Adliya boshqarmasi tomonidan Halima Xudoyberdiyeva nomidagi ijod maktabida “Korrupsiya - taraqqiyotga gʻov” mavzusida seminar tashkil qilindi

Sirdaryo viloyat adliya boshqarmasi

9-dekabr - Xalqaro korrupsiyaga qarshi kurashish kuni munosabati Sirdaryo viloyat adliya boshqarmasi tomonidan Halima Xudoyberdiyeva nomidagi ijod maktabida “Korrupsiya - taraqqiyotga gʻov” mavzusida seminar tashkil qilindi.

Sirdaryo viloyat adliya boshqarmasi

Tadbirni ijod maktabi direktori shoir Muhammad Ismoil kirish soʻzi bilan ochdi va boshqarib bordi. 

Taʼkidlanganidek, korrupsiyaga nisbatan murosasiz munosabatni qaror toptirish bugun har qachongidan-da dolzarb ahamiyat kasb etadi. Unga qarshi har kim, har doim kurashishi, bu illatning jamiyatga, taraqqiyotga va xavfsizlikka katta tahdid ekanini har bir ongli inson chuqur anglashi lozim. 

Sirdaryo viloyat adliya boshqarmasi

Seminarda mamlakatimizda korrupsiyaning oldini olish va unga qarshi kurashish boʻyicha amalga oshirilayotgan izchil chora-tadbirlar, bu borada qabul qilinayotgan qonun hujjatlarining mazmun-mohiyatiga alohida toʻxtalib oʻtildi.

Sirdaryo viloyat adliya boshqarmasi

Tadbirda soʻz olgan adliya boshqarmasi Prezident hujjatlari va topshiriqlari ijrosini nazorat qilish boʻlimi boshligʻi Davron Burxonov “korrupsiya” soʻzining mohiyatiga urgʻu berib, u mansabdor shaxslar oʻzlariga berilgan huquqlar va hokimiyat vakolatlaridan shaxsiy boylik orttirish uchun foydalanishda ifodalanuvchi siyosat yoki davlat boshqaruvi sohasidagi jinoiy faoliyat ekanligini ishtirokchilarga tushuntirib oʻtdi.

- Mamlakatimizda davlat organlari va tashkilotlarining faoliyatida ochiqlik, oshkoralik va shaffoflikni taʼminlash hamda mansabdor shaxslarning aholi oldidagi hisobdorligini yoʻlga qoʻyish orqali davlat boshqaruvida samarali va taʼsirchan jamoatchilik nazoratini amalga oshirish uchun zarur sharoitlar yaratildi. Korrupsiyaga qarshi kurashish va korrupsiyaviy holatlarning barvaqt oldini olish tizimi samaradorligini oshirish, ushbu jarayonga jamoatchilikni keng jalb etish va korrupsiyaga nisbatan murosasiz munosabatda boʻlish muhitini shakllantirish maqsadida qabul qilingan Farmon bu borada muhim huquqiy asosdir, - dedi D.Burxonov oʻz maʼruzasida. 

Sirdaryo viloyat adliya boshqarmasi

Darhaqiqat, korrupsiyaga oid omillarga chek qoʻyishda ochiqlik va shaffoflik zarur. Tadbir davomida Oʻzbekiston Respublikasi Prezidentining “Korrupsiyaga qarshi murosasiz munosabatda boʻlish muhitini yaratish, davlat va jamiyat boshqaruvida korrupsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʻgʻrisida”gi Farmoni, “Korrupsiyaga qarshi kurashish faoliyatini samarali tashkil etishga doir qoʻshimcha chora-tadbirlar toʻgʻrisida”gi qarori mazmun-mohiyati toʻgʻrisida keng maʼlumotlar berildi.

Sirdaryo viloyat adliya boshqarmasi

Shuningdek, tadbirda Adliya boshqarmasi Huquqiy targʻibot va maʼrifat boʻlimi boshligʻi Dilnoz Umurzoqova soʻzga chiqib, Oʻzbekiston Respublikasining korrupsiyaga qarshi kurashish tizimini takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisidagi Qonuni mazmun-mohiyati toʻgʻrisida oʻz fikr-mulohazalarini bildirdi. 

Bundan tashqari, tadbir davomida Adliya vazirligi tomonidan Konstitutsiyaviy sud bilan hamkorlikda fuqarolarning Konstitutsiya haqidagi bilimlarini sinovdan oʻtkazish maqsadida umummilliy Konstitutsiya imtihoni oʻtkazilayotganligi, imtihon shartlari, unda ishtirok etish uchun roʻyxatdan oʻtish tartibi batafsil tushuntirildi.

Tadbir ochiq muloqot tarzida savol-javob va munozaraga boy boʻldi.

Sirdaryo viloyat adliya boshqarmasi

Xulosa oʻrnida aytganda, korrupsiya va poraxoʻrlik jamiyat barqarorligining muhim asosi boʻlgan adolatning yoʻqolishiga olib keladi. Xalqimiz farovonligi, yurtimiz ravnaqini, uning gullab yashnab, obod boʻlishini istagan har bir fuqaro bu illatdan xalos boʻlishi, Prezidentimiz taʼbirlari bilan aytganda, “halollik vaksinasi” bilan emlanishi lozim.

Sirdaryo viloyat adliya boshqarmasi Huquqiy targʻibot va maʼrifat boʻlimi