўзларининг илиқ фикрларини беришди. Натижада қўшма мажлисда овоз беришда иштирок этган депутатларнинг 518 нафари Даврон Ҳидоятовни ёқлаб овоз бергани маълум қилинди. Шундай қилиб, вилоят ҳокими мутлоқ кўпчилик овоз билан Олий Мажлис Сенати аъзоси этиб сайланди.

Гулнора АҲМЕДОВА,

Халқ депутатлари Тошкент вилояти кенгаши депутати