Halollik vaksinasi - taraqqiyot garovi!

Denov tuman Abu Ali Ibn Sino nomidagi salomatlik texnikumida “Adolat” SDPning asosiy maqsadlaridan biri boʻlgan korrupsiyaga qarshi kurashishni targʻib qilish boʻyicha “Halollik vaksinasi -taraqqiyot garovi” mavzusida tadbir tashkillashtirildi. Tadbirda partiya tuman Kengashi vakillari, deputatlar, tuman IIB xodimlari, texnikum oʻqituvchi-pedagoglari va talaba yoshlar ishtirok etishdi.

Tadbirda soʻzga chiqqanlar korrupsiya illati va uni ildizi bilan quritish masalalari boʻyicha oʻz fikr-mulohazalarini bayon etdilar. Oʻzbekiston Respublikasining “Korrupsiyaga qarshi kurashish toʻgʻrisida”gi Qonunida korrupsiyaga qarshi kurashni keng qamrovda olib borish choralari koʻzda tutilgani, bu borada har bir masalaga alohida eʼtibor qaratilgani bejiz emasligi aytib oʻtildi.

Tadbirda soʻz olganlar korrupsiya balosidan qutulish, islohotlarni uning changalidan qutqarish sharafli burchimiz bo'lishi lozimligini taʼkidladilar. Poraxoʻrlik va tamagirlikdan tiyila olmayotgan shaxslar uchun jazo muqarrarligini yana bir bor eslatib oʻtdilar.

Sobir Ergashev, tuman IIB xodimi, tadbir ishtirokchisi:

-Jamiyatda shunday illatlar borki, u maʼlum bir sohaga emas, balki butun jamiyat taraqqiyotiga toʻgʻonoq boʻladi. Davlatni ich-ichidan yemiradigan ana shunday illat – korrupsiya va poraxoʻrlikdir. Aynan shu illat sababli koʻplab davlatlarning inqirozga yuz tutgani ham tarixdan maʼlum. Bugungi kunda korrupsiya muammosiga deyarli barcha mamlakatda duch kelish mumkin. Korrupsiya soʻnggi yillarda xalqaro miqyosda transmilliy jinoyat sifatida keng muhokama qilinayotgan mavzulardan biridir. Taraqqiyotining yangi bosqichiga qadam qoʻyayotgan Oʻzbekiston uchun korrupsiyaning har qanday shakldagi koʻrinishi islohotlar shiddatini susaytirishi bilan xavfli. Albatta, bu kabi tadbirlarning oʻtkazilishi fuqarolarda korrupsiyaga nisbatan huquqiy ongni oshishida, ularda korrupsiyaga nisbatan toqatsizlik madaniyatini shakllantirishda katta ahamiyatga ega deb hisoblaymiz.

Tadbir yakunida ishtirokchilarni qiziqtirgan savollarga maʼruzachilar tomonidan aniq va batafsil javoblar berildi.

Gavhar Shoimova,
Xalq deputatlari Denov tuman Kengashi deputati