Biz sogʻlom turmush tarafdorimiz!

Jahon sogʻliqni saqlash tashkiloti maʼlumotlariga koʻra, dunyoda qandli diabet kasalligi tobora yasharib bormoqda. Hozir yer yuzi aholisining qariyb 7 foizi ushbu darddan aziyat chekyapti. Ulardan juda katta qismi xastalikning 2-turiga chalingan. Mutaxassislarning xulosa qilishicha, bu kasallikni keltirib chiqaruvchi omillar orasida nosogʻlom turmush tarzi asosiy oʻrinni egallaydi. Shu bois, 14-noyabr — Xalqaro diabetga qarshi kurash kuni deb belgilangan.

Prezidentimizning “Endokrinologiya xizmatini takomillashtirish va koʻlamini kengaytirish chora-tadbirlari toʻgʻrisida”gi qaroriga koʻra, ayni paytda qandli diabet kasalligiga chalingan bemorlarni bepul dori-darmonlar bilan taʼminlash choralari koʻrilmoqda.

Qirq yoshdan oshgan aholini yilda kamida bir marotaba maqsadli skriningdan oʻtkazish tizimi yoʻlga qoʻyilyapti. Surunkali endokrin kasalliklarni davolashning zamonaviy klinik protokollari va algoritmlari joriy etilyapti. Bunda 2022–2024-yillarda aholiga endokrinologiya yordamini koʻrsatishni rivojlantirish dasturi asosida olib borilayotgan ishlar hal qiluvchi ahamiyat kasb etmoqda.

Aholi oʻrtasida qandli diabet xastaligini oldini olish maqsadida “Adolat” SDPning Buxoro viloyati hamda Buxoro shahar Kengashlari tashabbusi bilan shahardagi “Varaxsha” MFYda “Qandli diabetga qarshi kurashish haftaligi” munosabati bilan qirq yoshdan oshgan aholi koʻrikdan oʻtkazildi. Mazkur mahalla aholisining 150 nafari koʻrikka o'z ixtiyori bilan jalb qilindi. Shunda 21 nafar fuqaroda diabet oldi holati va 6 nafarida qandli diabet kasalligi aniqlandi.

Nosirova Shaxlo Shuxratovna, Endokrinologiya dispanseri shifokori:
Agar insonda diabet oldi holatlari kuzatilsa, sog'lom turmush tarziga qat'iy rioya qilish  ta'kidlab o'tildi. Bunday vaziyatda shifokor tavsiyalariga toʻliq rioya etilsa, statsionar sharoitida davolanishga hech qanday ehtiyoj boʻlmaydi. Qondagi qand miqdori sutka davomida doimo toʻliq meʼyorda ushlab turilsa, diabet asoratlarining oldini olish yoki kechiktirish mumkin.

Sanjar Maydonov,
“Adolat” SDP Buxoro viloyat Kengashi raisi oʻrinbosari.