Diabetni toʻxtatamiz

Keyingi vaqtda dunyo boʻyicha qandli diabet kasalligiga chalinganlar soni ortib borayotgani tashvishlanarli.   Bundan Oʻzbekiston aholisi ham holi emas. Katta yoshdagilar bilan bir qatorda yosh bolalarda ham kuzatilayotgani yanada achinarli. Oʻzbekiston “Adolat” SDP Andijon viloyati kengashi tashabbusi bilan Andijon davlat tibbiyot institutida “Diabetni toʻxtatamiz!” shiori ostida oʻtkazilgan davra suhbati ayni shu mavzuga bagʻishlandi.

Partiya faollari, tibbiyot xodimlari, yoshlar va jamoatchilik vakillari ishtirokidagi tadbirda soʻz olganlar kasallikning kelib chiqish sabablari, uni oldini olish, bugungi kunda bu borada tibbiyotda olib borilayotgan islohotlar xususida gapirdilar. Endokrinolog-shifokorlar kasallikdan saqlanish yuzasidan oʻz tavsiyalarini berdi.

Taʼkidlanganidek, 30 yoshgacha boʻlgan fuqarolar oʻrtasida kasallikning 1- tipi uchraydi. Klinik belgilari: bolalar toʻsatdan koma holatiga tushib qoladi, ozish kuzatiladi. Koʻp suv ichish, koʻp ovqat yeyish, bosh ogʻrishi va yonoqlarni qizarishi kuzatiladi. Shu holat kuzatilganda zudlik bilan endokrinologga uchrashish lozim. Qondagi va peshobdagi qand miqdorini aniqlash lozim. Bemor dispanser nazoratiga qoʻyiladi va kuzatuvda boʻladi. 30 yoshdan yuqori boʻlgan fuqarolarda 2-tip kasalligi kuzatiladi. Klinik belgilari: ozib ketish, koʻp suv ichish, koʻp peshobga chiqish, uyqusizlik, asabiylik va oyoqlarning qaqshab ogʻrishi. Bu holatda ham darhol endokrinolog-shifokorga murojaat qilish maqsadga muvofiqdir.

Shahnoza Yusupova, “Adolat” SDP faoli, Andijon davlat tibbiyot instituti kafedra mudiri:

-Kasallikning asosiy sabablaridan biri oʻz salomatligimizga eʼtiborsizligimizdir. Bugun uning yosharib borayotgani bizni tashvishga solmoqda. Kasallikdan saqlanish uchun toʻgʻri ovqatlanish, jismoniy faollikni oshirish va muntazam shifokor koʻrigidan oʻtish lozim. Diabetni oldini olish va toʻxtatishning asosiy yoʻli shu.

Tadbir yakunida boʻlgʻusi shifokor-“adolatchilar”dan iborat targʻibot guruhi tuzildi. Qandli diabetdan saqlanish oyligi doirasida MFYlarda tushuntirish ishlarini olib borishga qaror qilindi.

“Adolat” SDP Andijon viloyati kengashi

Matbuot xizmati.