Qandli diabetga chalinganlar himoyada

Butun dunyo sogʻliqni saqlash tashkiloti va Xalqaro diabet federatsiyasi tomonidan 1991-yilda 14-noyabrni “Butun dunyo diabetga qarshi kurash kuni” sifatida eʼtirof etilgan.

Aytish joizki, yurak-qon tomir kasalliklarining rivojlanishi va rivojlanishi yuqori boʻlgan surunkali mikrovaskulyar diabetik asoratlar bilan kechuvchi kasallikka qarshi kurashish masalasi kunning endokrinologik muhim vazifalaridan biriga aylanmoqda.

Eng asosiysi, endokrinologiya yoʻnalishida tibbiy yordam koʻrsatish sogʻliqni saqlash tizimida alohida oʻrin tutadi, chunki endokrin kasalliklar koʻp hollarda surunkali kechib, yuqori oʻlim va nogironlik koʻrsatkichlariga olib keladigan ogʻir asoratlarga sabab boʻladi.

Shu munosabat bilan Oʻzbekiston “Adolat” sotsial-demokratik partiyasining saylovoldi dasturida “Kuchli ijtimoiy siyosat-xalq farovonligining kafolati” bandi ijrosini taʼminlash maqsadida mamlakatimizda qandli diabet kasalligi bilan kasallangan bemorlarimiz uchun amaliy yordam berish, kasallikni oldini olishga qaratilgan tadbirlar tashkil etish va aholining turmushi hamda ovqatlanish tarzini oʻzgartirish orqali aholini kasallikdan saqlashga qaratilgan Qandli diabet kasalliklarini oldini olish haftaligi loyihasi doirasida “Sogʻlom avlod” jamgʻarmasi viloyat filiali, “Sirena Pharma” dori-darmon ishlab chiqarish firmasi hamkorlikda viloyat Endokrinologiya dispanserida “Ochiq eshiklar kuni” tadbiri tashkil etildi.

Tadbirda partiya viloyat Kengashi vakillari, deputatlar, hamkor tashkilotlar vakillari, viloyat Endokrinologiya dispanseri tibbiyot xodimlari, qandli diabet bilan ogʻrigan bolalar va oʻsmirlar, aholining katta yoshdagi qatlami va OAV vakillari ishtirok etishdi.

Malika Amanova, Xalq deputatlari Termiz shahar Kengashi deputati, Oliy toifali shifokor:

-Bugungi kunda endokrinopatiyalar tizimida birinchi oʻrinni qalqonsimon bez kasalliklari, ikkinchi oʻrinni qandli diabet, uchinchi oʻrinni gipotalamo-gipofizar tizimi kasalliklari va boshqa xastaliklar egallamoqda. Mazkur tadbirni oʻtkazishdan maqsad — insonlarga qandli diabet, uning xavfli omillari haqida, erta tashxis qoʻyish, asoratlarni oldini olish haqida koʻproq maʼlumot berib, aholini “diabetga qarshi kurash”ga chaqirish edi.

Tadbirda soha mutaxassislari tomonidan tadbir ishtirokchilariga yurak qon-tomir kasalliklari, qandli diabet kabi yuqumli boʻlmagan kasalliklar butun dunyoda nogironlik darajasini ortishiga va bevaqt oʻlimlar soni koʻpayishiga sabab boʻlayotgani, bu kasalliklarning kelib chiqishiga yuqori qon bosimi, tamaki va alkogol mahsulotlarini haddan tashqari koʻp isteʼmol qilish, qondagi xolesterinning yuqori darajasi, ortiqcha tana vazni, meva va sabzavotlarni yetarlicha isteʼmol qilmaslik va jismoniy faollikni sustlashishi kabi xavfli omillar keltirib chiqarayotgani aytib oʻtildi. Qandli diabet va uning asoratlari, davolash usullari haqida tushunchalar berishdi. Tadbir davomida barcha istovchilar qandli diabet boʻyicha zarur maslahat va tashxis yordamini olishdi.

Tadbir yakunida bemor bolajonlarga partiyaning va hamkor tashkilotlarning esdalik sovgʻalari topshirildi.

Gulshod Tursoatova,

“Adolat” SDP Surxondaryo viloyat Kengashi Matbuot kotibi.