Faxrimiz va g‘ururimiz ramzi

     Respublikamizning davlat ramzlari xalqimizning shon-sharafi, tarixiy xotirasi va intilishlarini o‘zida mujassam etib, tinch va osoyishta, ozod va erkin hayotimiz, yorug‘ kelajagimizga bo‘lgan ishonchimiz ifodasidir.
     O‘zbekiston “Adolat” SDP Xonobod shahar kengashi tomonidan O‘zbekiston Respublikasining “Davlat bayrog‘i to‘g‘risida”gi qonuni qabul qilingan kun munosabati bilan tashkil etilgan tadbirda ham bu o‘z ifodasini topdi.
     Partiya faollari, hamkor tashkilotlarning vakillari va harbiylar ishtirokidagi tadbir davlatmiz madhiyasi bilan boshlandi. Ma’ruzalarda davlat ramzlarining hayotimizdagi o‘rni, mustaqilligimizning belgisi ekani va bayrog‘imizning o‘ziga xosligi to‘g‘risida so‘z bordi. Bayrog‘imiz O‘zbekiston sarhadida qadimda mavjud bo‘lgan davlatlar bilan tarixan bog‘liqlikni hamda yurtimiz hududida yashovchi millat va elatlarning an’analarini o‘zida mujassamlashtirganligi ta’kidlandi.

     Hulkaroy Mo‘minova, O‘zbekiston “Adolat” SDP Honobod shahar kengashi raisi:
- Milliy bayrog‘imiz bilan barchamiz faxrlanamiz. U turli bayram tantanalarida, mamlakatimiz a’zolari qatnashayotgan xalqaro miqyosdagi tadbirlarda, sport musobaqalarida Vatanimizning sha’ni, xalqimizning g‘ururini yorqin aks ettiradi. Xalqaro sport bellashuvlarida g‘alaba qozongan sportchilarimiz sharafiga yurtimiz bayrog‘i baland ko‘tarilganda har birimiz cheksiz hayajonga tushamiz, hech kimdan kam emasligimizdan g‘ururlanamiz. Zero, bayrog‘imiz - tinch va osoyishta, ozod hamda erkin hayotimiz, yorug‘ kelajagimizga bo‘lgan ishonchimiz timsolidir.
Sahnalashtirilgan chiqishlarda xonobodliklarning bayrog‘imizga bo‘lgan hurmati aks etdi. Milliy bayrog‘imiz Xalqimizning o‘tmishi, buguni va kelajagini o‘zida mujassam etgan Vatanning yorqin timsoli ekanligi ko‘rsatildi.

“Adolat” SDP Andijon viloyat kengashi
Matbuot xizmati.