Bilimli avlod-buyuk kelajak va taraqqiyot kafolati

Sherobod tuman Abu Ali ibn Sino nomidagi salomatlik texnikumida taʼlim muassasalarining oʻquvchilari oʻrtasida Oʻzbekiston “Adolat” SDP “Yosh adolatchilar” qanoti tomonidan oʻtkazib kelinayotgan anʼanaviy “Konstitutsiya bilimdoni” koʻrik-tanlovining tuman bosqichi boʻlib oʻtdi.

Tadbir avvalida partiyaning Sherobod tuman Kengashi raisi Qarshi Allanazarov ochib berdi va tadbirning asosiy maqsadi toʻgʻrisida atroflicha ishtirokchilarni tanishtirib oʻtdi. Mazkur tanlovdan koʻzlangan maqsad yangi tahrirdagi Bosh qomusimizning mazmun-mohiyatini keng targʻib etish orqali yoshlarning siyosiy-huquqiy bilimini oshirish, ijtimoiy-siyosiy jarayonlarda faolligini taʼminlashdan iborat ekanligi xususida tushuntirib oʻtdi.

Bellashuvlar jarayonida yoshlarning huquqiy va siyosiy bilimlarini mustahkamlash, ularning orasidan eng iqtidorlilarini aniqlash va ragʻbatlantirish hamda partiyaning dasturiy maqsad-vazifalarining mazmun-mohiyatiga yoshlarning eʼtiborini keng jalb qilishga alohida urgʻu berildi.

Koʻrik-tanlovning tanishtiruv, siyosiy-huquqiy sohadagi bilimlar, turli sahna koʻrinishlari, “Partiya mening tasavvurimda” kabi shartlar boʻyicha oʻz bilim va qobiliyatlarini sinab koʻrishdi. Qizgʻin va koʻtarinki ruhda oʻtgan bellashuvlar yakunida gʻoliblikni Sherobod tibbiyot texnikumi 2-kurs talabasi Feruza Qudratova qoʻlga kiritib viloyat bosqichida qatnashish uchun yoʻllanma oldi.

Shuningdek, mazkur koʻrik tanlovning tuman bosqichi partiyaning Qiziriq tuman Kengashi tomonidan Qiziriq pedagogika kollejida ham tashkil etildi. Tanlov davomida tuman “Yosh adolatchilar qanoti” faollari gʻoliblik uchun oʻz bilimlarini sinovdan oʻtkazishdi.

Uchta shart boʻyicha boʻlib oʻtgan bahslardan soʻng hakamlar hayʼati tomonidan tanlovning gʻolib va sovrindorlari aniqlandi. Qizgʻin oʻtgan bahslardan soʻng Qiziriq pedagogika kollejining 2-kurs talabasi Ogʻabek Gʻafforov 1-oʻrinni egallab viloyat bosqichiga yoʻllanma oldi.

Tadbirda ishtirok etgan bilimdon yoshlar partiyaning diplomlari va qimmatbaho sovgʻalari bilan taqdirlandilar.

Gulshod Tursoatova,

“Adolat” SDP Surxondaryo viloyat Kengashi matbuot kotibi.